РӮЗИ ҶАҲОНИИ МУБОРИЗА БО ВНМО

Имрӯз, 1 - уми декабри соли 2025 дар толори Мактаби санъати шаҳр аз тарафи маркази саломатӣ, масъулини Маркази Вируси Норасоии Масунияти Одам (ВНМО) аксияи тарғиботиву фаҳмондадиҳӣ доир гардид, ки дар он муовини Раиси шаҳр Муслимахон Ҷамолиён, роҳбари Маркази саломатии шаҳр Ҷонибек Ҳоммдҷонов иштирок намуданд. Ин иқдом бо мақсади ҷалби таваҷҷуҳи аҳолӣ ба масъалаҳои мубрами тандурустӣ, пешгирии бемории сироятии ВНМО ва баланд бардоштани сатҳи саводи тиббии ҷавонон ташкил карда шуд.

Дар рафти чорабинӣ иштирокчиён бо овезаҳои ташвиқотии «Тарзи ҳаёти солим» ва рамзи лентаи сурх рамзи ҳамбастагӣ бо шахсони гирифтори ин беморӣ паёмҳои огоҳонаро ба ҷомеа расониданд. Варақаҳои иттилоотӣ бо маълумотҳои судманд оид ба роҳҳои пешгирии сирояти ВНМО, усулҳои муҳофизат, аҳамияти ташхиси саривақтӣ, масъулияти шахсӣ дар нигоҳдории саломатӣ ва интихоби тарзи ҳаёти солим тақсим гардид.

Дар соҳили “Баҳри тоҷик” бунёди осоишгоҳи наву замонавӣ идома дорад

Соҳили зебоманзари “Баҳри тоҷик” яке аз мавзеъҳои дилфиреби шаҳри Гулистон буда, ҳамасола ҳазорҳо меҳмонону сайёҳон аз дохил ва хориҷи кишвар барои истироҳату фароғат ба ин ҷо рӯ меоранд.

Зебоиҳои табиӣ боис гардида, ки солҳои охир дар ин минтақа корҳои созандагиву ободонӣ рушд ёфта, барои қабули сайёҳону гардишгарон имкониятҳои беҳтар фароҳам оварда шавад.

Бо дарки муҳимияти рушди соҳаи сайёҳӣ ва истифодаи самараноки имкониятҳои табиӣ бо ташаббуси соҳибкори маҳаллӣ Турсуной Зокирова дар соҳили “Баҳри тоҷик” бунёди осоишгоҳи нав ҷараён дорад . Тибқи лоиҳа осоишгоҳ барои қабули 250 истироҳаткунанда пешбинӣ шудааст. Баъди ба истифода додани иншоот даҳҳо сокини маҳаллӣ бо ҷойи кори доимӣ таъмин хоҳанд шуд.

ВОХӮРИИ МУФИД БО ҲУНАРМАНДОН ВА СОКИНОН

Санаи 26.11.2025 дар толори хурди мақомоти иҷроияи ҳокимияти давлатии шаҳр дар ҳамкории Маркази касбомӯзӣ ва хизматрасонии шаҳри Хуҷанд ва мақомоти иҷроияи ҳокимияти давлатии шаҳр бо иштироки ҳунармандон ва сокинон вохӯрӣ баргузор карда шуд.

Дар вохӯрии мазкур намояндаи мақомоти иҷроияи ҳокимияти давлатии шаҳр Фаридуншоҳ Абдуллоев, ҳуқуқшиноси Маркази мазкур Тахмина Ваҳҳобова ва машваратчии марказ Дилнозаи Даврон иштирок ва суханронӣ намуданд.

Аз ҷониби масъулини Марказ барои шахсоне, ки мехоҳанд касб омӯзанд оид ба барномаҳои омӯзишӣ, аз ҷумла барқчӣ, кафшергарӣ, челонгар – сантехник, васлгари таҷҳизоти барқии офтобӣ, андовачӣ, компютер, ҳамчунин омӯзиши забонҳои англисӣ, русӣ ва кореягӣ ва дигар ихтисосҳои бозоргир маълумоти муфассал пешниҳод карда шуд.

ИСТИФОДАИ ОҚИЛОНА – КАФОЛАТИ ТАЪМИНОТИ ДОИМӢ

Доир ба истифодаи сарфакоронаи қувваи барқ, пешгирии талафот ва ошкор намудани ҳолатҳои тасарруфи ғайриқонунии неруи барқ прокуратураи шаҳри Гулистон гуруҳи корӣ ташкил намуда, ҷиҳати ба самъи аҳолӣ, коллективҳои меҳнатӣ, кормандони ташкилоту корхонаҳо, фаъолон ва зиёиён расонидани моҳияту мазмуни тағйиру иловаҳо ба Кодекси ҷиноятӣ ва Кодекси ҳуқуқвайронкунии маъмурии Ҷумҳурии Тоҷикистон вобаста ба муқаррар шудани ҷиноят ва пурзур шудани ҷазо барои истифодаи ғайриқонунии неруи барқ корҳои фаҳмондадиҳӣ анҷом дода шуд.

Таъкид карда шуд, ки ҳар як истеъмолкунанда вазифадор аст, ки ҳисобкунакҳои барқиро дар ҳолати хуб нигоҳ дошта, саривақт маблағҳои истифодаи қувваи барқро пардохт намояд, таҷҳизотҳои барқиро мунтазам зери назорат қарор дода, таҷҳизотҳои аз меъёр зиёд масрафкунандаи қувваи барқро бо дарназардошти меъёрҳо ба роҳ монад.