Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Беларус Александр Лукашенко суҳбати телефонӣ анҷом доданд

Дирӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Беларус муҳтарам Александр Лукашенко суҳбати телефонӣ анҷом доданд.

Дар рафти суҳбати телефонӣ Сарвари давлати мо Александр Лукашенкоро ба муносибати зодрӯзаш самимона табрику муборакбодӣ кард.

Ҷонибҳо ҳамчунин ба муносибати ҷашни 25-солагии истиқрори муносибатҳои дипломатӣ миёни ду давлат, ки ба 5 сентябри соли равон рост меояд, мубодилаи табрикот анҷом доданд.

БОЗДИД АЗ ИНШООТИ ҶАШНӢ

Раиси шаҳри Гулистон Бахтиёр Саидаҳмадзода аз рафти корҳои сабзкориву хуррамгардонӣ ва иншооти ҷашнии ба истиқболи ҷашни 30-солагии Истиқлолияти давлатии Ҷумҳурии Тоҷикистон бунёд гардида истода дар ҳудуди шаҳр боздид намуд. Нахуст Раиси шаҳр Бахтиёр Саидаҳмадзода аз рафти корҳои сабзкориву хуррамгардонӣ дар гулгашти майдони “Нишони давлатӣ” боздид намуд. Баъдан аз рафти сохтмони биноҳои Ҳизби халқии демократии Тоҷикистон дар шаҳр ва бинои Маркази таҳсилоти иловагии назди шуъбаи маорифи шаҳр дидан кард. Зимни боздид, таъкид карда шуд, ки ҷиҳати вусъат додани ҷараёни корҳои сохтмонӣ  ва дар вақти муқаррар гардида ба иҷро расонидани корҳои сохтмонӣ тадбирҳои мушаххас андешида шавад.

Сипас, Раиси шаҳр Бахтиёр Саидаҳмадзода аз рафти таҷдид ва азнавсозии Боғи фарҳангӣ-фароғатии “Темурмалик” дидан намуд. Иттилоъ дода шуд, ки дар иншооти ҷашнии мазкур корҳои таҷдиду азнавсозӣ бо суръат ҷараён дорад.  Ба масъулин ва сохтмончиён ҷиҳати дар вақти муайяншуда ба иҷро расонидани корҳои сохтмонӣ ва азнавсозии Боғи фарҳангӣ-фароғатии “Темурмалик”, ки бо баробари ба истифода додан яке аз мавзеъҳои сайёҳии диққатҷалбкунанда барои меҳмонони дохиливу хориҷӣ мегардад дастуру супоришҳои мушаххас дода шуд.

ҲАР КӢ ХАНДОНАД ЯТИМИ ХАСТАРО….

Ба ифтихори оғози соли нави таҳсил дар толори хурди Мақомоти иҷроияи ҳокимияти давлатии шаҳр мулоқоти Раиси шаҳри Гулистон Бахтиёр Саидаҳмадзода бо мактабиён аз оилаҳои камбизоат баргузор гардид. Дар ибтидо суҳбати самимӣ ва гарму ҷӯшони бачаҳо бо Раиси шаҳр доир шуд. Мактабиён дар бораи орзуву ниятҳои худ, ҷараёни омодагиашон ба соли нави таҳмил сухан ронда, дар васфи Тоҷикистон, ваҳдат ва ҳифзи марзу буми муқаддаси Ватан шеърҳо қироат карданд.

Раиси шаҳр Бахтиёр Саидаҳмадзода доир ба хониши хубу аъло, ахлоқи намунавӣ ва ҷидду ҷаҳди донишандӯзӣ сухан ронда, зикр кард, ки давлат ва Ҳукумати Ҷумҳурии Тоҷикистон дар партави сиёсати фардосози Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тамоми шароитро барои донишандӯзии насли наврас, интихоби касбу кори дилхоҳ, ташаккули ҷисмониву маънавии насли наврас муҳайё намудаанд. Вазифаи асосии насли наврас дар ин раванд хониши хубу аъло ва ҳамчун шахсиятҳои баруманди ҷомеа ба камол расидани онҳо мебошад.

Пешвои миллат Эмомалӣ Раҳмон ба муносибати 30-солагии Истиқлоли давлатӣ лоиҳаи Қонуни Ҷумҳурии Тоҷикистон «Дар бораи авф»-ро ба баррасии Маҷлиси намояндагон пешниҳод карданд

Имрӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо истифода аз ҳуқуқи конститутсионии худ, дар асоси принсипи инсондӯстӣ ва ба муносибати 30-солагии Истиқлоли давлатии Ҷумҳурии Тоҷикистон лоиҳаи Қонуни Ҷумҳурии Тоҷикистон «Дар бораи авф»-ро ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карданд.

Бо мақсади қабули Қонуни мазкур бо фармони Президенти Ҷумҳурии Тоҷикистон иҷлосияи ғайринавбатии Маҷлиси намояндагони Маҷлиси Олии Ҷумҳурии Тоҷикистон рӯзи 6 сентябри соли 2021 даъват карда шуд.

Қонуни авф нисбат ба доираи васеи маҳкумшудагон ва шахсоне, ки парвандаи онҳо таҳти таҳқиқ, тафтишоти пешакӣ ва дар баррасии судӣ қарор доранд, татбиқ мегардад.