Пешгирӣ аз ҳаракатҳои тундраву ифротӣ

30-юми март дар толори МИҲД-и шаҳр ҷаласаи навбатии Шӯрои методӣ оид ба баланд бардоштани маърифати ҳуқуқии шаҳрвандон баргузор гардид. Дар ҷаласа рафти татбиқи Қонунҳои ҶТ “Дар бораи озодии виҷдон”, “Дар бораи масъулияти падару модар дар таълиму тарбияи фарзанд” ва “Дар бораи маориф” мавриди баррасӣ қарор гирифт.

Раиси шаҳри Гулистон Матлубахон Амонзода ҷаласаро оғоз намуда, қаблан сардори нави шуъбаи ВКД ҶТ дар шаҳри Гулистон Хуршед Мирзозодаро ба ҳозирин муаррифӣ кард. Баъдан дар бораи ҳифзи пойдории истиқлолият, ватандӯстӣ, ҳуввияту ваҳдати миллӣ ва ваҳдати содиқона ба давлату миллат ҳарф зад. Таблиғгарони ҷараёнҳои бегона аз сатҳи пасти маърифатнокии сиёсии ҷавонон истифода бурда, таваҷҷуҳи ононро ба худ ҷалб менамоянд. Мазҳабу ҷараёнҳои тундгаро бо фитнаву иғвогарӣ оташи ҷангу ҷидолро барангехта ба пешрафту иқтисодиёти кишварҳо зиён меоранд. Имрӯз дастовардҳои замони истиқлолиятро нодида гирифта ба гирдоби ҷараёнҳои бегона ғӯтавар гардидани бархе шаҳрвандон, бахусус ҷавонон боиси нигаронист, - иброз дошт Раиси шаҳр.

Оғози даъвати баҳории ҷавонон ба сафи Қувваҳои Мусаллаҳ

Қарори Раиси шаҳри Гулистон таҳти №85, аз 29-уми марти соли 2016 дар бораи даъвати шаҳрвандони солҳои таваллудашон 1989-1998 ба хизмати ҳарбӣ дар моҳҳои апрел-майи соли 2016 ба имзо расид.

Тибқи ин қарор шаҳрвандони ҷинси марди то рӯзи даъват ба синни 18 расида, инчунин шаҳрвандони синни калонтар, ки ҳуқуқи ба таъхир андохтани муҳлати даъват ё озод будан аз даъват ба хизмати ҳарбиро надоранд, барои хизмат ба сафи Қувваҳои Мусаллаҳи Ҷумҳурии Тоҷикистон даъват карда мешаванд. Ҳайати комиссияи даъвати баҳорона таъсис дода шудааст. Комиссариати ҳарбии шаҳр вазифадор карда мешавад, ки мутобиқи моддаи 19 Қонуни ҶТ “Дар бораи ӯҳдадории умумии ҳарбӣ ва хизмати ҳарбӣ”, даъвати шаҳрвандонро таъмин намояд.

Фестивали шаҳрии “Либосҳои миллӣ”

Бо ҳадафи тарғиби либоси миллӣ, тарбияи зебоипарастӣ, баланд бардоштани мақому манзалати либоси миллӣ, густариши истифодаи атласу шоҳӣ, санъати алочабофӣ, сӯзанию  адрасбофӣ ва ба ифтихори 25-умин солгарди Истиқлолияти давлатии Ҷумҳурии Тоҷикистон оид ба баргузории Фестивали шаҳрии “Либосҳои миллӣ” дар моҳи апрели соли равон қарори навбатии Раиси шаҳр аз 4-уми марти соли 2016, таҳти №76 ба тасвиб расид.

Кумитаи тадорукот, низомнома ва нақшаи чорабиниҳо тасдиқ шудааст. Барои дар сатҳи баланд ташкил ва гузаронидани Фестивал  шуъбаю бахшҳои масъул ва Ҷамоати шаҳракҳо тибқи қарори мазкур муваззаф гардидаанд.

Ҳамоиши наврӯзӣ ва 20-умин солгарди “Апрелевка”

Тавре маълум аст, ҳеҷ соҳаи хоҷагии халқи олам наметавонад бидуни саноат рушд намояд. Дар кишвари соҳибистиқлоли мо ба ин самт ҳамеша таваҷҷуҳи хоса зоҳир карда мешавад. Саноат яке аз соҳаҳои афзалиятноки мамлакат ба шумор рафта, дар рушди иқтисодиёти ҷумҳурӣ нақши муассир дорад. Яке аз корхонаҳои калонтарини саноатӣ, ки дар давраи соҳибистиқлолӣ бо ноил гардидан ба дастоварду нишондиҳандаҳои рӯзафзун шӯҳратёр гардидааст, ин ҶМ ТКММ “Апрелевка” мебошад.

28-уми марти соли равон дар доираи таҷлили чорабиниҳои Наврӯзи ҷаҳонафрӯз 20-умин солгарди таъсисёбии коргоҳ ҷашн гирифта шуд. Қабл аз оғози ҳамоиш Раиси шаҳри Гулистон Матлубахон Амонзода ва меҳмонон дар даромадгоҳи бинои маъмурии коргоҳ парда аз рӯи лавҳаи рамзии “Маъдани кони “Апрелевка” ба муносибати 20-солагии ҶМ ТКММ “Апрелевка” гузошта шудааст бардоштанд.