Пешвои миллат Эмомалӣ Раҳмон ҶДММ «Тоҷир пласт»-ро ифтитоҳ намуданд

8 феврал дар ноҳияи Бобоҷон Ғафурови вилояти Суғд Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Ҷамъияти дорои масъулияти маҳдуди “Тоҷир пласт”-ро ифтитоҳ карданд.

Корхонаи нави саноатӣ дар доираи “Солҳои рушди саноат” дар маркази шаҳраки Ғафуров аз ҷониби соҳибкори ватанӣ Ҷамшед Мирхолиқов бунёд гардидааст.

Дар Ҷамъияти дорои масъулияти маҳдуди “Тоҷир пласт”, ки дар раванди татбиқи амалишавии ҳадафи чоруми миллӣ - саноатикунонии босуръати кишвар бунёд шудааст, 25 нафар бо ҷойи кори доимӣ ва маоши хуб таъмин гардид.

Президенти мамлакат Эмомалӣ Раҳмон корхонаи истеҳсоли мехҳои печони ҶДММ «Нуртез»-ро мавриди баҳрабардорӣ қарор доданд

8 феврал сафари кории Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вилояти Суғд аз шаҳри Бӯстон оғоз гардид.

Дар ин шаҳри саноатӣ нахуст бо иштироки Президенти мамлакат муҳтарам Эмомалӣ Раҳмон корхонаи истеҳсоли мехҳои печони Ҷамъияти дорои масъулияти маҳдуди “Нуртез” мавриди баҳрабардорӣ қарор дода шуд.

Корхонаи мазкур дар минтақаи саноатии шаҳри Бӯстон аз ҷониби соҳибкорони ватанӣ — бародарон Акрамовҳо бо харҷи 15,3 миллион сомонӣ сохта шуда, дар ин ҷо зиёда аз 40 намуд мехи печон бо шаклу андозаҳои гуногун, ки имрӯзҳо дар бозори дохилӣ талабот ба он бештар аст, истеҳсол карда мешавад.

Оғози сафари кории Пешвои миллат Эмомалӣ Раҳмон дар вилояти Суғд

8 феврал Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади иштирок дар ҷашни Садаи ниёгон, таъсиси боғу токзори нав, ифтитоҳи якчанд иншооти соҳаҳои маъмурӣ, иҷтимоӣ, корхонаву коргоҳҳои саноатӣ, марказҳои фарҳангию фароғатӣ ва суҳбату мулоқот бо сокинони касбу кори гуногун ба вилояти Суғд ташриф оварданд.

Дар фурудгоҳи байналмилалии Хуҷанд Пешвои миллат муҳтарам Эмомалӣ Раҳмонро раиси вилояти Суғд Раҷаббой Аҳмадзода ва дигар масъулон истиқбол гирифтанд.

Дар шаҳру ноҳияҳои вилояти Суғд корҳои ободонию созандагӣ бо суръат идома дошта, ҷашни аҷдодии Сада бо омодагии комили аҳли ҷомеа, рӯҳияи ифтихору фараҳмандӣ ва иҷрои ҳамаи оину суннатҳояш ҷашн гирифта мешавад.

ТАҚВИЯТИ КОРҲОИ САБЗУ ХУРРАМГАРДОНӢ

Дар шаҳри Гулистон ҷиҳати ободу зебо гардонидани шаҳр ва тозаву озода нигоҳ доштани он, кабудизоркунӣ, тозаву озодакунии гирду атроф ва шафати роҳи асосӣ корҳои ободониву сабзкорӣ ба роҳ монда шуд.

Қайд кардан ба маврид аст, ки дар маъракаи ободонӣ баҳри зебову пурҷило намудани шаҳр дар даромадгоҳи ғарбии шаҳр дар мавзеи гулгаштҳои истироҳатӣ гулҳои ороишии мавсимӣ шинонида шуд. Ҳамчунин рангубори девораҳои муҳофизатӣ ва сафедкунии танаи дарахтон аз ҷониби масъулин анҷом дода шуд.

Масъулини Корхонаи воҳиди давлатии хоҷагии манзилию коммуналии шаҳр нақша доранд, ки ҷиҳати тозаву озода нигоҳ доштани шаҳр ва зебову хуррам гардонидани он пайваста корҳои сабкориву озодагардониро баргузор намоянд.