Рӯзи Парчам дар ШВКД

Бахшида ба Рӯзи Парчами давлатӣ дар толори ШВКД-и шаҳри Гулистон ҷамъомади идонаи ҷомеаи меҳнатӣ баргузор гардид. Ҷамъомадро муовини сардори ШВКД-и шаҳр подполковники милитса Баҳром Саидзода бо суханони ифтитоҳи ҳусни оғоз бахшида, доир ба рамзи давлатӣ, мақом ва арзиши он сухан ронда, кормандонро бо Рӯзи Парчами давлатии  Ҷумҳурии Тоҷикистон шодбош намуд.

Сипас мудири шуъбаи рушди иҷтимоӣ ва робита бо ҷомеаи дастгоҳи Раиси шаҳр Илҳом Мадализода роҷеъ ба муқаддасоти миллӣ, таърихи бостонии парчамдории тоҷикон ва Низомномаи Парчами давлатии Ҷумҳурии Тоҷикистон маърӯза кард.

Табрикоти Раиси шаҳри Гулистон Сатториён Матлубахон Амонзода ба ифтихори Рӯзи Парчами давлатии Тоҷикистон

Ҳамшаҳриёни гиромӣ!

24-уми ноябр тамоми тоҷикистониён боз як ҷашни таърихӣ, рӯзи саиду саодатбахш – Рӯзи Парчами давлатии Тоҷикистонро таҷлил менамоянд. Дар партави сиёсати хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Ҷаноби Олӣ, муҳтарам Эмомалӣ Раҳмон тамоми тоҷикистониён соли ҷорӣ ҷашни ҳумоюни 25-умин солгарди Истиқлолияти давлатии мамлакати худро бо рӯҳбаландии бузург ҷашн гирифтанд. Имрӯз бошад мо Рӯзи яке аз рамзҳои асосии давлатамон – Рӯзи Парчами миллиро ҷашн мегирем.

Дар таърихи ҳар миллату давлат воқеаҳо ва рӯйдодҳое ҳастанд, ки омӯзишу баррасии онҳо барои имрӯзиёну ояндагон чун сабақеву панде хизмат карда, дар шинохти асолати миллӣ, баҳамоиву худогоҳӣ сарчашмаи боэътимод ба шумор мераванд. Аз ин рӯ, дар баробари Суруди Миллӣ, Нишони давлатӣ ва забони модарӣ – Парчами давлатӣ низ барои мардум муқаддас аст. Агар забон қалби миллат бошад, Парчамро метавон сари баланди халқ номид. Чунки ҳар ҷо Парчам афрохта шавад, мардуми кишвар бо сари баланд ба сӯи он менигаранд ва дар вуҷудашон ифтихори ватандорӣ дучанд эҳсос мешавад. Аз ин рӯ Пешвои муаззами миллат таъкид намудаанд, ки «Ба шарофати Истиқлолияти давлатӣ тоҷикон соҳиби Парчами миллӣ, яъне таҷассумгари гузаштаи шоён ва ояндаи дурахшони тоҷикон гардиданд. Дар ҷаҳони муосир доштани Парчами миллӣ ин нишони Истиқлолият, яке аз рамзҳои асосии давлатдорӣ ва ваҳдати миллӣ мебошад, яъне давлати муосир тавассути парчами он муаррифӣ мегардад».

Таҷлили Рӯзи Президент дар Гулистон

Дар маркази шаҳр ва шаҳракҳои Гулистон бахшида ба Рӯзи Президенти Ҷумҳурии Тоҷикистон тибқи нақша чорабиниҳои гуногуни фарҳангиву варзишӣ баргузор шуд.

Аз ҷумла, бахшида ба Рӯзи Президенти Ҷумҳурии Тоҷикистон  бо иштироки олимону адибони шинохтаи вилоят санаи 15-уми ноябр соати 10:00 дар толори ШВКД-и шаҳр, санаи  16-уми ноябр соати 10:00 дар осоишгоҳи «Баҳористон», соати 14:00 дар Муассисаи ғайридавлатии коллеҷи тиббӣ бо сокинон, истироҳаткунандагон, омӯзгорону донишҷӯён вохӯриву мулоқотҳо ба роҳ монда шуд.

Рамзи давлатдорӣ ва ҷовидонии миллат

Рӯзи 17-уми ноябри соли 2016 дар қаламрави шаҳри Гулистон Рӯзи ягонаи ахбори сиёсӣ дар мавзӯи «Парчам- рамзи давлатдорӣ ва ҷовидонии миллат».

баргузор гардид. Дар 43 ҷомеаҳои меҳнатии корхонау ташкилот, муассисаву идораҳо бо иштироки кормандон чорабини ҷараён гирифта, дар хониши сиёсӣ тарғиботчиён аз мақомоти иҷроияи ҳокимияти давлатии вилояти Суғд устоди ДДХ ба номи академик Бобоҷон Ғафуров Нуралӣ Нурзод ва шоира, сарвари осорхонаи адибони вилоят Муаттар Ғаниева ва тарғиботчиёни маҳаллӣ баромад карда, роҷеъ ба рамзи давлатӣ, таърихи парчамдории тоҷикон, Низомномаи Парчами давлатии Тоҷикистон ва монанди ин суханронӣ намуданд.