МУАРРИФИИ КОМИССАРИ НАВИ ШАҲРИ ГУЛИСТОН

Дар толори хурди мақомоти иҷроияи ҳокимияти давлатии шаҳр муаррифии комиссари ҳарбии Комиссариати ҳарбии шаҳри Гулистон Хайрулло Шарифзода баргузор гардид.

Дар маросими муаррифӣ Раиси шаҳр Илҳом Пӯлотзода, Комиссари ҳарбии вилояти Суғд генерал-майор Умедҷон Солеҳзода, роҳбарони мақомоти ҳифзи ҳуқуқ, муовини соҳавии раиси шаҳр, мудирони шуъбаву бахшҳо иштирок намуданд.

Комиссари ҳарбии вилояти Суғд генерал-майор Умедҷон Солеҳзода зимни муаррифии комиссари навтаъин иброз дошт, ки хизмат дар сафи Қувваҳои Мусаллаҳ ва иҷрои вазифаҳои вобаста ба таъмини мудофиаи давлат аз самтҳои муҳими сиёсати давлатӣ ба ҳисоб рафта, аз ҳар як масъул масъулияти баланд, интизоми қатъӣ ва садоқат ба давлату миллатро талаб менамояд. Ӯ дастуру супоришҳои Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ муҳтарам Эмомалӣ Раҳмонро ба ҳайати комиссариат расонида, таъкид кард, ки фаъолияти комиссариати ҳарбӣ бояд дар самти баланд бардоштани сатҳи омодагии сафарбарӣ, татбиқи босифати маъракаҳои даъвати ҷавонон ба хизмати ҳарбӣ, таҳкими ҳамкориҳо бо мақомоти давлатӣ ва баланд бардоштани ҳисси ватандӯстиву худшиносии ҷавонон боз ҳам ҷоннок карда шавад. Ҳамзамон ӯ аз комиссари навтаъин даъват намуд, ки бо истифода аз таҷрибаи корӣ, ҳисси баланди масъулиятшиносӣ ва ҳамкорӣ бо мақомоти маҳаллӣ вазифаҳои хизматиро дар сатҳи баланд иҷро намояд.

Муроҷиати шаҳрвандон - омили таҳкими эътимод ба ҳокимияти маҳаллӣ

Дар Мақомоти иҷроияи ҳокимияти давлатии шаҳри Гулистон қабули навбатии шаҳрвандон аз ҷониби Раиси шаҳри Гулистон Илҳом Пӯлотзода баргузор гардид.

Дар рафти қабул шаҳрвандон вобаста ба масъалаҳои иҷтимоӣ, таъмини манзил, ҷудо намудани қитъаи замин, беҳтар намудани инфрасохтор, хизматрасонии коммуналӣ, расонидани кӯмакҳои иҷтимоӣ, таъмини шуғл ва дигар масъалаҳои мавриди таваҷҷуҳ муроҷиат намуданд.

Раиси шаҳри Гулистон Илҳом Пӯлотзода ҳар як муроҷиати сокинонро бодиққат шунида, барои баррасии ҳаматарафа ва ҳалли онҳо ба муовинон, роҳбарони воҳидҳои сохторӣ ва масъулини дахлдор супоришҳои мушаххас дод. Ҳамзамон таъкид гардид, ки ҳангоми иҷрои супоришҳо риояи муҳлатҳои муқарраргардида ва муносибати масъулона бо муроҷиати шаҳрвандон ҳатмӣ мебошад.

30 июл - рӯзи кормандон хадамоти оташнишонӣ

Санаи 29 июл Раиси шаҳри Гулистон Илҳом Пӯлотзода кормандони Қисми мустақили 37 - уми ҳарбикунонидашудаи Хадамоти давлатии оташнишонӣ оид ба муҳофизати шаҳрро, ки фаъолияти пурсамари хизматӣ доранд ба муносибати иди касбӣ таҳният гуфта, қайд намуд, ки мутахассисони ин касб ҳамеша бо далерӣ, ҷасорат, муҳаббату садоқат ба кори худ ва омодагии ҳамешагӣ матонат нишон медиҳанд, зеро мубориза бо оташ аз ҳар яки онҳо кордониву зиракӣ, тахассуси баланд ва мардонагиро талаб менамояд.

Итминони комил дорам, ки афсарони баландрутба то хизматчиёни қатории ин ниҳод, минбаъд низ барои пешгирӣ намудани ҳодисаҳои нохуши сӯхтор, таъмини зиндагии осоиштаи мардум маҳорати касбӣ нишон дода, ба халқу ватани азизамон хизматҳои арзандаи шоёни таҳсин менамоянд. Дар адои чунин хизмати пуршарафу сермасъулият, ки ба манфиати давлат ва халқи Тоҷикистони азиз мебошад саломатӣ, азму иродаи қавӣ ва барору комёбӣ таманно намуд.

Баргузории Ситоди зимистонгузаронӣ

Санаи 29.07.2026 таҳти раёсати муовини якуми раиси шаҳр Даврон Муҳаммадзода Ситоди зимистонгузаронӣ баргузор гардид. Дар Ситод аъзо, роҳбарон ва масъули соҳаҳо иштирок намуданд.

Ҷиҳати иҷрои Қарори Ҳукумати Ҷумҳурии Тоҷикистон аз 28 марти соли 2026, №178 “Дар бораи саривақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва сармарабахш дар давраи тирамоҳу зимистони солҳои 2026-2027” ва қарори Раиси вилояти Суғд аз 17 апрели соли 2026, №99 “Дар бораи сари вақт омода намудани соҳаҳои иқтисодиёт ва иҷтимоиёти вилоят барои фаъолияти мунтазам ва самарабахш дар давраи тирамоҳу зимистони солҳои 2026-2027” қарори Раиси шаҳр аз 06 майи соли 2026,№123 “Дар бораи сари вақт омода намудани соҳаҳои иқтисодиёт ва иҷтимоиёти шаҳр барои фаъолияти мунтазам ва самарабахш дар давраи тирамоҳу зимистони солҳои 2026-2027” ба имзо расида, ҳайати Ситод ва нақшаи чорабиниҳо дар 21 банд таҳия ва тасдиқ шуда, ба шахсони масъул дастрас карда шудааст.