Роҳҳои ҷалби ҷавонон ба китобхонӣ

Имруз, 7 октябр дар толори хониши китобхонаи марказии шаҳри Қайроққум бо ибтикори Вазорати фарҳанги ҶТ семинари омӯзишӣ минтақавии кормандони китобхонаҳо аз шаҳрҳои Истиқлол, Қайроққум, Чкалов ва ноҳияи Б.Ғафуров барпо гардид.

Директори китобхона Бибиомина Мирзоева семинарро ифтитоҳ намуд. Мудири шуъбаи рушди иҷтимоӣ ва робита бо ҷомеаи дастгоҳи Раиси шаҳр Илҳом Мадализода иштирокдорони ҳамоишро аз номи Матлубахон Амонзода, Раиси шаҳри Қайроққум хайра мақдам гуфта, аз таърихи шаҳр ва фаъолияти корхонаҳои саноатӣ муфассал маълумот дод.

«Забон ҳастии миллат»

5 - уми октябр дар толори хониши китобхонаи системаи марказонидашуда бо чунин унвон маҳфили адабӣ ба ифтихори Рӯзи забони давлатӣ доир гардид.

Дар чорабинӣ намояндагони илму адаб, фарҳанг ва ихлосмандони шеъри Аҷам иштирок доштанд. Директори боргоҳи маърифат Бибиомина Мирзоева оид ба забон ва мавқеи он дар ҷомеа сухан гуфта хидматҳои назарраси Президенти мамлакат Эмомалӣ Раҳмонро дар рушди забони тоҷикӣ таъкид намуд. Назди ҳозирин узви доираи адабии «Илҳом» Рафоат Худойдодова, навқалам аз гимназияи ба номи Б.Ғафуров Умедҷон Ҳоҷиев намунаҳо аз  эҷодиёти хешро қироат карданд. Толибилмони муассисаҳои таълимии маркази шаҳр Усмонбек ва Умарбек  Муллобековҳо, Санавбар Ғаниева вагуруҳи хонандагони суруду саҳначаҳоро манзури ҳузурдоштагон намуданд. Маҳфили «Забон ҳастии миллат» бо саволу ҷавоб ҷамъбаст шуд.

«Корвони китоб»

Тибқи «Барномаи рушди фаъолияти китобдорӣ дар Ҷумҳурии Тоҷикистон барои солҳои 2006-2015» Вазорати фарҳанг «Корвони китоб» таъсис додааст, ки он чанде пеш ба вилояти мо омад.

Дар қатори дигар шаҳру навоҳӣ ба китобхонаҳои шаҳри Қайроққум низ 102 дона китобҳои бадеии тозанашр, 472 дона маҷаллаҳои гуногун, рӯзнома ва дигар маводҳои китобхонавӣ ба миқдори 3920 сомонӣ ройгон тақдим карда шуд.

Ҷоми Федератсияи футболи вилояти Суғд насиби дастаи «Қайроққум»

Барои дарёфти Ҷоми анъанавии Федератсияи футболи вилояти Суғд бозии ниҳоӣ байни дастаҳои «Шаҳристон»-и Шаҳристон ва «Қайроққум»-и Қайроққум дар варзишгоҳи марказии шаҳри Қайроққум рӯзи 5 октябр доир гардид.

Дар дақиқаи сенздаҳум ба ҳамлагари беҳтарини дастаи «Қайроққум» Фаррух Ниязов муяссар гардид, ки бо дарвозабони дастаи меҳмонон як ба як баромада тӯбро вориди дарвоза намояд. Ҳамлагари дастаи «Шаҳристон» Умед Ҳоҷимаҳмадов дар дақиқаи 32-юм ҳисоби бозиро баробар кард. Дар қисми дуюми бозӣ яке аз ҳамлагарони дастаи шаҳри мо Анвар Норқулов дар дақиқаи 75-ум туби навбатиро вориди дарвозаи меҳмонон намуда, пирӯзии футболбозони шаҳри соҳили «Баҳри тоҷик»-ро таъмин кард. Ҳамин тавр, даври ниҳоии мусобиқа ба ҳисоби 2 бар 1 анҷом ёфт.