Дасторхони идона дар “Манижа”

Бо дастгирии мақомоти иҷроияи ҳокимияти давлатии шаҳр ва ибтикори вакили Маҷлиси вакилони халқи шаҳр Турсуной Зокирова дар тарабхонаи «Манижа» барои 150 нафар кўдакон аз оилаҳои ниёзманд дасторхони идона густурда шуд.

Мудири шуъбаи рушди иҷтимоӣ ва робита бо ҷомеа Илҳом Мадализода номаи табрикотии Раиси шаҳри Гулистон Матлубахон Амонзодаро манзури ҳозирин намуд. Дар охир ба кўдакон аз номи Бунёди шафқати Турсуной Зокирова туҳфаҳои идона супорида шуданд. Санъаткорони бахши фарҳанг барои бачаҳо консертӣ идона манзур карданд.

Марафони дучархаҳо дар Сирдарё

Ба ифтихори Рўзи байналмилалии ҳифзи кўдакон бо иштироки беш аз 60 нафар кўдакон марафони дучархаронҳо баргузор гардид.

Дар шаҳрак инчунин озмуни «Расми беҳтарин дар рўи мумфарш», дар боғчаи «Бобуна»-и шаҳрак озмуни шавқовари «Офарин» ба вуқўъ пайвастанд.

Ҳамоиш дар “Баҳористон”

Дар толори Осоишгоҳи «Баҳористон» бо иштироки муовинони директор Гулнора Ғафурова, Раҳмат Раҷабов, ҳуқуқшинос Карим Кабиров бахшида ба 10-солагии қабули Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» ҳамоиш бо иштироки васеи ҷомеаи меҳнатӣ баргузор гардид.

Мудири шуъбаи рушди иҷтимоӣ ва робита бо ҷомеаи дастгоҳи Раиси шаҳри Гулистон Илҳом Мадализода дар мавзўи «Санади судбахши миллӣ» маърўза намуд.

Бачаҳо – ояндаи мо

Дар Китобхонаи бачагонаи шаҳр бо иштироки хонандагон ва омўзгорон конференсия бахшида ба Рўзи байналмилалии ҳифзи кўдакон дар мавзўи «Бачаҳо – ояндаи мо» гузаронида шуд.

Дар он китобдорон доир ба таърихи Рўзи байналмилалии кўдакон маълумот дода, омўзгорон Р.Нишонова, Б.Шарифова, Ш.Қодирова доир ба ин мавзўъ баромад намуданд. Дар толор намоиши китобҳо таҳти унвони «Аз хандаи шумоён гулзор зиндагонӣ» ташкил карда шуд.