Рӯзи кормандони хадамоти ҳолатҳои фавқулода ва мудофиаи гражданӣ таҷлил гардид

Дар толори мақомоти иҷроияи ҳокимияти давлатии шаҳр ба муносибати Рӯзи кормандони хадамоти ҳолатҳои фавқулода ва мудофиаи гражданӣ чорабинии тантанвӣ баргузор гардид.

Раиси шаҳри Гулистон кормандони соҳаро бо иди касбияшон муборакбод гуфт.

Зикр карда шуд, ки ҳамасола дар Ҷумҳурии Тоҷикистон 17-уми август ҳамчун рӯзи кормандони хадамоти ҳолатҳои фавқулода ва мудофиаи гражданӣ таҷлил карда мешавад, ки ин сана ба рӯзи таъсиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон, ки 17 августи соли 1994 таъсис ёфтааст, рабт дорад.

Миззи мудаввар доир ба пешбурди Конвенсияи СММ дар бораи ҳуқуқҳои маъюбон

Санаи 21.08.2025 дар толори мактаби санъати маркази шаҳр миззи мудаввар таҳти унвони «Пешбурди Конвенсияи СММ дар бораи ҳуқуқи маъюбон» баргузор карда шуд.

Дар чорабинии мазкур муовини Раиси шаҳри Гулистон Муслимахон Ҷамолиён, намояндаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Саида Иноятова, роҳбари ассотсиатсияи волидони кӯдакони имконияташон маҳдуд Сабоат Ҳакимзода, роҳбари ташкилоти ҷамъиятии Иттиҳодияи маъюбон "Меҳрбахш" Холмаҳмад Тенгинев ва дигарон иштирок ва суханронӣ намуданд.

Зикр карда шуд, ки масъалаҳои ҳифзи иҷтимоии аҳолӣ, ба хусус маъюбон яке аз самтҳои муҳим ва афзалиятноки сиёсати пешгирифтаи Президенти Ҷумҳурии Тоҷикистон ба шумор рафта, таҳти сарварии Пешвои миллат муҳтарам Эмомалӣ Раҳмон мунтазам ҷиҳати дастгирии табақаҳои осебпазири аҳолӣ тадбирҳои судманд ва созанда анҷом дода мешаванд.

МАШВАРАТИ АВГУСТИИ КОРМАНДОНИ СОҲАИ МАОРИФИ ШАҲР БАРГУЗОР ГАРДИД

Имрӯз, 20-уми августи соли 2025 дар толори Кохи фарҳангии “Истиқлол”-и маркази шаҳр машварати августии кормандони соҳаи маорифи шаҳр баргузор гардид. Дар кори машварат Раиси шаҳри Гулистон Илҳом Пӯлотзода, намояндаи Раёсати маорифи вилояти Суғд Фирӯза Абдувоҳидзода ва инчунин муовинони Раиси шаҳр, мудирони шуъбаву бахшҳои дахлдори мақомоти иҷроияи ҳокимияти давлатии шаҳр, раиси КИ ҲХДТ дар шаҳр, роҳбарият ва кормандони шуъбаи маориф, директорони муассисаҳои таълимӣ ва томактабӣ, омўзгорону мураббиён ва дигар масъулон иштирок намуданд.

Нахуст дар даромадгоҳи Кохи фарҳангии “Истиқлол” ба ғолибони олимпиадаҳои ҷумҳуриявӣ ва байналмилалӣ диплом, медалҳо ва ба волидайни хонандагон сипосномаи мақомоти иҷроияи ҳокимияти давлатии шаҳр ва ба як қатор хонандагон сару либоси мактабӣ тақдим карда шуд.

Бо садо додани Суруди миллии Ҷумҳурии Тоҷикистон кори машварат оғоз гардид. Дар машварат натиҷагирӣ аз бурду бохти соҳаи маорифи шаҳр дар соли хониши 2024-2025 ва вазифаҳо барои соли хониши 2025-2026 баррасӣ гардиданд.

Боздид аз муассисаҳои таълимии маркази шаҳр ва шаҳраки Сирдарё доир ба омодагӣ ба соли нави хониш

Имрӯз, 19.08.2025 муовини Раиси шаҳр Муслимахон Ҷамолиён аз муассисаҳои таҳсилоти миёнаи умумии №1, 14 ва гимназияи №1-и маркази шаҳр ва муассисаи таҳсилоти миёнаи умумии №8-и шаҳраки Сирдарё ҷиҳати омодагӣ ба соли нави хониши 2025-2026, пурра аз таъмир баровардани муассисаҳо, таъмини хонандагон бо либоси ягонаи мактабӣ ва омодагӣ ба давраи тирамоҳу зимистони солҳои 2025-2026 дидан намуд.

Иттилоъ дода шуд, ки дар муассисаҳои таълимӣ таъмири синфхонаҳо пурра ба анҷом расида, дар гирду атрофи муассисаҳо низ корҳои ободонӣ ба роҳ монда шуд. Муассисаҳои таълимӣ барои қабули хонандагон ба соли нави хониши 2025-2026 омода мебошанд. Сару либоси хонандагони муассисаҳои таълимӣ аз ҷониби ҶДММ “Маҳина” омода гардида, волидайн ҳамарӯза аз коргоҳи дӯзандагии мазкур, ки дар ҳудуди шаҳр ҷойгир аст сарулибоси хонандагонро дастрас намуда истодаанд. Дар муассисҳо барои зимистонгузаронӣ ангишт, ҳезум ва сӯзишвориро ба қадри зарурӣ захира карда шудааст.