ТАМОШОИ ДАСТҶАМЪОНАИ ПАЁМ

Дар шаҳри Гулистон тамошои дастҷамъонаи Паёми навбатии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  муташаккилона роҳандозӣ гардид.

Аз ҷумла, дар толори Кохи фарҳанги «Истиқлол», толорҳои ҷомеаҳои меҳнатии Шабакаи Суғд, ҶСК “Қолинҳои Қайроққум”, НБО “Қайроққум”, ҶДКМТК “Апрелевка”, КВД “ЭКГҚ”, ҶДММ “ШКСТХ”, муассисаҳои истироҳатӣ- фароғатии “Шифо”, “Баҳористон”, “Соҳил”,  “Усмонҷон”,  муассисаҳои фарҳангӣ, таълимӣ, тандурустӣ, коллеҷи тиббӣ, ҷамоати шаҳракҳо ва дигар ташкилоту идораҳо новобаста аз шакли моликияташон мардум гарму ҷӯшон бо ҳамовозии якдилона аз сиёсати хирадмандонаи Роҳбари муаззами миллат Паёми навбатиро тамошо намуданд.

АЁДАТИ СОБИҚАДОРОНИ МЕҲНАТ

Дар арафаи иди Соли нави милодӣ иҷрокунандаи вазифаи Раиси шаҳри Гулистон Фирдавс Шарифзода гурӯҳи собиқадорони меҳнатро, ки дар пешбурди соҳаҳои хоҷагии шаҳр хизматҳои шоиста намудаанд, аёдат намуд.

Аз ҷумла, собиқадорон Санавбар Нуруллоева, Роза Ли, Каромат Қосимова ва Ғайбулло Зайниддинов ба муносибати фарорасии Соли нав аз номи Асосгузори сулҳу ваҳдати  миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, раиси вилояти Суғд муҳтарам Раҷаббой Аҳмадзода табрик намуда, ба онҳо армуғонҳои солинавӣ ҳадя карда шуданд.

ЗОДРӮЗИ 101-УМ ДАР АРАФАИ СОЛИ НАВ

Яке аз куҳансолтарин шахсиятҳо дар ҳудуди шаҳри Гулистон Анастасия Петроваи 101 сола мебошад,  ки солҳои тӯлонӣ дар соҳаи алоқаи вилоят ва шаҳр фаъолият намудааст. Ин зани зиндадил рӯзи 26-уми декабр рӯзи 101-умини мавлуди худро ботантана ҷашн гирифт.

Иҷрокунандаи вазифаи Раиси шаҳри Гулистон Фирдавс Шарифзода ва Консули генералии Федератсияи Русия дар шаҳри Хуҷанд Андрей  Варламов ба аёдати ин бонуи соҳибҷашн омада, ӯро бо мавлудаш муборакбод гуфта,  ба Анастасия Петрова армуғони солинавӣ тақдим намуданд. Ҳини суҳбат ин пиразани соҳибзавқ шукронаи Ватан – Тоҷикистони соҳибистиқлол намуда, дар ҳаққи Пешвои миллат ва сисати фардосози Роҳбари давлат дуои нек кард.

Ироаи Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олии Ҷумҳурии Тоҷикистон

26 декабри соли 2018 дар толори калони “Кохи Сомон”-и Бӯстонсаройи шаҳрии Ҳукумати Ҷумҳурии Тоҷикистон ҷаласаи ҳафтуми якҷояи Маҷлиси миллӣ ва Маҷлиси намояндагони  Маҷлиси  Олии Ҷумҳурии Тоҷикистон, даъвати панҷум баргузор шуд.

Дар толор аъзои Маҷлиси миллӣ ва вакилони Маҷлиси намояндагони Маҷлиси Олии Ҷумҳурии Тоҷикистон, Сарвазир ва аъзои Ҳукумати мамлакат, роҳбарияти Дастгоҳи иҷроияи Президенти Ҷумҳурии Тоҷикистон, вазорату кумитаҳои давлатӣ, идораҳои назди Президент ва Ҳукумат, мақомоти марказии судӣ ва дигар ниҳодҳои ҳифзи ҳуқуқу тартибот, Академияи илмҳо, муассисаҳои олии таълимӣ, раисони вилоятҳо ва шаҳру ноҳияҳо, роҳбарони марказҳои татбиқи лоиҳаҳои сармоягузорӣ, як гуруҳ собиқ вакилони Иҷлосияи XVI Шӯрои Олии Ҷумҳурии Тоҷикистон, аъзои Шӯрои ҷамъиятӣ, Ҳаракати Ваҳдати миллӣ ва эҳёи Тоҷикистон ва вакилони як қатор иттиҳодияҳои ҷамъиятӣ, сиёсӣ ва эҷодӣ, роҳбарияти корхонаю муассисаҳои ҷумҳуриявӣ, бонкҳо, доираи тоҷирону соҳибкорон ва ҷавонони ташаббускор, намояндагони ҳайати дипломатӣ ва воситаҳои ахбори умум иштирок намуданд.