Президенти Ҷумҳурии Тоҷикистон Эмомалӣ Раҳмон бо Мудири кулли ЮНЕСКО хонум Одрӣ Азуле мулоқот намуданд

14 октябр Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари расмӣ ба Ҷумҳурии Фаронса бо Мудири кулли ЮНЕСКО хонум Одрӣ Азуле мулоқот карданд.

Дар ҷараёни мулоқот масоили ҳамкории Тоҷикистон бо ин ниҳоди бонуфузи Созмони Милали Муттаҳид дар соҳаҳои фарҳанг, илм ва маориф баррасӣ гардид.

Президенти мамлакат муҳтарам Эмомалӣ Раҳмон ба роҳбарияти ЮНЕСКО барои густариши ҳамкорӣ бо Ҳукумати Ҷумҳурии Тоҷикистон изҳори сипос карда, тамоми кормандони ЮНЕСКО-ро ба муносибати 75-умин солгарди таъсисёбии ин Созмон табрику таҳният гуфтанд.

ҶАМЪБАСТИ ФАЪОЛИЯТИ НУҲМОҲА

Дар толори калони Мақомоти иҷроияи ҳокимияти давлатии шаҳри Гулистон доир ба натиҷаҳои фаъолияти соҳаҳои хоҷагии халқи шаҳр дар давоми нуҳ моҳи соли 2021 тибқи ҷадвали баргузории маҷлиси фаъолони вилоят ва шаҳру ноҳияҳо таҳти раёсати Раиси шаҳри Гулистон баргузор гардид.

Дар ҷаласаи фаъолон муовини якум, муовин, роҳбари дастгоҳи Раиси шаҳр, мудирони шуъбаҳо ва бахшҳои Мақомоти иҷроияи ҳокимияти давлатии шаҳр, роҳбарони воҳидҳои сохтории шаҳр, роҳбарони мақомоти ҳифзи ҳуқуқ, раёсати молия, нозироти андоз, роҳбарони корхона, ташкилоту муассисаҳо, раисони ҷамоати шаҳракҳо, намояндагони соҳаҳои маориф, тандурустӣ ва дигар фаъолон ширкат варзиданд.

Раиси шаҳри Гулистон Бахтиёр Саидаҳмадзода маҷлиси фаъолони шаҳрро ҳусни оғоз бахшид. Оид ба ҷамъбасти натиҷаҳои рушди иҷтимоию иқтисодии шаҳри Гулистон дар давоми нуҳ моҳи соли 2021 муовини якуми Раиси шаҳри Гулистон Нуринисо Комилзода маърӯза намуд. Зикр гардид, ки дар давоми нуҳ моҳи соли 2021 ба қисми даромади буҷети давлатӣ 175,1 миллион сомонӣ маблағҳои андозу пардохтҳо ворид гашт, ки он баробар ба 105,9 фоизи нақшаи пешбинишуда буда, ба буҷет 9,7 миллион сомонӣ аз нақша зиёд маблағ ворид гардид. Нақшаи даромади буҷети шаҳрӣ 45,5 миллион сомонӣ буда, 48,0 миллион сомонӣ ё 105,5 фоиз ба иҷро расонида шуд, ки ин нишондиҳанда аз нақшаи пешбинишуда 2,5 миллион сомонӣ зиёд маблағ ворид гардид.

ГУЛИСТОН - ҚАҲРАМОНИ ЛИГАИ ДУЮМ

Дар доираи бозиҳои даври ҳабдаҳуми мусобиқоти Тоҷикистон оид ба футбол байни дастаҳои Лигаи дуюм минтақаи Суғд санаи 13.10.2021 дастаи “Гулистон”-и шаҳри Гулистон дар майдони худ бо дастаи “Спитамен”-и ноҳияи Спитамен дидор анҷом дод.

Лозим ба зикр аст, ки дидори мазкур тақдири қаҳрамонии “Гулистон”-ро як давр пеш аз анҷоми мусобиқот муайян менамуд. Бозигарони гулистонӣ дар майдони худ дар назди мухлисон ҳунарнамоии ҷолиб нишон дода, дар қисм аввали бозӣ ҳуҷумкори даста Ҷӯрабой Исоев ҳисоби бозиро кушод. Дар қисми аввал дигар дастаҳо натавонистанд хати дарвозаи ҳамдигарро рахна намоянд. Бозигарони дастаи “Гулистон”, ки зинаи устуворро барои қаҳрамонӣ фароҳам овардаанд барои нигоҳ доштани мақоми хеш ва даст ёфтан ба қаҳрамонӣ  кӯшиш намуда, дар қисми дуюм ба задани ду туби дигар мушарраф гардиданд. Тубҳоро Суҳроб Сабуров ва Салоҳиддин Одиназода ба самар расониданд. Дидори дастаҳо бо ҳисоби 3-0 ба фоидаи дастаи “Гулистон”-и шаҳри Гулистон ба анҷом расид.

Мумфаршсозии роҳи Зарнисор — Бӯстон идома дорад

Раиси вилояти Суғд Раҷаббой Аҳмадзода бо рафти мумфаршкунии роҳи Зарнисор — Бӯстон шинос гардида, барои дар муҳлати пешбинишуда ва бо сифати баланд ба анҷом расонидани корҳои роҳсозӣ ба масъулин супоришҳо дод.

Роҳи мазкур бо маблағгузории Ширкати кӯҳӣ-саноатии Тоҷикистону Хитой аз тарафи ҶДММ МКМ “Сомонӣ” мумфарш гардида истодааст ва дарозии он 38 км мебошад.

Аз тарафи роҳсозон то имрӯз 5 км пурра мумфарш гардида, дар доираи амалишавии лоиҳа панҷ пулҳои мошингузар низ таъмиру азнавсозӣ хоҳад шуд. Роҳи Зарнисор-Бӯстон солҳои зиёд инҷониб дар ҳолати ногувор қарор дошта, рафту омади сокинон бо мушкилӣ сурат мегирифт. Бо дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон моҳи августи имсол мумфаршсозии роҳ оғоз ёфта, ҳоло бо ҷалби 15 техникаҳои гуногун ва мутахассисон корҳо ҷараён дорад.