ИСТИҚБОЛИ ҒОЛИБИ СЕКАРАТАИ ДАВРИ ҶУМҲУРИЯВИИ ОЛИМПИАДАИ ФАННИИ ХОНАНДАГОН

Маҳваш Бойматова – хонандаи синфи 8-и муассисаи давлатии таълимии “Гимназияи №1-и шаҳри Гулистон ба номи академик Бобоҷон Ғафуров” соли ҷорӣ дар даври ҷумҳуриявии олимпиадаи фаннии хонандагон аз фанни забон ва адабиёти рус иштирок намуда, соҳиби ҷойи сеюм ва медали биринҷӣ гардид.

Масъулини шуъбаи моарифи шаҳр, ҳайати омӯзгорони Муассисаи давлатии таълимии “Гимназияи №1-и шаҳри Гулистон ба номи академик Бобоҷон Ғафуров” Маҳваш Бойматоваро дар назди бинои муассиса самимона истиқбол гирифтанд.

ҒОЛИБИЯТ МУБОРАК! – шаҳри Гулистон ғолиби даври вилоятии фестивал-озмуни ҷумҳуриявии "Сайри гули лола" гардид

Санаи 18 апрели соли 2025 дар толори калони Мақомоти иҷроияи ҳокимияти давлатии вилояти Суғд ҷаласаи корӣ баргузор шуд ва натиҷаҳои рушди иҷтимоию иқтисодии вилоят дар 3 моҳи соли 2025 баррасӣ гардид.

Дар баробари таҳлили бурду бохти фаъолони вилоят дар охир аз ҷониби Раиси вилояти Суғд муҳтарам Раҷаббой Аҳмадзода ба ғолибони даври вилоятии Фестивал-озмуни ҷумҳуриявии "Сайри гули лола" мукофотҳои пулӣ супорида шуд.

Боиси хушнудист, ки дар даври вилоятии фестивал-озмуни гулҳо таҳти унвони “Сайри гули лола” шаҳри Гулистон барои саҳми арзанда дар рушди фарҳанги зебоипарастӣ, вусъат бахшидан ба корҳои ободонию созандагӣ, кабудизоркунӣ бо дипломи дараҷаи IIl ва мукофотпулӣ сазовор гардид.

Шаҳри Гулистон нақшаи даъвати ҳарбиро пеш аз муҳлат иҷро намуд

Бо мақсади таъмини иҷрои Фармони Президенти Ҷумҳурии Тоҷикистон аз 19 феврали соли 2025, №967 “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007 Ҷумҳурии Тоҷикистон ба хизмати ҳарбӣ”, қарори дахлдори Раиси вилояти Суғд "Дар бораи даъвати шаҳрвандони солҳои таваллудашон 1998-2007 ба хизмати ҳарбӣ дар моҳҳои апрел-майи соли 2025" ва қарори раиси шаҳри Гулистон, баҳри иҷрои сифатноки нақшаи даъват дар шаҳр чораҳои зарурӣ андешида шуд.

Роҳандозии тадбирҳои судманд ва ба роҳ мондани корҳои тарғиботиву ташвиқотӣ, анҷом додани мулоқоту вохӯриҳо бо насли ҷавон ва волидайни онҳо, баргузории силсилаи чорабиниҳои маърифатӣ, фарҳангӣ ва варзишӣ, рӯзи дарҳои кушод дар қисмҳои ҳарбӣ ва дигар чорабиниҳои ҳадафманд имкон дод, ки шаҳри Гулистон санаи 16 апрели соли ҷорӣ, нақшаи босифати даъвати навбатии шаҳрвандони солҳои таваллуди 1998-2006 Ҷумҳурии Тоҷикистон ба хизмати ҳарбиро ба пуррагӣ иҷро намояд.

ИЛМУ МАЪРИФАТ САРЧАШМАИ САОДАТИ ИНСОН – баргузории рӯзи ягонаи ахбори сиёсӣ

Имрӯз, 17.04.2025 тибқи барқияи Мақомоти иҷроияи ҳокимияти давлатии вилояти Суғд аз 10.04.2025 дар толори хурди мақомоти иҷроияи ҳокимияти давлатии шаҳр рӯзи ягонаи ахбори сиёсӣ дар мавзуи “Илму маърифат сарчашмаи саодати инсон” дар партави эълон гардидани солҳои 2025-2030 “Солҳои рушди иқтисоди рақамӣ ва инноватсия” бо аҳли ҷамоатчигии шаҳр вохӯрӣ баргузор карда шуд.

Дар вохӯрии мазкур ҳайати гурӯҳи тарғиботии вилоятӣ – Абдуазиз Бобоев устоди МДТ “Донишгоҳи давлатии Хуҷанд ба номи академик Бобоҷон Ғафуров”, Зулфинисо Раҷабова устоди МДТ “Донишгоҳи давлатии Хуҷанд ба номи академик Бобоҷон Ғафуров”, Мамурахон Самадова корманди рӯзномаи вилоятии “Ҳақиқати Суғд” ва Фаридуншоҳ Абдуллоев намояндаи МИҲД-и шаҳр иштиррок ва суханронӣ намуданд.