Квота - имтиёз ба таҳсил

Бо мақсади татбиқи қарори Ҳукумати ҶТ аз 2-юми июли соли 2015 таҳти №428 “Дар бораи қабули донишҷӯён ба муассисаҳои таҳсилоти олии ҶТ тибқи квотаи президентӣ барои солҳои 2016-2020” ва дар асоси қарори Раиси шаҳри Гулистон таҳти №84, аз 29-уми марти соли 2016 “Оид ба таъсиси комиссия дар бораи қабули донишҷӯён ба муассисаҳои таҳсилоти олии ҶТ тариқи квотаи Президенти ҶТ барои солҳои 2016-2020” санаи 31-уми марти соли равон дар Маркази  таҳсилоти иловагии шаҳр озмуни қабули хатмкунандагон баргузор гардид.

Дар озмун 70 нафар довталабони тибқи квота таҳсилкунанда фаъолона иштирок намуда, аз онҳо 41 нафарашон барои озмуни даври вилоятӣ пешниҳод шуданд.

Машварати судманд

Семинар – машварати Маркази дарёфт ва рушди истеъдодҳои шуъбаи маориф, ки дар гимназияи ба номи Б.Ғафуров баргузор гардид, бо баромади толибилмон аз қироати шеъру манзумаҳои пурмазмун ифтитоҳ ёфт. Директори Марказ Фахриддин Фатҳиддинов тартиби баргузории семинарро шарҳ дода, сипас дар мавзӯи “Тавзеҳи истилоҳи истеъдод, лаёқат ва маҳорат. Нақши китоб ва худомӯзӣ дар рушди маънавии хонанда ва омилҳои бо он мусоидаткунанда” баромад кард

Баъдан перомуни мавзӯҳои “Нақши равоншинос дар инкишофи зеҳнии хонандагони болаёқат” ва “Истифодаи шабакаи интернет ва аҳамияти он дар рушди истеъдоди наврасон” равоншиноси МТМУ №2 Маниҷа Очиқадамова ва  роҳбари Маркази дарёфт ва рушди истеъдодҳои МТМУ №12 Шоҳид Норматов фикру андешаҳои ҷолиб баён намуданд.

Пирӯзии Ҳаётҷон

Дуюми апрели соли ҷорӣ дар “Маркази Ҷавонон”-и шаҳри Хуҷанд аксия оид ба пешгирии бемории сил ба муносибати “Соли 2016-Соли фарди солим” доир шуд.

Хонандаи синфи 11 “в”, аз МТМУ-и №1 Ҳаётҷон Ахмедов дар навъи навишти иншо ба мавзӯи зикргардида мақоми аввалро соҳиби карда, мукофоти хотиравии таъсисгарони аксия насибаш гардид.

Фестивали ҷумҳуриявии «Ҳафтаи китоби кӯдакону наврасони Тоҷикистон»

Оғози иди китоб

Рӯзи дуюми апрели соли равон толори китобхонаи бачагонаи бахши фарҳанги шаҳр намуди идона дошт. Намоиши китобҳои нав, рӯзномаю маҷаллаҳои тозанашр, дастранҷи кӯдакону наврасон таҳти шиору овезаҳо ва панду ҳикматҳои хирадмандону бузургони сухан дар ситоиши дурдонаи гаронбаҳо – китоб ба оғози ҳафтаи Фестивали китоби кӯдакону наврасон ҳусну шаҳомати тоза бахшид.

Асоси тарғиби китоб ва рӯ овардан ба интишори асарҳои пурмазмуну пурғановати адибони классику муосири форсу тоҷик ин аз мулоқотҳои ҳамасолаи руҳбахшу ҳидояткунандаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бо аҳли зиёи мамлакат дар арафаи Иди Наврӯз ибтидо гирифтаанд.