БОЗДИД АЗ ИНШООТИ НАВБУНЁД

Дар доираи нақша чорабинии мақомоти иҷроияи ҳокимияти давлатии шаҳри Гулистон Раиси шаҳри Гулистон Бахтиёр Саидаҳмадзода якҷоя бо ҳайати корӣ бо вазъи имрӯзаи корҳои ободонї ва хуррамгардонии маркази шаҳр шинос гардид.

Нахуст Раиси шаҳр аз Майдони Парчами давлатии Ҷумҳурии Тоҷикистон дидан намуда, доир ба ободонӣ, танзими дарахтон, гирду атрофи он, шинонидани гулҳо ва кабудизоркунии он ба масъулин супоришҳо дод.

Доир ба таҷдид ва азнавсозии даромадгоҳи ғарбии шаҳр Раиси шаҳр Бахтиёр Саидаҳмадзода оид ба ободонии  ду шафати шоҳроҳи Гулистон-Хуҷанд бо масъулин суҳбат карда,  аз рафти бунёди роҳи пиёдагарди шафати шоҳроҳ, ки дар масофаи 7 километр бунёд гардида истодааст, дидан намуд.

МУҲОФИЗ ВА СИПАРИ БОЭЪТИМОДИ ВАТАН

Дар Кохи фарҳангии “Истиқлол”-и шаҳри Гулистон ба муносибати 28-умин солгарди Рӯзи таъсиси Қувваҳои мусаллаҳи Ҷумҳурии Тоҷикистон ҷамъомади ботантана бо иштироки собиқадорон, ҷанговарони интернатсионалист, муҳофизони сохти конститутсионӣ, афсарону сарбозони қисмҳои ҳарбии дар ҳудуди шаҳр буда, намояндагони ҷамоати шаҳракҳо ва дигар фаъолони соҳаҳои хоҷагии халқи шаҳр доир гардид.

Раиси шаҳри Гулистон Бахтиёр Саидаҳмадзода гулистониёнро бо Рӯзи таъсиси Қувваҳои мусаллаҳ шодбош намуд. Зикр гардид, ки таҳти сарварии хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ташкил ва ба вуҷуд овардани заминаи сиёсиву ҳуқуқии сохтори ҳарбии ҷумҳурӣ муваффақ шудем. Маҳз туфайли ѓамхории пайвастаи Пешвои муаззами миллат, Сарфармондеҳи Қувваҳои Мусаллаҳ имрӯз Артиши миллии мо ба қувва ва сипари боэътимоди муҳофизкунанда табдил ёфтааст. Дар муддати 28 соли гузашта, ба дӯши хизматчиёни ҳарбии ҳамаи сохторҳои низомии мамлакат иҷрои вазифаҳое гузошта шуда буданд, ки тақдири миллат ва давлат, дастовардҳои истиқлолият аз ҳалли онҳо вобаста буд.

ЧАКОМАИ ГЕСӮ

Дар Кохи фарҳангии “Истиқлол” фестивал-озмуни шаҳрии “Чакомаи гесӯ” гузаронида шуд. Дар он аз рӯи чор номинатсия: ороиш ва мӯйбофии қадима, ороиши мӯй дар мавзӯи “Олами афсона”, ороиш ва мӯйбофии замони муосир ва намоиши гесӯи дарозтарин бонувону духтарони гесӯдароз ширкат варзиданд. Мақсади баргузории Фестивал тақвияти муаррифии сарулибоси миллӣ, ороишу парвариши мӯй, ҳунари волои машшотаҳо ва ба ин васила дар доираи расму оинҳои миллӣ, тарғибу ташвиқи маросимҳои анъанавии арӯсбарон, мӯйбофию зулфандозӣ, ҷамолакбандию кокулбофӣ ва намоиши гесӯи дароз, суруду рақс, таронаҳои мардумӣ, бадеҳахонӣ ва эҳёи эҷодиёти даҳонии халқ буд.

Дар фестивал-озмуни шаҳрии “Чакомаи гесӯ” зиёда аз 80 нафар хонандагони муассисаҳои томактабӣ, муҳассилини муассисаҳои таълимӣ ва занону духтарони шаҳр иштирок намуданд. Дар натиҷа дар номинатсияи “Ороиш ва мӯйбофии қадима” Солеҳа Саидмуродова, Моҳира Худоёрова ва Шаҳноза Қурбонзода, дар номинатсияи “Ороиши мӯй дар мавзӯи «Олами афсона» Шукрия Одибоева, Шаҳзода Ҷалилзода, Моҳзода Раҳимова, дар номинатсияи “Ороиш ва мӯйбофии замони муосир” Мубина Султонова, Мафтуна Аминова, Ширина Ҳоҷиматова ва дар номинатсияи “Намоиш гесӯи дарозтарин” Алямира Музаффарова, Сабрина Носирова ва Шабнам Ҷумаева ғолиб гардиданд. Ғолибони фестивал-озмун ва иштирокчиёни фаъол бо туҳфа, диплом ва сипосномаҳои мақомоти иҷроияи ҳокимияти давлатии шаҳр қадрдонӣ гардиданд.

Амри Президенти Ҷумҳурии Тоҷикистон дар бораи озмуни ҷумҳуриявии «Тоҷикистон-Ватани азизи ман» дар соли 2021

АМРИ
ПРЕЗИДЕНТИ ҶУМҲУРИИ ТОҶИКИСТОН

1. Бо мақсади сазовор истиқбол гирифтани ҷашни 30-солагии Истиқлолияти давлатии Ҷумҳурии Тоҷикистон, озмуни ҷумҳуриявии «Тоҷикистон-Ватани азизи ман» дар соли 2021 баргузор карда шавад.

2. Низомнома, ҳайати комиссия ва ҷоизаҳои озмуни ҷумҳуриявии «Тоҷикистон-Ватани азизи ман» тасдиқ карда шаванд (замимаҳои 1, 2 ва 3).
3. Вазоратҳои фарҳанг, маориф ва илми Ҷумҳурии Тоҷикистон, кумитаҳои телевизион ва радио, кор бо ҷавонон ва варзиш, кор бо занон ва оилаи назди Ҳукумати Ҷумҳурии Тоҷикистон барои дар сатҳи баланд доир гардидани озмун тадбир андешанд.
4. Мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳои Суғд, Хатлон, шаҳри Душанбе, шаҳру ноҳияҳо иҷрои талаботи амри мазкурро таъмин намуда, барои ҷалби бештари дӯстдорони санъату мусиқӣ ҷораҷӯӣ карда, ғолибони даврҳои якум, дуюм ва омӯзгорони онҳоро бо мукофотҳои моддӣ ва маънавӣ қадрдонӣ намоянд.
5. Вазорати молияи Ҷумҳурии Тоҷикистон аз ҳисоби маблағҳои фонди захиравии Президенти Ҷумҳурии Тоҷикистон, ки барои соли 2021 пешбинӣ гардидаанд, ба Дастгоҳи иҷроияи Президенти Ҷумҳурии Тоҷикистон ҷиҳати амалӣ кардани чорабинии мазкур 2 540 000 (ду миллиону панҷсаду чил ҳазор) сомонӣ ба таври нақд ҷудо намояд.