Иди Истиқлол дар Чоруқдаррон

Бегоҳии рўзи 9-уми сентябри соли 2017 дар майдони Қасри маданияти “Кўҳкан”-и шаҳрак тантанаҳои шаҳрии Иди муқаддаси Истиқлол бо иштироки намояндагони ҷамоати шаҳракҳо, корхона, муассиса, ташкилотҳои шаҳр ва сокинони сершумори шаҳрак доир гардид.

Дар тўйхонаи “Муҳаммадӣ”-и шаҳрак барои беш аз 200 нафар собиқадорони меҳнат, ҷанговарони байналмилал, муҳофизони сохти конститутсионӣ, ятимону маъюбон, пирони танҳо ва қишри эҳтиёҷманди аҳолӣ дасторхони идона густурда шуда, беш аз 10 нафар барҷомондагон аёдат карда шуданд. Ҳамзамон, бо иштироки муовини Раиси вилояти Суғд Назира Ғаффорӣ ва Раиси шаҳри Гулистон ба беш аз 35 нафар собиқадорони меҳнат туҳфаҳо ва маводҳои ғизоӣ дода шуданд.

Истиқлолият – муқаддастарин иди Тоҷикистониён

Дар толори калони мақомоти иҷроияи ҳокимияти давлатии шаҳр бахшида ба 26-уми солгарди Истиқлолияти давлатии Ҷумҳурии Тоҷикистон ҷаласаи тантанавӣ доир гардид.

Раиси шаҳри Гулистон Сатториён Матлубахон Амонзода ҷаласаро ҳусни ифтитоҳ бахшида, сипас намояндаи Ҳукумати Ҷумҳурии Тоҷикистон, Президенти Академияи илмҳои Тоҷикистон Фарҳод Раҳимӣ доир ба дастовардҳои тоҷикистониён дар зарфи 26 соли Истиқлолияти давлатӣ маърўза намуд. Муовини Раиси вилояти Суғд Назира Ғаффорӣ табрикоти Раиси вилояти Суғдро қироат кард.

Рамзи шаҳри Гулистон

Дар ҷаласаи тантанавӣ бахшида ба 26-умин солгарди Истиқлолияти давлатии Ҷумҳурии Тоҷикистон рамзи расмии шаҳри соҳили “Баҳри тоҷик” тасдиқ гардид.

Арбоби ҳунари Тоҷикистон, сардори галереяи “Сомониён”, раиси комиссияи озмуни рамзи шаҳр Ғафурҷон Ҷўраев дар баромади худ доир ба мақсад ва ҳадафҳои озмун, ҳамзамон тавзеҳи тарҳи нави он суханронӣ намуд. Аз ҷумла, қайд гардид, ки тибқи қарори Раиси шаҳр бо мақсади тайёр кардани Рамзи расмии шаҳри Гулистон, муаррифии шаҳр ҳамчун шаҳри саноативу истироҳатӣ, шинохти он ба сифати маркази фароғатӣ ва сайёҳиву туризми байналхалқӣ ва ба сифати як минтақаи ободу мутарақии Тоҷикистони соҳибистиқлол, нақши сокинони шаҳр дар рушду нумўи соҳаҳои хоҷагии халқи вилояту ҷумҳурӣ, тарбияи худшиносии милливу ифтихор аз ватандорӣ ва баланд бардоштани маданияти шаҳрдорӣ озмуни лоиҳаи  «Рамзи шаҳр» эълон гардида буд.

Оши палави Гулистон

Дар майдони Боғи истироҳатӣ-фароғатии «24-солагии Истиқлолият»-и шаҳри Гулистон ба ифтихори 26-умин солгарди Истиқлолияти давлатии Ҷумҳурии Тоҷикистон фестивал-озмуни «Оши палави Гулистон» доир гардид.

Дар он намояндагони 16 ҷамоату корхонаҳо, идораву муассисаҳои шаҳр фаъолона ширкат варзиданд. Иштирокчиёни озмун аз рўи номгўи «Оши палави беҳтарин», «Дасторхони идона», «Дастони моҳир», «Ошхўри беҳтарин» ва монанди ин байни худ қувва озмуданд. Дар фестивал-озмун ҳамчунин барои собиқадорони ҷангу меҳнат, ятимон ва қишри эҳтиёҷманди аҳолӣ дасторхони идона ороста, намоиши ҳунарҳои халқӣ ба маърази сокинон ва меҳмонон гузошта шуданд.