ЁРИИ АМАЛӢ БА ТАШКИЛОТҲОИ ИБТИДОӢ

9-уми август дар толори Ҷамоати шаҳраки Сирдарё семинар-машварати дастурдиҳии Шўрои собиқадорони ҷангу меҳнат доир гардид.

Семинар-машварат бо қироати баромади Раиси шаҳри Гулистон Матлубахон Амонзода аз ҷониби мудири шуъбаи рушди иҷтимоӣ ва робита бо ҷомеа Илҳом Мадализода оғоз ёфт.

Раиси Ҷамоати шаҳраки Сирдарё Ойнисо Раҳматова роҷеъ ба тадбирҳои омодагӣ ба ҷашни пуршукўҳи 25-солагии Истиқлолияти давлатӣ ҳарф зад. Доир ба таҷрибаи корӣ ва ташкили гўшаю ҳуҷҷатгузорӣ раиси ташкилоти ибтидоии Шўрои собиқадорони шаҳраки Сирдарё Султонбердӣ Каримбердиев баромад намуд.

ИШТИРОКЧИЁНИ ДАВРИ НИҲОИИ МУСОБИҚАИ ҶУМҲУРИЯВӣ МУАЙЯН ГАРДИДАНД

Дар вилояти Суғд ғолибони ду даври аввали мусобиқаи ҷумҳуриявӣ, ки баҳри дар сатҳи баланд таҷлил намудани 25-солагии Истиқлолияти давлатии Ҷумҳурии Тоҷикистон аз чониби Сарвари давлат эълон гардидааст, муайян шуданд.

Аз рўи натиҷаи ҷамъбасти мусобиқа 18 маҳалла, 14 деҳа, 9 деҳот ва 8 шаҳрак соҳиби ҷойҳои ифтихорӣ, аз ҷумла намунавӣ, якум, дуюм ва сеюм сазовор гардида, бо ифтихорномаҳо ва мукофотҳо қадрдонӣ гардиданд.

НЕРЎГОҲИ БАРҚИ ОБИИ «ҚАЙРОҚҚУМ» ТАҶДИД МЕШАВАД

Нерўгоҳи Барқи обии «Қайроққум», ки яке аз нерўгоҳҳои куҳансолтарини Тоҷикистон ба шумор меравад, таҷдид мешавад.

Барои ин нерўгоҳ аз ҳисоби Бонки Аврупоии таҷдид ва рушд ва Бонки сармоягузории Аврупо 70 млн.доллар маблағ ҷудо шудааст ва баъд аз таъмиру барқарорсозии 2 агрегат ва трансформаторҳо тавоноии нерўгоҳ аз 126 ба 148 мегаватт расонида мешавад.

КОНСОЙ БЕҲТАРИН ШАҲРАК ДАР ГУЛИСТОН

Ғолиб омадани Консой дар мусобиқаи беҳтарин шаҳрак дар Гулистон, ки ба истиқболи ҷашни 25-солагии Истиқлолияти давлатии Тоҷикистон бахшида шудааст бе ваҷҳ нест. Ҳадафи асосии мусобиқаи мазкур, ки бо амри Президенти мамлакат  ҷараён гирифт, қабл аз ҳама беҳтар кардани вазъи иқтисодиву иҷтимоиёти маҳал, ноил шудан ба нишондиҳандаҳои баланди истеҳсолӣ, таъмину татбиқ кардани барномаҳои гуногун, ободониву кабудизоркунӣ, ҳифзи муҳити зист, самаранок ва мақсаднок баҳрабардор кардани неъматҳои табиати диёр мебошад.

Воқеан ҳам ҷиҳати амалӣ кардани он шартҳои мусобиқа, ки дар низомнома омадааст бошандагони Консой дар давоми 10 соли охир корҳои зиёду назаррасро ба субут расонидаанд. Имрўз симои шаҳрак ба куллӣ тағйир ёфта, зина ба зина ва марҳила ба марҳила рушд мекунаду пеш меравад. Фаъолияти мўътадилу бомароми ҶМ ТКММ «Апрелевка» чун гиреҳкушои кулли мушкилиҳои иқтисодиву иҷтимоии шаҳрак мусоидат мекунад, ки дар баробари бо ҷойи кор таъмин кардани сокинони маҳалӣ ба ривоҷу равнақи корҳои ободониву созандагии шаҳрак: таъмири роҳҳову муассисаҳои тандуристиву маориф, варзишу фарҳанг ба таваҷҷуҳи бештару беҳтар зоҳир кунад.