ТАМРИНИ МУДОФИАИ ГРАЖДАНИИ ҚОЛИНБОФОН

Тибқи нақшаи чорабиниҳои асосии шаҳри Гулистон оид ба масъалањои мудофиаи гражданӣ, пешгирӣ, эътино ва рафъи оқибатҳои ҳолатҳои фавқулода бо мақсади санҷида баромадани сатҳи омодагӣ, маҳорату малака ва сатҳи касбии ҳайати роҳбарикунанда, неруҳои ғайриҳарбии мудофиаи гражданӣ, такмили малакаи мустақилона амал намудан дар ҳама гуна вазъият, машқи фармондеҳӣ-ситодии мудофиаи гражданӣ дар мавзӯи «Амали ҳайати роҳбарикунанда, қувва ва воситаҳои мудофиаи граждании ҶСК «Қолинҳои Қайроққум» ҳангоми рух додани ҳолатҳои фавқулода (заминларза) ташкил ва гузаронида шуд.

Тамрин дар се давра:«Хабардоркунӣ ва ҷамъшавӣ», «Иҷрои корҳои амалии наҷотдиҳӣ ва дигар корҳои таъхирнопазир» ва «Таҳлил ва ҷамъбасти машқ» ба вуқӯъ пайваст. Қолинбофон дар раванди машқи мудофтиаи гражданӣ маҳорату малакаи хуб ва омодагии хешро дар вазъияти фавқулодаи ба амаломада нишон доданд.

ҶАВОНДУХТАРИ ҲУНАРМАНД

Дар толори бахши фарҳанги шаҳри Гулистон ба ифтихори эълони “Солҳои рушди деҳот, сайёҳӣ ва ҳунаҳои мардумӣ” озмуни шаҳрии “Ҷавондухтари ҳунарманд” ташкил ва баргузор гардид. Дар озмун ҷавондухтарон аз маркази шаҳр ва ҷамоати шаҳракҳои Адрасмон, Сирдарё ва Чоруқдаррон иштирок намуданд. Ҷавондухтарони ҳунарманди гулистонӣ аз рӯи шартҳои пухтани навъи гуногуни нон, омодасозии таоми миллӣ ва намоиши маҳорат ва малакаи ҳунармандӣ, аз қабили дӯзандагӣ, қолинбофӣ, зардӯзӣ, гулдӯзӣ, атласбофӣ ва монанди ин байни ҳам қувва озмуданд.

Дар ҷамъбасти озмун ҷойи якум ба ҷавондухтари ҳунарманди ҷамоати шаҳраки Сирдарё Адиба Бобоҷонова насиб гардида, мавсуф ҳамзамон роҳхатро ба озмуни вилоятӣ гирифт. Ҷойи дуюм ва сеюм мутаносибан насиби ҷавондухтарони ҳунарманд аз шаҳраки Чоруқдаррон Майрамой Абдуқодирова ва намояндаи шаҳраки Адрасмон Зуҳро Бобоева гардид.

Мулоқоти Пешвои миллат Эмомалӣ Раҳмон бо Роҳбари ҳайати Хазинаи Байналмилалии Асъор хонум Падамжа Хандевал

Имрӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Роҳбари ҳайати Хазинаи Байналмилалии Асъор хонум Падамжа Хандевалро ба ҳузур пазируфтанд.

Дар мулоқот вазъ ва дурнамои ҳамкории молиявии дуҷониба доир ба Барномаи ояндаи байни Ҳукумати Ҷумҳурии Тоҷикистон ва Хазина дар доираи “Механизми васеи қарздиҳӣ” баррасӣ гардид.

Ҷонибҳо ҳамкории Тоҷикистон ва Хазинаи Байналмилалии Асъорро мусбат арзёбӣ намуда, зикр карданд, ки дар натиҷаи татбиқи ислоҳот ва ҳамкории судманд бо шарикони рушд, аз ҷумла Хазинаи Байналмилалии Асъор тайи солҳои охир фазои соҳибкориву сармоягузорӣ дар Тоҷикистон беҳтар гардида, барои ҷалби сармояи хориҷӣ ҳамаи заминаҳои зарурӣ фароҳам оварда шудаанд.

МАТБУОТ – ОИНАИ ҶОМЕА

Дар толори хурди мақомоти иҷроияи ҳокимияти давлатии шаҳр ба ифтихори Рӯзи матбуоти тоҷик бо иштироки иҷрокунандаи вазифаи Раиси шаҳри Гулистон Фирдавс Шарифзода ҷамъомади ботантана доир гардид. Дар он кормандони рӯзномаи расмии шаҳри Гулистон - нашрия мақомоти иҷроияи ҳокимияти давлатии шаҳр “Соҳил”, кормандони васоити ахбори оммаи вилояту ҷумҳурӣ ва кормандони матбаа, ки бо мақомоти иҷроияи ҳокимияти давлатии шаҳр ҳамкории тарафайни судманд доранд, ширкат варзиданд.

Дар ибтидо иҷрокунандаи вазифаи Раиси шаҳри Гулистон Фирдавс Шарифзода рӯзноманигоронро бо таҷлили иди касбиашон шодбош намуд. Тазаккур гардид, ки дар раванди муносибатҳои сиёсии ҷомеа воситаҳои ахбори омма, ки яке аз институтҳои сиёсии ҷомеаи муосир ба шумор меравад, нақши барҷаста дорад. Инкишофи шуури ҷамъиятро бе иштироки фаъолонаи онҳо тасаввур кардан ғайриимкон аст. Аз худ намудан ва таҳлилу тарғиби фаъолияти сохторҳои ҷомеа фақат ба воситаи онҳо имконпазир мебошад.