ГУЛИСТОН ДАР САФАР БАР КАНД ММФ ПИРӮЗ ШУД

Санаи 26.08.2025 дар доираи даври сездаҳуми Чемпионати Тоҷикистон оид ба футбол дар минтақаи Суғд дастаи "Гулистон"-и шаҳри Гулистон дар сафар бо дастаи "КАНД ММФ"-и шаҳри Конибодом дидор анҷом дод.

Бозӣ бисёр тезутунд ва пурҳаяҷон сурат гирифта, ҳар ду тараф борҳо дарвозабононро маҷбур намуданд, ки тубро аз дохили тури дарвоза берун оранд.

Дастаи "Гулистон"-и шаҳри Гулистон бо бартарии тубҳо бо ҳисоби 3-2 бар "КАНД ММФ"-и шаҳри Конибодом пирӯз шуд.

Тубҳоро аз ҳайати дастаи Гулистон Мубинҷон Ғафуров, Наимҷон Расуло ва Дилшод Бозоров ба нишон расонид.

Дастаи "Гулистон" бо пирӯзии навбатӣ мавқеашро дар садри ҷадвали мусобиқа устувортар намуд.

ШУРОИ НАВБАТИИ СОҲАИ МАОРИФИ ШАҲР БАРГУЗОР КАРДА ШУД

26 августи соли 2025 дар толори МД Маркази таҳсилоти иловагии шаҳри Гулистон” Шурои соҳаи маорифи шаҳр бо иштироки кормандони шуъба, директорони муассисаҳои таҳсилоти миёнаи умумӣ ва мудирони муассисаҳои давлатии таълимии томактабӣ баргузор карда шуд.

Дар кори Шуро муовини Раиси шаҳр Муслимахон Ҷамолиён ва мудири шуъбаи маорифи шаҳр Дилрабо Каримӣ иштирок доштанд.

Тибқи Рӯзномаи Шуро 4 масъала мавриди баррасӣ қарор дода шуд: рафти иҷрои “Барномаи давлатии рушди таҳсилоти томактабӣ дар Ҷумҳурии Тоҷикистон барои солҳои 2020-2025”, «Барномаи давлатии дарёфт ва рушди истеъдодҳо» ва масъалаҳои ҷорӣ.

ОҒОЗИ КУРСИ "ЗАН-САРВАР" ДАР ШАҲРИ ГУЛИСТОН

Санаи 26 августи соли 2025 дар толори Маркази калонсолон дар шаҳр машғулиятҳои курси кутоҳмуддати «Зан-сарвар» оғоз гардид. Муовини Раиси шаҳри Гулистон Муслимахон Ҷамолиён дар оғози машғулият зикр намуд, ки курси мазкур ҷиҳати иҷрои нақшаи чорабиниҳои Барномаи давлатии «Тарбия, интихоб ва ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону духтарони лаёқатманд барои солҳои 2023-2030» ба роҳ монда шуда, изҳори умедворӣ карда шуд, ки шунавандагон аз омўзишҳои ин курс аз устодон, занони роҳбар, сиёсатмадорони варзида барои худ дониш ва аз таҷрибаи бойи эшон бардоштҳои муҳим ва зарурӣ мегиранд. Иттилоъ дода шуд, ки курси мазкур дар асоси татбиқи нақша-чорабинии барнома роҳандозӣ гардида, соли 7-ум аст,ки таҳти унвонҳои «Духтарони Пешво»,«Зан роҳбар»,«Зан-сарвар», «Мактаби сарварони ҷавон», «Зан ва сиёсат» доир гардида, то имрӯз зиёда аз садҳо нафар занону духтарон ин курсро хатм намуда, соҳиби шаҳодатнома гардиданд.

Ҳадаф аз баргузории курси мазкур пеш аз ҳама, ҷалби духтарони лаёқатманд ба соҳаи хизмати давлатӣ ва омода намудани кадрҳои роҳбарикунанда аз ҳисоби занону духтарони лаёқатманд баланд бардоштани маърифати ҳуқуқӣ ва шаҳрвандии онҳо, ҷалби бештари духтарон ба таҳсил, таъмини ҳуқуқи баробари мард ва зан ҳангоми пешниҳод ва таъин намудан ба вазифаҳои роҳбарикунанда мебошад.

ТОЗАВУ ОЗОДА НИГОҲ ДОШТАНИ ШАҲР МАРОМИ МОСТ!

Санаи 23.08.2025 дар шаҳри Гулистон ҷиҳати тозаву озода намудани шаҳр ҳашари дастаҷамъии тозагӣ баргузор гардид.

Дар ҳашари тозагӣ ташкилоту корхона, муассисаҳои соҳаи маориф, фарҳанг, тандурустӣ ва дигар соҳаҳои хоҷагии халқи шаҳр фаъолона иштирок намуданд.

Ҳифз намудани табиат ва тозаю озода нигоҳ доштани гирду атроф ба инсонҳо вобастагии комил дошта, қарзи ҳамешагии шаҳрвандии мо мебошад. Бо ин мақсад ҳашарчиён гирду атрофи корхонаву муассисаҳо, мавзеъҳои истироҳатӣ, шафати роҳи асосӣ, гирду атрофи нуқтаҳои савдо ва кӯчаву хиёбонҳои шаҳрро аз ҳама гуна хасу хошок, баргҳои дарахтон ва партовҳо тоза намуданд.

Ҳадаф аз баргузории ҳашарҳои дастаҷамъона баланд бардоштани маърифати шаҳрдорӣ, тозаву озода нигоҳ доштани муҳити зист, пешгирии ҳар гуна бемориҳои сироятӣ ва ба ин васила таъмини беҳдошти солимии ҷомеа мебошад.