2 феврал Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар минтақаи саноатии шимолу шарқии шаҳри Хуҷанд ба фаъолияти хати нави технологии коркарди пиёз дар Ҷамъияти дорои масъулияти маҳдуди “Хуҷанд — Агро” оғоз бахшиданд.
Самти асосии фаъолияти ҷамъият- ин коркард ва банду басти меваю сабзавот ва хушконидани он буда, васлу насби боз як хатти нави иловагии қабулу коркард ва хушконидани пиёз натиҷаи амалисозии дастуру супоришҳои Пешвои миллат муҳтарам Эмомалӣ Раҳмон аз ҷониби соҳибкорон оид ба воридсозии таҷҳизоти пешрафта ва тавассути он васеъ намудани доираи истеҳсолӣ, зиёд кардани ҳаҷми истеҳсоли маҳсулоти коркардшаванда аст.
Зимни шиносоӣ бо ҷараёни коркарду истеҳсол иттилоъ дода шуд, ки хатти нави технологӣ имкон дорад дар 1 шабонарӯз то 30 тонна пиёзро коркард ва хушк намояд. Барои ин дастгоҳу таҷҳизот аз кишварҳои Аврупо, Федератсияи Россия ва Ҷумҳурии Мардумии Чин ворид карда шуда, таҷҳизоти пиёзхушккунӣ истеҳсоли Ҳиндустон аст.