Фармони Президенти Ҷумҳурии Тоҷикистон дар бораи зиёд намудани андозаи маоши амалкунандаи вазифавии кормандони раёсати Академияи миллии илмҳои Тоҷикистон ва муассисаҳои тобеи он

ФАРМОНИ
ПРЕЗИДЕНТИ ҶУМҲУРИИ ТОҶИКИСТОН

Дар бораи зиёд намудани андозаи маоши амалкунандаи
вазифавии кормандони раёсати Академияи миллии илмҳои
Тоҷикистон ва муассисаҳои тобеи он

Бо мақсади дастгирии давлатӣ ва тақвияти вазъи иҷтимоии кормандони раёсати Академияи миллии илмҳои Тоҷикистон ва муассисаҳои тобеи он, мутобиқи моддаҳои 147 ва 149 Кодекси меҳнати Ҷумҳурии Тоҷикистон фармон медиҳам:
1. Андозаи маоши амалкунандаи вазифавии кормандони раёсати Академияи миллии илмҳои Тоҷикистон ва муассисаҳои тобеи он аз 1 сентябри соли 2021 мувофиқи замимаҳои 1 ва 2 зиёд карда шавад.
2. Ҳукумати Ҷумҳурии Тоҷикистон дар муҳлати як моҳ санадҳои меъёрии ҳуқуқии дахлдорро ба фармони мазкур мутобиқ намояд.

“ТОҶИКОН” ДАР ГУЛИСТОН

Корвони китоби «Тоҷикон»-и академик Қаҳрамони Тоҷикистон Бобоҷон Ғафуров ба шаҳри Гулистон бо теъдоди беш аз 11,3 ҳазор нусха ворид гардид. Қобили зикр аст, ки теъдоди воридшуда ба ҳар як хоҷагии шаҳр кофӣ мебошад. Аз Ҳукумати ҷумҳурӣ бо роҳбарии Рукмина Сафарзода муовини вазири молияи Ҷумҳурии Тоҷикистон гурӯҳи корӣ ташриф оварда, ҷиҳати ба қайд гирифтан ва ба ҳар оилаи шаҳр расонидани туҳфаи арзишманди Пешвои муаззами миллат ба гурӯҳи кории Мақомоти иҷроияи ҳокимияти давлатии шаҳр ёрии амалӣ расониданд.

Ёдовар мегардем, ки дар Паёми худ ба Маҷлиси Олии Ҷумҳурии Тоҷикистон аз 26 декабри соли 2019, Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Ҳукумати мамлакатро вазифадор намуданд, ки бо мақсади омӯзиши таърихи пурифтихори халқи тоҷик шоҳасари академик Бобоҷон Ғафуров китоби «Тоҷикон»-ро аз ҳисоби Фонди захиравии Президенти Ҷумҳурии Тоҷикистон ба нашр расонида, ба ҳар як оила кишвар тақдим намоянд. Дастрас гардидани ин китоб ба аҳолӣ яке аз иқдомҳои наҷибонаи Пешвои муаззами миллат ба ҳисоб рафта, сокинон низ бо хушнудии зиёд туҳфаи арзишманди Президенти Ҷумҳурии Тоҷикистонро пазируфтанд.

Сафари намояндагони палатаи савдо ва саноати Федератсияи Россия ба Тоҷикистон

Ташрифи намояндагони палатаи савдо ва саноати Федератсияи Россияро ба Тоҷикистон президенти ҳамин ниҳод Сергей Катирин роҳбари мекунад.

Дар ҷараёни ташриф ба вилояти Суғд вохӯрии меҳмонон бо раиси вилояти Суғд Раҷаббой Аҳмадзода 16 сентябр суръат гирифт. Дар маркази таълимии Бонки миллӣ дар шаҳри Гулистон инчунин гуфтушунид ва вохӯриҳо бо як зумра соҳибкорону алоқамандон доир карда шуд.

Ташрифи меҳмоноро раиси вилояти Суғд Раҷаббой Аҳмадзода мантиқи маънидод карда ишора намуд, ки вилояти Суғдро беҳуда “Водии имкониятҳо” наменоманд. Дар ин минитақаи Тоҷикистони азиз таърихии ғании рушди инфрасохтор, мавҷудияти сарватҳои зеризамини, рушди бемайлони соҳаи саноат ва хоҷагии қишлоқ нуҳуфтааст. Вилояти Суғд муносибатҳои фаъоли иқтисодиву савдои худро бо бисёр манотиқи Федератсияи Россия, бо ташкилоту корхонаҳои мушаххас ба роҳ мондааст ва ба ин масъала диққати ҷолиб дорад.

Шоми дӯстӣ ба ифтихори Сарони давлатҳои аъзои СҲШ ва СААД

Шоми дирӯз дар Бӯстонсарои Ҳукумати Ҷумҳурии Тоҷикистон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ифтихори Сарони давлатҳои аъзои Созмони Аҳдномаи амнияти дастҷамъӣ ва Созмони Ҳамкории Шанхай, инчунин меҳмонони фахрии ин чорабиниҳо, ки барои иштирок дар ҷаласаи Шӯрои амнияти дастҷамъии Созмони Аҳдномаи амнияти дастҷамъӣ ва ҷаласаи Шӯрои сарони давлатҳои аъзои Созмони Ҳамкории Шанхай дар Тоҷикистон қарор доранд, зиёфати ғайрирасмӣ оростанд, ки бо фазои гарму самимиаш ба як маҳфили Шоми дӯстӣ табдил ёфт.

Барои баргузории шоми дӯстӣ яке аз мавзеъҳои хушбоду ҳавои бӯстонсаро интихоб гардид.

Ин чорабинӣ ба ҷашни таърихии 30-солагии Истиқлоли давлатии Ҷумҳурии Тоҷикистон, 20-солагии таъсисёбии Созмони Ҳамкории Шанхай ва соли раёсати Тоҷикистон дар Созмони Аҳдномаи амнияти дастҷамъӣ, рост омад.