7 НАФАР АЗ ШАҲРИ ГУЛИСТОН ҒОЛИБИ ДАВРИ ВИЛОЯТИИ ОЗМУНИ ҶУМҲУРИЯВИИ “ТОҶИКИСТОН – ВАТАНИ АЗИЗИ МАН” ГАРДИДАНД

Ҷиҳати иҷрои Амри Президенти Ҷумҳурии тоҷикистон аз 2 январи соли 2025 №АП-711, қарори Раиси вилоят аз 20.02.2025, №51 “Дар бораи ташкил ва  гузаронидани даври вилоятии озмуни ҷумҳуриявии “Тоҷикистон – Ватани азизи ман”  дар шаҳри Хуҷанд даври вилоятии озмуни ҷумҳуриявии “Тоҷикистон – Ватани азизи ман”  бо мақсади дарёфти истеъдодҳои нав дар соҳаи санъати мусиқӣ ва сарояндагӣ, тасвирӣ ва дизайн, баланд бардоштани маҳорати касбӣ ва зебоишиносӣ, тақвият бахшидан ба ҳунари баланди иҷрокунандагӣ, таблиғ ва эҳёи ҳунарҳои мардумӣ, муаррифии фарҳанги волои миллати тоҷик, эҳтиром ва арҷгузорӣ ба суннатҳои неки аҷдодӣ, сатҳи касбии асарҳои нави мусиқӣ, офарандагӣ, интихоби намунаҳои беҳтарини оҳангу суруд, коллексияҳо ва асарҳои рассомӣ, ки инъикоскунандаи фарҳанги гузашта ва имрӯзаи миллати тоҷикро таҷассум менмоянд баргузор гардид.

Дар даври вилоятии озмуни мазкур аз шаҳри Гулистон беш аз 30 нафар ғолибони даври шаҳрӣ иштирок намуда, соҳиби 1 ҷойи аввал, 3 ҷойи дуюм ва 3 ҷойи сеюм ва дар маҷмуъ 7 ҷой гардида, ба даври ниҳоии озмун роҳхат грифтанд. Аз ҷумла:  Зуҳрои Шералӣ номинатсияи санъати тасвирӣ, жанри ороиши амалӣ, миёни синну соли аз 18 то 35 сола – ҷойи аввал, Бурҳонзода Озода - номинатсияи навозандагӣ, жанри  анъанавӣ, зинаи синну соли аз 12 то 17 сола – ҷойи дуюм, Холбоев Зокир - номинатсияи сарояндагӣ, жанри анъанавӣ миёни синну соли аз 18 то 35 сола – ҷойи дуюм, Усмонов Паҳлавон - номинатсияи сарояндагӣ, жанри эстрадӣ миёни синну соли аз 18 то 35 сола – ҷойи дуюм, Қурбонова Афсона - номинатсияи сарояндагӣ, жанри эстрадӣ, синну соли аз 12 то 17 сола – ҷойи сеюм, Сатторов Ҷалолиддин, номинатсияи навозандагӣ, жанри эстрадӣ, синну соли аз 12 то 17 сола – ҷойи сеюм ва Фархунда Эркаева - номинатсияи санъати тасвирӣ, жанри ороиши амалӣ зинаи синну соли аз 18 то 35 сола – ҷойи сеюм. Ғолибон бо диплом ва туҳфаҳои молии Мақомоти иҷроияи ҳокимияти давлатии вилояти Суғд қадрдонӣ карда шуданд.

БАРГУЗОРИИ ШУРОИ ҲАМОҲАНГСОЗИИ МУБОРИЗА БАР ЗИДДИ БЕМОРИҲОИ ПАЙДОШУДАИ НОРАСОИИ МАСУНИЯТ, СИЛ ВА ВАРАҶА

Имрӯз, 20.06.2025 дар толори бахши ҳифзи муҳити зисти шаҳр таҳти роҳбарии муовини раиси шаҳри Гулистон, раиси Шуро Муслимахон Ҷамолиён Шурои ҳамоҳангсозии мубориза бар зидди бемориҳои пайдошудаи норасоии масуният, сил ва вараҷа бо иштироки аъзои Шуро ва кормандони соҳаи тандурустӣ баргузор гардид.

Маврид ба зикр аст,  ки вируси норасоии масунияти одам ва бемории пайдошудаи норасоии масуният (ВНМО/БПНМ) дар давоми 40 соли охир ба яке аз мушкилоти асосии аҳли сайёра табдил ёфтааст ва Ҷумҳурии Тоҷикистон низ ҳамчун як ҷузъи ҷудонашавандаи ҷомеаи ҷаҳонӣ дар ҳалли ин мушкилот бетараф нест. Эпидемияи ВНМО на танҳо ба системаи тандурустии кишварҳо, балки ба иқтисодиёти давлатҳо низ таъсири манфии худро мерасонад.

Ҷумҳурии Тоҷикистон дар фаъолияти хеш оиди пешгирӣ ва мубориза ба эпидемияи ВНМО, ҳуҷҷатҳои муҳими Ассамблеяи Генералии Созмони Милали Муттаҳидро, ки ба пурзӯр намудани фаъолият баҳри барҳам додани эпидемияи ВНМО то соли 2030 дар ҷаҳон равона гардидаанд ва яке аз бахшҳои муҳим дар чорчубаи расидан ба Ҳадафҳои Рушди Устувор мебошанд, ҳамаҷониба эътироф намуда, дастгирӣ менамояд.

Хабари Маркази робитаҳои ҷамъиятии Раёсати КДАМ ҶТ дар ВМКБ

Маркази робитаҳои ҷамъиятии Раёсати Кумитаи давлатии амнияти миллии ҶТ дар ВМКБ хабар медиҳад, ки 12-уми апрели соли ҷорӣ дар натиҷаи гузаронидани чорабиниҳои оперативӣ-ҷустуҷӯӣ аз ҷониби кормандони Раёсати КДАМ дар ВМКБ айбдоршаванда Султоншоев Хуршедшо Мамадасанхонович, соли таваллудаш 1984, сокини шаҳри Хоруғ, маҳаллаи “Хоруғи боло”, кӯчаи М.Иҷубов, хонаи 73, ки қаблан соли 2010 бо моддаи 200-и КҶ ҶТ барои муомилоти ғайриқонунии воситаҳои нашъадор ба муҳлати 9 сол аз озодӣ маҳрум гардида буд, дастгир карда шуд.

Зимни амалиёти дастгиркунӣ аз айбдоршаванда Султоншоев Х.М. 1-адад норинҷаки ҷангии РГД-5 ва миқдори муайяни воситаи нашъадор, инчунин ҳабҳои “экстазӣ” дарёф ва мусодира карда шуд.
Бояд зикр намуд, ки нисбати айбдоршаванда 9-уми ноябри соли 2020 аз ҷониби Прокуратураи ВМКБ бо дастрасии моддаҳои 237, қисми 3 (авбошӣ дар ҳайати гурӯҳӣ), 328, қисми 1 (истифодаи зӯроварӣ ба муқобили намояндаи ҳокимият) ва 330, қисми 1 (таҳқири намояндаи ҳокимият)-и Кодекси ҷиноятии Ҷумҳурии Тоҷикистон парвандаи ҷиноятии №61178 оғоз карда шуда, номбурда расман дар кофтуков қарор дошт.
Султоншоев Х.М. рӯзи 4-уми ноябри соли 2020 бо ҳамроҳии се нафар айбдоршавандагони расман дар ҷустуҷӯ қарордошта - Шабонов Ҷамшед Шокирҷонович, Зикилобеков Сино Файзалибекович ва Ақназаров Ақназар Алиназарович тавассути автомашинаи сабукрави тамғаи “Тайота”, бо аломати қайди давлатии 0005АА04 ба дидбонгоҳи доимоамалкунандаи БДА дар деҳаи Бидурди ноҳияи Шуғнон ҳозир шуда, нисбати кормандони милитсия, ки вазифаҳои хизматии худро иҷро менамуданд, дашному ҳақоратҳои қабеҳ намуда, аз ҷойи ҳодиса ғайб мезанад.
Дар баробари ин, нисбати дастгиршуда Султоншоев Хуршедшо Мамадасанхонович 6-уми апрели соли 2020 аз ҷониби ВКД ҶТ бо дастрасии моддаи 200, қисми 3-и Кодекси ҷиноятии ҶТ барои даст доштан ба хариду фурӯши воситаҳои нашъадор парвандаи ҷиноятии №38555 оғоз гардида, охирин аз 24-уми феврали соли 2021 дар ҷустуҷӯи расмӣ қарор дошт.
Бояд таъкид намуд, ки аз ҷониби Прокуратураи ВМКБ ба Султоншоев Х.М. якчанд маротиба барои ҳозир шудан ба пурсиш расман даъватнома фиристода шудааст. Вале номбурда аз даъват ба мақомотҳои ҳифзи ҳуқуқ барқасдона саркашӣ намудааст.
Нисбати дастгиршуда Султоншоев Х.М. дар Прокуратураи ВМКБ ҳаракатҳои тафтишотӣ идома дорад.

"ГУЛИСТОН" БАР "ТЕМУРМАЛИК" БО ҲИСОБИ БУЗУРГИ 5-0 ҒОЛИБ ОМАД

Санаи 18.06.2025 Клуби футболи "Гулистон"-и шаҳри Гулистон дар доираи даври ҳаштуми Лигаи дуюми Чемпионати Тоҷикистон оид ба футбол дар минтақаи Суғд КФ "Темурмалик"-и шаҳри Хуҷандро дар майдони худ қабул намуд.

Бозигарони дастаи "Гулистон" аз оғоз ташаббусро ба даст гирифта, пайваста ба ҳариф фишор меоварданд. Натиҷаи ҳамин ҳуҷумҳои пайиҳам буд, ки дар қисми аввали бозӣ се маротиба хати дарвозаи меҳмононро рахна намуданд.

Дар қисми дуюми дидор гулистониён ҳамоно бо фишороварӣ ва ҳуҷумҳои пайваста тавонистанд, ки 2 маротибаи дигар тубро ба тури дарвозаи ҳариф равона созанд.