Президенти мамлакат Эмомалӣ Раҳмон дар шаҳри Панҷакент Маркази табобати дандон, коргоҳи истеҳсоли мебел ва дӯзандагиро ба истифода доданд

14 апрел дар хиёбони ба номи Абӯабдуллоҳи Рӯдакии шаҳри Панҷакент Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Маркази табобати дандон, коргоҳи истеҳсоли мебел ва дӯзандагиро ифтитоҳ карданд.

Мутахассисони баландихтисоси Маркази табобати дандон дар бинои 6-ошёна ба муроҷиаткунандагон дар шароити муосир хизмат мерасонанд. Иншооти соҳаи тандурустӣ дорои таҷҳизоти замонавӣ барои ташхису табобат буда, дар ин ҷо дар як вақт барои гузаронидани ҷарроҳии ҷоғу рӯй, барқароркунӣ, гузоштани дандонҳои сунъӣ ва дигар табобати вобаста ба дандон шароит фароҳам аст.

Пешвои муаззами миллат муҳтарам Эмомалӣ Раҳмон бо истифода аз имкони фароҳамшуда, кормандони марказро ҷиҳати мутобиқ ба талаботи замони кунунӣ ба роҳ мондани хизматрасониҳо вазифадор карданд.

Сарвари давлат Эмомалӣ Раҳмон дар шаҳри Панҷакент Муассисаи томактабии «Маърифатпарвар»-ро ифтитоҳ намуданд

14 апрел дар шаҳри Панҷакент Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Муассисаи томактабии “Маърифатпарвар”-ро ифтитоҳ карданд.

Иншооти соҳаи маориф дар заминаи дастгирии Ҳукумати мамлакат дар самти фаъолияти бахши хусусӣ аз тарафи соҳибкор Муаззамхон Ансорӣ сохта шудааст.

Бино аз 3 ошёна иборат буда, масоҳати умумии он 2400 метри мураббаъро ташкил медиҳад. Дар маҷмуъ дар кӯдакистон 400 нафар наврас ба таълиму тарбия фаро гирифта мешаванд.

Сарвари давлат Эмомалӣ Раҳмон дар мавзеи Кончочи ноҳияи Айнӣ ба бунёди корхонаи нави металлургӣ ва корхонаи афинажи тиллои ҶСП «ТАЛКО Голд» оғоз бахшиданд

14 апрел Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мавзеи Кончочи ноҳияи Айнӣ бо гузоштани санги асос ба бунёди корхонаи нави металлургӣ ва корхонаи афинажи тиллои Ҷамъияти саҳомии пӯшидаи “ТАЛКО Голд” оғоз бахшиданд.

Иттилоъ дода шуд, ки ин ду корхонаи нав давоми як сол бо сатҳу сифати баланд ва муҷаҳҳаз бо хатҳои технологии муосир сохта, ба истифода дода мешаванд.

Иқтидори истеҳсолии корхонаи нави металлургӣ дар як сол 2,2 тонна тилло (99,99%), 15 ҳазор тонна сабикаи сурмаи 99,85-фоиза ва 6 ҳазор тонна сурмаи рангаш сафеди 99,5-фоиза мебошад.

Оғози сафари кории Пешвои миллат Эмомалӣ Раҳмон ба вилояти Суғд ва ба истифода додани корхонаи маъдантозакунии ҶСП «ТАЛКО Голд» дар ноҳияи Айнӣ

14 апрел Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ бо вазъи зиндагии мардум, рафти корҳои ободонию созандагӣ, ифтитоҳи иншооти таъйиноти гуногун, боздид аз фаъолияти хоҷагиҳои деҳқонӣ ва суҳбату мулоқот бо сокинон ба вилояти Суғд ташриф оварданд.

Сафари кории Президенти мамлакат муҳтарам Эмомалӣ Раҳмон аз ноҳияи Айнӣ оғоз гардид.

Дар фурудгоҳи муваққатии мавзеи Кончочи ноҳияи Айнӣ Сарвари давлатро Раиси вилояти Суғд Раҷаббой Аҳмадзода ва роҳбарону фаъолони вилоят самимона истиқбол гирифтанд.

Дар ин мавзеъ нахуст Президенти Ҷумҳурии Тоҷикистон муҳтарам Эмомалӣ Раҳмон Корхонаи маъдантозакунии Ҷамъияти саҳомии пӯшидаи “ТАЛКО Голд”-ро мавриди баҳрабардорӣ қарор доданд.