Фаъолияти қабулгоҳи ҷамъиятӣ

26 ноябр дар шаҳраки Чоруқдаррон қабули шаҳрвандон аз ҷониби вакилони Маҷлиси вакилони халқи шаҳри Қайроққум аз ҳавзаҳои интихоботии рақамҳои 32 ва №34, аз сафи ҲХДТ интихоб шудаанд Мансур Боқиев ва Каромат Қосимова сурат гирифт.

Шаҳрвандон оид ба масъалаҳои кӯмаки моддӣ, маводи сухт, маблағ барои қонеъ гардонидани эҳтиёҷоти рӯзгору  доруворӣ ва монанди инҳо ба вакилон муроҷиат намуданд. Ҳаддалимкон худи ҳамон рӯз вакилон дар ҳамкорӣ бо шахсони масъул  дархости муроҷиаткунандагонро ба таври мусбӣ ҳал карданд. Ашхоси эҳтиёҷманд ба монанди  Мунаввара Ғаниева, аз тарафи корхонаи ҶСК “Комбинати фулузоти нодири Ленинобод”  бо ҳезум,  Шарофат Қобилова, бо доруворӣ аз ҷониби беморхонаи шаҳрак таъмин ва  М. Ҷӯрабоева бо мадади соҳибкорон дархосташ қонеъ карда шуд.

Истиқболи сазовор

Муассисаи давлатии «Мактаби варзишии бачагону наврасони шаҳри Қайроққум» бо ҳадафи сазовор истиқбол гирифтани Рӯзи Парчами давлатӣ як қатор чорабиниҳои варзиширо роҳандозӣ намуд.

Волейбол

Чемпионати кушоди шаҳрӣ оид ба волейбол дар Кохи варзишии Истиқлол доир ва пирӯзӣ насиби дастаи коллеҷи тиббӣ гардид.

Ҷойҳои дуюму сеюмро дастаи мактаби рақамҳои 1 ва 14 соҳибӣ карданд.

Фаъолгардонии нақши занон

Қабули даҳҳо санадҳои ҳуқуқӣ дар беҳдошти вазъи иқтисодӣ – иҷтимоии занон, таъмини иштироки фаъолонаи онҳо дар идоракунии давлат, вусъати маърифати ҳуқуқии онон, беҳгардонии вазъи сиҳатии модару кӯдак ва амсоли инҳо  фарогири рӯзгори хуши бонувон аст, ки ин ҳама самари дастовардҳои замони Истиқлолият мебошад.

Қарори навбатии Раиси шаҳри Қайроққум аз 10 ноябри соли ҷорӣ, таҳти №271 «Дар бораи нақшаи чорабиниҳо оид ба амалӣ намудани Стратегияи миллии фаъолгардонии нақши занон дар Ҷумҳурии Тоҷикистон барои солҳои 2015-2020» баҳри боз ҳам баланд бардоштани мақоми зан дар ҷомеа нигаронида шудааст.

Чорабинии идона бахшида ба Рӯзи Парчам

Дар арафаи “Рӯзи Парчами давлатии Ҷумҳурии Тоҷикистон”дар толори шӯъбаи маорифи шаҳри Кайроккум  вохӯрии намояндагони ташкилоти ҷамъиятии “Созандагони Ватан” бо донишҷӯёни коллеҷи тиббӣ, хонандагони синфҳои болоии мактабҳои таҳсилоти миёнаи умумии рақамҳои 1, 14 ва 8 баргузор гардид.

Раиси КИ ҲХДТ Қосимова К.М дар он баромад намуда, ҳозиринро бо Иди Парчам муборакбод намуд. Дар баромад дар бораи таърихи Парчами Тоҷикистон ва аҳамияти он дар давлатдории тоҷикон сухан рафт.

Дар ҳамин чорабинӣ дар вазъияти тантанавӣ ба 160 нафар донишҷӯён шаҳодатномаҳои ҳизбӣ супорида шуд.

Дар охир аз тарафи донишҷӯён ва хонандагон номераҳои фарҳангӣ ба намоиш гузошта шуд.