ИДИ КӮДАКОН ДАР «ЗАРДОЛУЗОР»

Дар Боғи фарҳангӣ-фароғатии навбунёди «Зардолузор»-и шаҳр бо иштироки Раиси шаҳри Гулистон Фирдавс Шарифзода таҷлили Рӯзи байналхалқии ҳифзи кӯдакон баргузор гардид.

Дастпарварони муассисаҳои томактабии «Парасту», «Офтобак», «Суғдиён» ва «Ситора» дар намоишгоҳҳои идона намунаи ҳунарҳои дастони пурэъҷози худро гузошта,  бо рақсу сурудҳои дилнишин ва саҳначаҳои ҷолибу ҷаззоб ба таҷлили худ ҳусну шаҳомати хосса бахшида, шодиву сурури даврони истиқлолияти давлатӣ намуданд. Махсусан, саҳначаҳои ҷолиби дастпарварони кӯдакистони «Офтобак» «Роғун месозем», намоишномаи «Ватанам Тоҷикистон»-и боғчаи «Ситора», саҳначаи ҷолиби «Хӯрокпазӣ»-и дастпарварони кӯдакистони «Суғдиён» ва намоишномаи дастпараврони боғчаи «Парасту» ба ҳозирин хеле писанд омада,  ба ҳунару санъати онҳо сокинон кафкӯбиҳои пурмавҷ намуданд.

Табрикоти Раиси шаҳри Гулистон Фирдавс Шарифзода ба ифтихори Рӯзи байналхалқии ҳифзи ҳуқуқи кӯдак

Кӯдакону  наврасони азиз!

Боиси ифтихор аст, ки таҷлили Рӯзи кӯдакон дар сарзамини соҳибистиқлоли мо сол аз сол шукӯҳу шаҳомат гирифта, он ба иди умумихалқӣ табдил ёфтааст.

Ғамхорӣ дар ҳаққи кӯдакон барои амалишавии орзуву умедҳои онҳо, дастгирии бачаҳои эҳтиёҷманд, бахусус ятиму бепарастор, дар мадди назар доштани  вазъи ҳаёти кӯдакон яке аз самтҳои муҳими фаъолияти мақомоти иҷроияи ҳокимияти давлатии шаҳр ба ҳисоб меравад.

Тибқи дастуру супоришҳо ва ҳидоятҳои ояндасози Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон дар шаҳру навоҳии кишварамон садҳо боғчаҳои бачагона, муассисаҳои томактабӣ, ҳазорҳо муассисаҳои таълимии миёна ва умумӣ, омӯзишгоҳу ҳунаристонҳо, даҳҳо мактабҳои олӣ ба таълиму тарбияи насли наврас ва ҷавон машғуланд.

Имрӯз бо итминон метавон гуфт, ки савияи дониш ва малакаву истеъдоди насли наврас дар қиёс бо солҳои пешин ба маротиб афзоиш ёфта, дастовардҳои наврасону ҷавонон дар соҳаи илм, санъат ва варзиш назаррас аст.

ФЕСТИВАЛИ ШАҲРИИ «АТЛАСУ АДРАС»

Масъалаи баланд бардоштани мақоми зан дар ҷомеа, эҳёи анъанаву ҳунарҳои миллӣ ва меҳнати хонагии занону духтарон, беҳгардонии вазъи иқтисодию иҷтимоии аҳолӣ, таъсиси ҷойи корӣ барои занону духтарон ва ба касбомӯзию шуғли доимӣ фаро гирифта шудани онҳо дар меҳвари сиёсати имрӯзаи Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дода шуда, эҳё ва тарғиби ҳунарҳои миллӣ, аз ҷумла атласу адрасбофии дастӣ, фарҳанги моддӣ ва рӯзгордории халқи тоҷик, қисми таркибии ташаккули ҳисси ватандӯстӣ, ифтихор аз гузаштагон мебошад.

Бо ин мақсад дар Кохи фарҳангии “Истиқлол”-и шаҳри Гулистон Фестивали шаҳрии «Атласу адрас» баргузор гардид. Фестивал аз рӯи шартҳои беҳтарин либоси кӯдакона, беҳтарин либоси расмӣ ва рӯзмарра, беҳтарин либоси идона, инчунин бо дарназардошти намуди эстетикӣ ва дизайни либос, нотакрорӣ ва ғайримуқаррарӣ, ҳалли тобиш ва обуранг, истифодаи ҳунарҳои гулдӯзии дастӣ ва қуроқдӯзӣ, интихоби ашёҳои ороишӣ, пардоз ҷараён гирифт. Дар фестивал намояндагони ҷамоати шаҳракҳо ва марказҳои атласу адрасбофӣ, ҳамзамон ҳунармандони маҳаллӣ фаъолона иштирок намуданд.

МУҚОВИМАТ БО КОРРУПСИЯ

Дар толори бахши муҳити зисти шаҳри Гулистон тибқи ҷадвали тасдиқшудаи Раёсати Агентии давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд, бо мақсади пешгирӣ намудани содиршавии ҷиноятҳои коррупсионӣ ва иқтисодии хусусияти коррупсионидошта дар байни кормандони касбу кори гуногун мизи мудаввар дар мавзӯи “Мубориза бар зидди коррупсия – вазифаи аҳли ҷомеа” баргузор гардид.

Семинарро бо суханони ифтитоҳӣ муовини Раиси шаҳри Гулистон Ғайрат Оқилзода кушод. Зикр гардид, ки муаммои коррупсия дар айни замон яке аз масъалаҳои мубрами рӯз ба шумор рафта, муаммои ҳамарӯзаву ҷаҳонӣ гаштааст. Ҳадаф аз баргузории семинари мазкур – пешгирӣ намудани омилҳои коррупсионӣ ва сабабу омилҳое, ки ба қонуншикании коррупсионӣ оварда мерасонад.