Президенти Ҷумҳурии Тоҷикистон Эмомалӣ Раҳмон бо Раиси Ҷумҳурии Мардумии Чин Си Ҷинпин мулоқот намуданд

5 феврал Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Пекин дар ҳошияи маросими ифтитоҳи Бозиҳои зимистонаи олимпӣ бо Раиси Ҷумҳурии Мардумии Чин муҳтарам Си Ҷинпин мулоқот карданд.

Дар мулоқот маҷмӯи васеи масоили ҳамкории ду кишвар мавриди баррасӣ қарор дода шуд.

Президенти мамлакат муҳтарам Эмомалӣ Раҳмон нахуст ба Роҳбари кишвари мизбон барои пазироии самимӣ ва даъват ҷиҳати иштирок дар маросими ифтитоҳи Бозиҳои зимистонаи олимпӣ изҳори сипос карданд.

Сарвари давлат Раиси Ҷумҳурии Мардумии Чинро ба ифтихори баргузории чорабинии бошукуҳи варзишӣ, ҳамчунин фарорасии иди Баҳор ва Соли нави анъанавии мардуми Чин шодбош гуфтанд.

Президенти Ҷумҳурии Тоҷикистон Эмомалӣ Раҳмон дар маросими ифтитоҳи бозиҳои XXIV зимистонаи Олимпӣ иштирок намуданд

Дирӯз дар шаҳри Пекини Ҷумҳурии Мардумии Чин маросими бошукӯҳи ифтитоҳи бозиҳои XXIV зимистонаи Олимпӣ баргузор гардид, ки дар он Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Президенти Кумитаи миллии олимпии кишвар муҳтарам Эмомалӣ Раҳмон иштирок намуданд.

Дар ин маросим роҳбарони давлатҳо ва намояндагони воломақоми зиёда аз 20 кишвар ва созмонҳои минтақавию ҷаҳонӣ иштирок доштанд.

Дар таҳияи ин барнома 4 ҳазор мутахассисони гуногун ва дар паради варзишгарон аз 91 давлати ҷаҳон иштирок намуданд.

Аксияи тозагии соҳил ва тозагии маҳал

Дар минтақаи истироҳатии шаҳри Гулистон бо мақсади ҳифз ва нигаҳдории мавзеъҳои сайёҳӣ, тозаву озода намудани соҳилҳо имруз 4 феврали соли 2022 аксияи тозагии соҳил ва тозагии маҳал  гузаронида шуд. Дар аксияи тозагии соҳил кормандони Мақомоти иҷроияи ҳокимияти давлатии шаҳр, кормандони ҳифзи муҳити зист, омӯзгорону хонандагони муассисаҳои таҳсилоти миёнаи умумии маркази шаҳр ва кормандони соҳаҳои гуногуни хоҷагии халқи Ҷамоати шаҳраки Чоруқдаррон бо теъдоди беш аз 500 нафар фаъолона иштирок намуданд.

Дар раванди баргузории аксияи тозагии соҳил ва тозагии маҳал аз назди Неругоҳи барқӣ обии “Қайроққум” то Маркази таълимии “Бонки миллӣ” шафати роҳи асосӣ, гирду атрофи осоишгоҳҳо ва соҳили “Баҳри тоҷик” аз партовҳо тоза карда шуд. Мавриди зикр аст, ки минтақаи истироҳатии шаҳри Гулистон ва махсусан соҳили “Баҳри тоҷик” яке аз мавзеъҳои ҷолиби сайёҳӣ ба шумор меравад ва ҳамасола теъдоди зиёди меҳмонони дохиливу хориҷӣ барои дидани он меоянд. Баргузории аксияи тозагии соҳил ва тозагии маҳал  имкон медиҳад, ки ҳусну таровати минтақаи истироҳатӣ ва соҳили “Баҳри тоҷик” дилработар гардида, барои ҷалб намудани таваҷҷуҳи сайёҳони дохиливу хориҷӣ имконият фароҳам меорад.

Оғози сафари кории Президенти Ҷумҳурии Тоҷикистон Эмомалӣ Раҳмон дар Ҷумҳурии Мардумии Чин

3 феврал Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шаҳри Пекини Ҷумҳурии Мардумии Чин ташриф оварданд.

Дар фурудгоҳи байналмилалии Пекин меҳмони олиқадр-Президенти мамлакат муҳтарам Эмомалӣ Раҳмонро намояндаи воломақоми Ҳукумати Чин самимона истиқбол гирифт.