ВОХӮРӢ БО ИСТИРОҲАТКУНАНДАГОН ДАР СОҲИЛИ БАҲРИ "ТОҶИК"

Имрӯз, 04.08.2025 дар соҳили баҳри "Тоҷик" вохӯрӣ бо истироҳаткунандагон баргузор карда шуд. Дар вохӯрии мазкур муовини Раиси шаҳр Муслимахон Ҷамолиён, директори МНДСЭ Иматулло Қуқанов ва намояндагони маркази саломатии шаҳр иштирок намуданд.

Зимни суҳбат бо истироҳаткунандагон доир ба пешгирии падидаҳои номатлуб дар ҷомеа, рӯй наовардан ба фарҳанги бегона, пешгирии ҷинояткорӣ, беҳдошти саломатӣ, тарзи ҳаёти солим, истеъмоли дурусти ғизо, машғул шудан ба варзиш таъкид карда шуд.

Ҳамчунин, ба истироҳаткунандагон варақаҳои иттилоотӣ тақсим карда шуд.

Моҳи сентябр таҷдиди Неругоҳи барқи обии «Қайроқум» пурра ба итмом мерасад

Интизор меравад, ки моҳи сентябри соли 2025 таҷдид дар Неругоҳи барқи обии «Қайроқум» пурра ба итмом расад, иттилоъ медиҳад АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон.

1 август Вазири энергетика ва захираҳои оби Ҷумҳурии Тоҷикистон Далер Ҷумъа дар вилояти Суғд бо корҳои таҷдид дар Неругоҳи барқи обии «Қайроққум» шинос шуд.

Масъулини соҳа ба Вазири энергетика ва захираҳои об иттилоъ доданд, ки то имрӯз 5 агрегати неругоҳ таҷдид гардида, корҳои навсозӣ тибқи нақша дар агрегати охирин идома доранд. Мутобиқи маълумоти пешниҳодшуда, интизор меравад, ки моҳи сентябри соли 2025 таҷдид дар неругоҳ пурра ба итмом расад.

МУМФАРШНАМОИИ РОҲҲОИ ДОХИЛИ МАҲАЛ

Дар шаҳри Гулистон ҷиҳати бо дастовардҳои назаррас таҷлил намудани Ҷашни 35-солагии Истиқлоли давлатии Ҷумҳурии Тоҷикистон корҳои созандагиву бунёдкорӣ, таҷдиду азнавсозӣ ва таъмири роҳҳо бо маром ҷараён доранд.

Бо дастгирии мақомоти иҷроияи ҳокимияти давлатии шаҳр ва сокинон кӯчаҳои Мирзо Турсунзода 14 ва 22 мумфарш карда шуданд, ки наздик ба 1км-ро ташкил медиҳанд.

Дар оғози корҳои мумфаршанамоӣ муовини Раиси шаҳр Шарифҷони Саидраҳмон иштирок намуда, такид дошт, ки соли ҷорӣ таъмири 52,5 километр роҳҳои автомобилгарди шаҳр ва ҷамоати шаҳракҳо ба нақша гирифта шудааст. Аз ҷумла 7,5 км таъмири асосӣ, 20,4 километр таъмири ҷорӣ ва 25,5 километр шағалпўш мебошад.

ВАРЗИШ ГАРАВИ САЛОМАТИСТ!

Субҳи имрӯз, 02.08.2025 дар шаҳри Гулистон бо иштироки хизматчиёни давлатӣ, кормандони корхонаву муассисаҳо, ҷавонону наврасон ва сокинон дар боғи фарҳангиву фароғатии "Темурмалик" бахшида ба Рӯзи варзишгарон, машқҳои пагоҳирӯзӣ таҳти унвони "Миллати ҷисман солим рӯҳан низ муқтадир ва шикастнопазир мебошад" доир гардид.

Ин тадбир дар доираи нақшаи чорабиниҳои бахши кор бо ҷавонон ва варзиши мақомоти иҷроияи ҳокимияти давлатии шаҳри Гулистон бо мақсади амалӣ гардонидани дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон доир ба амалигардонии “Барномаи рушди тарбияи ҷисмонӣ ва варзиш барои солҳои 2022-2026” ба роҳ монда шуд.