ТАВАҶҶУҲ БА РУШДИ СОҲАИ ҲУНАРМАНДӢ

Санаи 29.08.2025 дар ФМД "Маркази рушди ҳунармандӣ ва малакаҳои касбии муосир" дар шаҳр бо иштироки бонувони ҳунарманд семинар баргузор гардид.

Дар кори семинар муовини Раиси шаҳри Гулистон Муслимахон Ҷамолиён, директори ФМД "Маркази рушди ҳунармандӣ ва малакаҳои касбии муосир" ва мутахассиси рушди ҳунармандӣ дар маркази мазкур Озода Тошматова иштирок ва суханронӣ намуданд.

Таъкид карда шуд, ки имрӯз дар Ҷумҳурии Тоҷикистон ҳавасмандгардонӣ ва имтиёздиҳӣ ба рушди ҳунарҳои мардумӣ аз ҷониби Пешвои миллат муҳтарам Эмомалӣ Раҳмон саривақтӣ ва бисёр муҳим арзёбӣ гардида, метавонад ба ташкил ёфтани ҷойҳои нави корӣ ва беҳтар шудани имконияти иҷтимоию иқтисодии оилаҳо мусоидат намояд.

КУРСИ "ЗАН - САРВАР" ҶАМЪБАСТ ГАРДИД

Аз 26.08.2025 то 28.08.2025 дар Муассисаи давлатии "Маркази таҳсилоти иловагӣ"-и шаҳри Гулистон машғулиятҳои курси кутоҳмуддати «Зан сарвар» ҷараён гирифт. Шунавандагони курс машғулиятҳоро аз рӯйи нақша фаро гирифтанд.

Дар ҷамъбасти курс муовини Раиси шаҳри Гулистон Муслимахон Ҷамолиён таъкид намуд, ки тайи солҳои соҳибистиқлолӣ таҳти роҳбарии бевоситаи Президенти Чумҳурии Тоҷикистон, Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон Ҳукумати Ҷумҳурии Тоҷкистон тавонист, ки барои беҳбудии вазъи занон таваҷҷуҳи хоса зоҳир намояд. Таҳия ва қабул гардидани як қатор барномаву стратегияҳо ва санадҳои меъёриву ҳуқуқӣ дар самти беҳдошти вазъи занон барои беҳтар намудани сатҳи иҷтимоию иқтисодӣ, фарҳангию маърифатии оилаҳо, пешгирии зуроварӣ нисбати занон, баланд бардоштани мақоми зан дар ҷомеа, иштироки фаъолонаи онҳо дар идоракунии давлат, омода намудани кадрҳои болаёқату донишманд аз ҳисоби занону духтарон ва баланд бардоштани маърифати ҳуқуқии занон мусоидат намудаанд. Аз ин ҷост, ки бо мақсади ҷалб ва пешбарӣ намудани занҳо ба вазифаҳои роҳбарикунанда бо Қарори Ҳукумати Ҷумҳурии Тоҷикистон Барномаи давлатии «Тарбия, интихоб ва ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону духтарони лаёқатманд барои солҳои 2023-2030» қабул гардид, ки барои баланд бардоштани обрўву нуфузи зани тоҷик дар арсаи сиёсат ва афзудани теъдоди занон дар сатҳи роҳбарикунанда замина гузошт.

ТАҚДИМИ ЛИБОСИ МАКТАБӢ БА ЯТИМОН

Дастгирии қишри ниёзманди ҷомеа яке аз самтҳои асосии сиёсати иҷтимоии давлат маҳсуб ёфта, тибқи дастуру супоришҳои доимии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Мақомоти иҷроияи ҳокимияти давлатии шаҳри Гулистон бахшида ба иду ҷашнҳои давлатӣ ва суннатӣ ба онҳо пайваста кумакҳои модиву молиявӣ мерасонад.

Имрӯз, 27 августи соли 2025 дар толори хурди мақомоти иҷроияи ҳокимияти давлатии шаҳр маросими анъанавии супоридани либосҳои мактабӣ ба ятимон ба вуқӯъ пайваст. Раиси шаҳр Илҳом Пӯлотзода дар ибтидо кулли мактаббачагонро бо фарорасии соли хониши 2025-2026 муборакбод гуфта барояшон хониши хубу аъло таманно намуд. Сипас, ба 50 нафар ятимон либоси мактабӣ тақдим карда шуд.

Зикр гардид, ки дастгирии ятимону қишри ниёзманди аҳолӣ ҳамеша дар зери назари Ҳукумати Ҷумҳурӣ қарор дорад.

ГУЛИСТОН ДАР САФАР БАР КАНД ММФ ПИРӮЗ ШУД

Санаи 26.08.2025 дар доираи даври сездаҳуми Чемпионати Тоҷикистон оид ба футбол дар минтақаи Суғд дастаи "Гулистон"-и шаҳри Гулистон дар сафар бо дастаи "КАНД ММФ"-и шаҳри Конибодом дидор анҷом дод.

Бозӣ бисёр тезутунд ва пурҳаяҷон сурат гирифта, ҳар ду тараф борҳо дарвозабононро маҷбур намуданд, ки тубро аз дохили тури дарвоза берун оранд.

Дастаи "Гулистон"-и шаҳри Гулистон бо бартарии тубҳо бо ҳисоби 3-2 бар "КАНД ММФ"-и шаҳри Конибодом пирӯз шуд.

Тубҳоро аз ҳайати дастаи Гулистон Мубинҷон Ғафуров, Наимҷон Расуло ва Дилшод Бозоров ба нишон расонид.

Дастаи "Гулистон" бо пирӯзии навбатӣ мавқеашро дар садри ҷадвали мусобиқа устувортар намуд.