НИШАСТИ МАТБУОТӢ

Баҳри иҷрои Амри Президенти Ҷумҳурии Тоҷикистон аз 15-уми сентябри соли 2011 “Дар бораи гузаронидани нишасти матбуотии раисони мақомоти маҳаллии иҷроияи ҳокимияти давлатии шаҳру ноҳияҳо” ва дар асоси Ҷадвали тасдиқшудаи Мақомоти иҷроияи ҳокимияти давлатии вилояти Суғд аз 28-уми январи соли 2022 дар шаҳри Гулистон 15 феврали соли 2022 дар толори хурди мақомоти иҷроияи ҳокимияти давлатии шаҳр нишасти матбуотии иҷрокунандаи вазифаи Раиси шаҳр Ҳошимзода Раъно Ҳошим оид ба Ҷамъбасти фаъолияти соҳаҳои хоҷагии халқи шаҳр дар давоми соли 2021 баргузор гардид.

Ба нишасти матбуотӣ ҳайати дастгоҳи Раиси шаҳр, мудирони шуъбаву бахшҳои мақомоти иҷроияи ҳокимияти давлатии шаҳр, раисони Ҷамоати шаҳракҳо, сарварони корхонаҳо, роҳбарони сохторҳои ташкилоту муассисаҳо ва идораҳои шаҳр даъват гардида буданд.

Дар нишасти матбуотӣ намояндагони воситаҳои ахбори омма аз телевизионҳои Ҷумҳуриявӣ, вилоятӣ, рӯзномаву маҷаллаҳо ширкат доштанд.

Машварати кории назди раиси шаҳр

Имруз 14 феврали соли 2022 дар толори хурди мақомоти иҷроияи ҳокимияти давлатии шаҳр машварати кории назди раиси шаҳр бо роҳбарони ташкилоту корхонаҳо доир гардид.

Дар машварати корӣ масъалаи сатҳи қабули меҳмонони олиқадр дар рӯзҳои 8 ва 9-уми феврал ва мавриди баҳрабардори қарор дода шудани иншоотҳои кӯдакистони “Бобуна” дар шаҳраки Сирдарё, биноҳои КИ ҲХДТ дар шаҳр, Маркази таҳсилоти иловагӣ ва боғи фарҳангию фароғатии Темурмалик баррасӣ гардид.

Аз тарафи Раиси шаҳр   ишора ба омодасозии иншоотҳо ва дар сатҳи талаботҳои этикӣ баргузор шудани қабули меҳмонон баҳои мусбӣ дода шуда, таъкид гардид, ки дар чунин маъракаҳои сиёсӣ на ҳама роҳбарони ташкилоту корхонаҳо ва масъулон иштироки фаъолона доштанд. Зарур шуморида шуд, ки минбаъд ба ин масъалаҳо диққати ҷиддӣ дода шавад.

Сарвари давлат Эмомалӣ Раҳмон дар шаҳри Хуҷанд дар тантанаҳои идона бахшида ба ҷашни Сада иштирок карданд

10 феврал Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар тантанаҳои идона бахшида ба ҷашни Сада дар шаҳри Хуҷанд иштирок карда, аз намоиш ва фурӯши ниҳоли дарахтони мевадиҳанда, сояафкан, гулу буттаҳо ва тухмиҳои босифат боздид ба амал оварданд.

Пешвои миллат муҳтарам Эмомалӣ Раҳмонро дар ҷашнгоҳ сокинони вилоят бо самимияти хосса истиқбол гирифтанд. Гӯшаи аслии намоишгоҳро ба муносибати ҷашни Сада дар шаҳри Хуҷанд ташкили намоиши калони маҳсулоти ҳунармандии хос ба кишту кор ва деҳқониву чорводорӣ, монанди маҳсулоти оҳангарӣ, маҳсулоти деҳқонӣ, бахусус тухмии зироат, меваҳову полезиҳо ва хушкмеваҳои хоси Тоҷикистон ташкил дод.

Дар намоишгоҳ ҳамчунин асал ва маҳсулоти аз асал омодашуда, маҳсулоти нониву қаннодӣ, таомҳои хос ба халқи тоҷик ҷойгир карда шуд. Дар як қисмати ҷашнгоҳ намоиши бошукӯҳи либосу газворҳо ва матоъҳои миллии тоҷикон, аз қабили алоча, бекасаб, атлас, адрас, чит, сатин ва навъҳои дигари ҳунармандӣ, аз қабили зардӯзӣ, гулдӯзӣ, қолинбофӣ, заргарӣ, бурёбофӣ, сабадбофӣ, армуғонсозӣ ва дигар намуди ҳунарҳо ташкил карда шуд. Умуман саҳнаи чорабинии идона ба муносибати ҷашни Сада мувофиқи суннатҳои аҷдодӣ оро дода шуда, дар ду гӯшаи он ба таври сунъӣ оташи баланд, ки хоси ин ҷашни бостонист, афрӯхта шуд. Ҳамаи инро сокинони 18 шаҳру ноҳияи вилояти Суғд ҳамчун рамзи иттиҳоду сарҷамъии миллат ташкил намуданд.

Пешвои миллат Эмомалӣ Раҳмон дар шаҳри Хуҷанд ба 150 ятими кулл туҳфаҳо ва ба шаш оилаи эҳтиёҷманд калиди хонаҳои истиқоматӣ тақдим намуданд

10 феврал Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Хуҷанд ду бинои истиқоматии 9-ошёнаро бо ҷойгиршавии маркази савдо ва тарабхона ба истифода дода, ба 150 ятими кулл туҳфа ва ба шаш оилаи эҳтиёҷманд калиди хонаҳои истиқоматиро дар вазъияти тантанавӣ тақдим намуданд.

Оилаҳое, ки соҳиби манзили замонавии истиқоматӣ гардиданд, асосан дар соҳаҳои илму маориф, тандурустӣ ва ҳифзи иҷтимоӣ ва дигар бахшҳои иқтисоди миллӣ фаъолияти босамар дошта, барои рушди ҷомеа саҳми назаррас доранд. Ин оилаҳо қаблан иҷоранишин буданд ва акнун бо дастгирии бевоситаи Пешвои миллат муҳтарам Эмомалӣ Раҳмон соҳиби манзили истиқоматии шахсӣ гардиданд. Онҳо барои таваҷҷуҳ ва дастгирии бесобиқа ба Президенти Ҷумҳурии Тоҷикистон муҳтарам Эмомалӣ Раҳмон изҳори сипосу миннатдорӣ карданд.

Сарвари давлат ҳангоми супоридани калиди хонаҳои истиқоматӣ ба оилаҳои эҳтиёҷманд иброз намуданд, ки дар сиёсати иҷтимоии Ҳукумати Ҷумҳурии Тоҷикистон дастгирии ятимону бепарасторон, маъюбон ва оилаҳои ниёзманд мавқеи меҳварӣ дошта, ин қишри ҷомеа таҳти таваҷҷуҳи пайваста қарор доранд.