Кӯмак ба 100 нафар

Фарҳанги бузурги то исломии миллати мо ва ҳамчунин замони исломӣ тарғибгари ғояҳои эҳсону накӯкорӣ, ҳусни муошират бо аҳли хонадон, муомилаи нек бо ҳамсоягон, мурувват бо дӯстон, дилсӯзию ғамхорӣ ба беморону нотавонон ва ёди хайр аз гузаштагонро талқин мекунанд.

Бо арҷгузорӣ ба суннатҳои зикр гардида Мақомоти иҷроияи ҳокимияти давлатии шаҳр дар арафаи Иди саиди Қурбон хайру эҳсонро самти асосии фаъолияти худ қарор дода, зиёда аз 100 нафар ашхоси ниёзманд ва оилаҳои нодор бо кӯмаки моддӣ фаро гирифта шуданд.

Ду медали тиллоӣ Мария

Аз 12 то 14 сентябр дар шаҳри Истаравшан чемпионати кушоди вилоятӣ оид ба навъи гуштини миллӣ ва камарбандӣ доир шуд.

Дар он аз ҷумҳуриҳои ҳамсояи ӯзбекистон, Қирғизистон ва Қазоқистон  низ варзишгарон иштирок намуданд. Теъдоди умумии варзишгарон зиёда аз 1000 нафар буд. Намояндагони шаҳри мо Мария Седунова аз рӯи вазни хеш бо ҳарифон бартарӣ нишон дода, соҳиби ду медали тилло ва Шоҳида Қушмуродова медали биринҷию туҳфаҳои хотиравиро сазовор гардиданд.

Рӯзи ягонаи ахбор

Забони тоҷикӣ-форсӣ аз зумраи забонҳои маъруфи олам аст, ки бештар аз 100 миллион одам бо он гуфтугӯ мекунад. Ва метавон иброз дошт, ки яке аз забонҳои Созмони Милали Муттаҳид ҳаст. Соли 1989 забони тоҷикӣ ҷойгузини мақоми дарёфт ва ба рисолати ҳақиқии таърихии худ расид…

Чунин буд мӯҳтавои суҳбате, ки 17 сентябр дар Рӯзи ягонаи ахбор ба вуқӯъ омад. Тарғиботчиён Б.Юлдошев, директори Ширкати давлатии суғуртаи вилоят, А.Ҳасанов, доктори илмҳои филологӣ, устоди ДДХ ва М.Бобоева, дотсенти ДД Хуҷанд, ба номи Б.Ғафуров дар мавзӯи «Забони миллат-ҳастии миллат» назди кормандони Маркази саломатӣ ва бахши фарҳанг баромад намуданд. Дар интиҳо маводи «Акси садои хиёнатҳои наҳзатӣ» мавриди мубодилаи афкор сурат гирифт.

Муборакбодии Раиси шаҳри Қайроққум Матлубахон Амонзода бахшида ба Рӯзи Рӯдакӣ

Фарорасии Рӯзи муборак ва фархундаро, ки ба номи қофиласолори адабиёти тоҷику форс-устод Абуабдуллоҳи Рӯдакӣ дар тақвими навини миллати мо аз баракоти соҳибистиқлолии Тоҷикистони азиз сабт шудааст, ба тамоми мардуми шарифи шаҳр самимона таҳният гуфта, бароятон саодати рӯзгор, тавфиқу сарбаландӣ ва дастовардҳои нек таманно менамоям.

Тавре, ки Президенти Ҷумҳурии Тоҷикистон, Ҷаноби Олӣ, муҳтарам Эмомалӣ Раҳмон таъкид намудаанд: «Рӯзи Рӯдакӣ на танҳо иди бургдошти сардафтари адабиёти оламгири тоҷику форс, балки иди мероси адабию илмӣ, фаннӣ ва ахлоқии беш аз ҳазорсолаи тамаддуни миллати мост».