Шиносоии Раиси вилоят бо рафти корҳои таҷдиду навсозии Неругоҳи барқи обии “Қайроққум”

Имрӯз Раиси вилояти Суғд Раҷаббой Аҳмадзода дар шаҳри Гулистон бо рафти корҳои таҷдиду навсозии Неругоҳи барқи обии “Қайроққум” шинос гардид.

Неругоҳи барқи обии “Қайроққум” дорои шаш агрегат буда, корҳои сохтмонии ин неругоҳ соли 1952 оғоз гардидааст ва агрегати якуми он бо иқтидори 21 мегаватт 15 декабри соли 1956 ба кор дароварда шудааст. Иншооти гидроэнергетикӣ аз 20 ноябри соли 1957 бо иқтидори пурраи 126 мегаватт фаъолият намуда, бо сабаби фаъолияти беш аз нимасра таҷҳизоти неругоҳ кӯҳнаю фарсуда гардида, зарурати таҷдид ва навсозии онҳоро ба миён овард.

Дар асоси дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон айни замон лоиҳаи “Таҷдиди Неругоҳи барқи обии Қайроққум” амалӣ шуда истодааст ва таҷдиди асосии неругоҳ, иншооти ёрирасон ва гидротехникии он марҳила ба марҳила сурат мегирад.

Пешвои миллат Эмомалӣ Раҳмон дар як қатор сохторҳои давлатӣ тағйироти кадрӣ ба амал оварданд

25 ноябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Қасри миллат бо кадрҳое, ки дар мақомоти ҳифзи ҳуқуқу тартибот – суд, прокуратура, Қӯшунҳои сарҳадии Кумитаи давлатии амнияти миллӣ ва дигар сохторҳои давлатӣ ба вазифаҳои роҳбарикунанда таъин гардиданд, мулоқот намуданд.

Бо фармонҳои Президенти мамлакат раисони суди ноҳияҳои Мир Саид Алии Ҳамадонӣ, Шаҳритус ва шаҳри Леваканти вилояти Хатлон, раисони суди шаҳрҳои Хуҷанд, Истаравшан, Конибодом, Гулистон, ноҳияҳои Ашт, Бобоҷон Ғафурови вилояти Суғд, раиси суди ноҳияи Лахш ва судяҳои як қатор шаҳру навоҳии мамлакат бинобар ба анҷом расидани мӯҳлати ваколати дар вазифаи судя будан аз вазифа озод гардида, бо натиҷагирӣ аз фаъолияти хизматӣ ва таъмини адолати судӣ ба вазифаҳои масъултар таъин гардиданд.

МУЖДА: “ГУЛИСТОН” БА ЛИГАИ ЯКУМ РОҲ ЁФТ

Дастаи “Гулистон”-и шаҳри Гулистон ҷиҳати гузаронидани бозиҳо барои дарёфти Лигаи якуми мусобиқоти Тоҷикистон оид ба футбол ба пойтахти кишвар шаҳри Душанбе сафар намуд. Пас аз қуръапартоӣ маълум гардид, ки дастаи “Гулистон” аз минтақаи Суғд бо дастаи “Покиза” аз шаҳри Душанбе ва дастаи “Сарҳадчӣ” аз минтақаи Хатлон бо дастаи “Меҳргон” аз минтақаи Рашт бо ҳам дидор анҷом медиҳанд.

Бозиҳои ниманиҳои имрӯз 25-уми ноябр оғоз гардиданд. Дастаи “Гулистон”-и шаҳри Гулистон ва дастаи "Покиза" аз шаҳри Душанбе андари майдони рақобат гардиданд. Фаъолияти пурзаҳмати яксола, ки дастаҳоро дар митақаҳои худ ғолиб гардонда буд аз ҳамаи бозигарони ҳар ду даста масъулияти зиёдро талаб менамуд. Дастаҳо ба майдон танҳо барои пирӯзӣ ворид гардида буданд. Бозӣ шавқовар ва пурҳаяҷон ҷараён гирифт. Дастаҳо ҳуҷумҳои пайваста намуда, имкон пайдо намуданд, ки хати дарвозаи ҳамдигарро се маротибагӣ рахна намоянд. Ҳаминтавр бо ҳисоби 3-3 дар 90 дақиқаи вақти асосӣ ғолиб муайян нагардид. Барои муайян намудани ғолиб вақти изофагӣ дода шуд. Дар тӯли 30 дақиқаи вақти иловагии дидор бозигарони дастаи “Гулистон” бо кӯшишҳои зиёд дарвозабони ҳарифро маҷбур намуданд, ки ду маротибаи дигар тубро аз дохили тури дарвозааш гирад. Ҳарифон низ имкон пайдо намуда хати дарвозаи дастаи “Гулистон”-ро бори чорум рахна намуданд. Ҳаминтавр бозӣ бо ҳисоби 5-4 ба фоидаи дастаи “Гулистон”-и шаҳри Гулистон ба анҷом расид.

БАХТИЁР САИДАҲМАДЗОДА: Парчами давлатӣ рамзи ваҳдату сарафрозӣ, нишонаи ҳаёти осоишта ва ифтихори миллии ҳар як шаҳрванди Тоҷикистон аст

24 ноябри соли 2021 дар Кохи фарҳанги “Истиқлол”-и шаҳри Гулистон ба муносибати Рӯзи Парчами давлатии Ҷумҳурии Тоҷикистон ҷамъомади тантанавӣ баргузор гардид.

Раиси шаҳр Бахтиёр Саидаҳмадзода иштирокдорони ҷамъомад ва кулли сокинони шаҳрро ба ифтихори Рўзи Парчами давлатӣ, ки ҳамасола ба хотири арҷгузорӣ ба рамзҳои давлатӣ ва бузургдошти оину суннатҳои миллиамон таҷлил мегардад, табрик намуд.

Қайд карда шуд, ки Парчами давлатӣ ҳамчун рамзи муҳими давлати соҳибистиқлол, нишонаи ҳаёти осоишта, ваҳдат, сарафрозӣ ва ифтихори миллии ҳар як шаҳрванди Тоҷикистони соҳибистиқлол, ифодагари иттиҳоду сарҷамъӣ, нангу номус, ватандўстиву ватанпарастӣ ва ҳувияти миллии мардуми фарҳангии мо буда, мақсаду мароми созандаи тоҷиконро дар ҷилои рангҳои худ инъикос намудааст.