Ҷалби муҳоҷирон ба кор

Мутобиқ ба нақшаи корӣ бахши Хадамоти муҳоҷирати шаҳр бо аҳолӣ вохӯрӣ доир намуд. Дар ҷараёни чорабинӣ зикр гардид, ки дар шароити кунунӣ муҳоҷират ба як ҷузъи таркибии ҳаёти иҷтимоии мардум табдил ёфтааст.

Яке аз омилҳои асосӣ, ки хоси муҳоҷират маҳсуб меёбад, хароҷоти ҷойгиршавӣ дар мулки бегона мебошад. Аз муоинаи тиббӣ гузаштан, сари вақт дар қайди зист сабт намудан, супоридани имтиҳон аз забон ва таърихи ин кишвар, соҳиби патент будан ва дигар омилҳо боиси берун шудани шаҳрвандон аз Русия мегарданд. Ҷиҳати ба як маҷрои бонизом ворид сохтани мушкилоту монеаҳои мавҷуда масъулини бахш ибрози назар карда, ба пурсишҳои намояндагони қишрҳои гуногуни ҷомеа посуху дастурҳо доданд.

Дастовези баҳорона

Хушбахтона, бархе аз ҳамдиёрон дар корҳои хайру савоб бо мақсади ободкориву созандагӣ, рушди истеҳсолот, таъмини шаҳрвандон бо ҷойи кор, аёдати барҷомондагон, дастгирии ниёзмандон ва дигар корҳо саҳми шоиста доранд.

Яке аз чунин ашхоси саховатманд вакили Маҷлиси вакилони халқи вилоят, директори генералии ҶМ ТКММ «Апрелевка» Бахтиёр Маҷидов мебошад. Дар арафаи фарорасии Баҳори дилрабо тарбиятгирандагони кӯдакистони «Уқобак»-ро ӯ шодию нишот бахшид. Барои тарбиятгирандагон вакили мардумӣ Бахтиёр Маҷидов 120 адад маҷмӯи ҷиҳози фароғатро чун армуғон пеш овард. Аз чунин иқдому амалҳои неки Бахтиёр Маҷидов мо интихобкунандагон, кулли сокинони шаҳраки Консой шоду мамнунем.

Ба таваҷҷуҳи корҷӯён!

Барои ишғоли мансабҳои маъмурии хизмати давлатии зерин дар Мақомоти иҷроияи ҳокимияти давлатии шаҳр тибқи қарори Раиси шаҳри Қайроққум №46, аз 15 феврали соли 2016 озмун эълон карда мешавад:

• Мудири бахши бойгонии МИҲД-и шаҳр.
• Сармутахассис (заминсоз)- и Ҷамоати шаҳраки Консой.
• Сармутахассис (сармуҳосиб)- и Ҷамоати шаҳраки Адрасмон.
• Мутахассиси пешбари бахши фарҳанг.
• Мутахассиси пешбари шуъбаи ташкилӣ ва кор бо кадрҳо.
• Мутахассис-нозири мизи ҳарбии Ҷамоати шаҳраки Навгарзан.
• Мутахассис-нозири мизи ҳарбии Ҷамоати шаҳраки Чоруқдаррон.
• Мутахассис-нозири мизи ҳарбии Ҷамоати шаҳраки Консой.
• Мутахассиси андози Ҷамоати шаҳраки Адрасмон.
• Мутахассис-нозири мизи ҳарбии Ҷамоати шаҳраки Адрасмон.

Телефонҳо барои гирифтани маълумотҳои муфассал:

(83443) 2-46-11; (92) 706-51-51.

Шуъбаи ташкилӣ ва кор бо кадрҳои

Дастгоҳи Раиси шаҳри Қайроққум

Дастоварди варзишгарон

Бо ибтикори Раёсати ҷавонон, варзиш ва сайёҳии вилоят дар шаҳри Чкалов бахшида ба Рӯзи Артиши миллӣ мусобиқаи кушод оид ба гуштини тарзи юнонӣ-румӣ баргузор гардид.

Дар он 120 варзишгарон аз шаҳрҳои Чкалов, Қайроққум ва ноҳияи Б.Ғафуров ширкат варзиданд. Дар даври ниҳоии мусобиқа намояндагони шаҳри мо Меҳроҷ Абдусафоев, Азиз Абдуллоев, Умед Тоҷибоев, Аҳмад Сафарзода, Муминҷон Отаҷоновро насиб гардид, ки дар вазнҳои хеш мақоми аввалро соҳибӣ намоянд.

Дастаи ноҳияи Б.Ғафуров сазовори ҷойи 3-юм, дастаи шаҳри Қайроққум ҷойи 2-юм ва дастаи шаҳри Чкалов мақоми аввалро ишғол намуданд.