Шиносоӣ бо рафти сохтмони корхонаҳои нави саноатӣ дар шаҳри Гулистон

Дар шаҳри Гулистон бо мақсади расидан ба ҳадафи чоруми милливу стратегӣ — саноатикунонии босуръати кишвар тадбирҳои зарурӣ амалӣ гардида, бунёди корхонаҳои гуногун ҷараён дорад. Соҳибкорон бо истифода аз имкониятҳои фароҳамовардаи давлат корхонаҳои гуногун сохта, саҳми назарраси худро дар саноатикунонӣ гузошта истодаанд.

Раиси вилояти Суғд Раҷаббой Аҳмадзода 3 май зимни боздиди корӣ аз шаҳри Гулистон бо корҳои сохтмонӣ дар ҶДММ “Тиглан”,  ҶДММ «Мурғи бебаҳо»,  ҶДММ «Парандаи заррин» ва ҶДММ «Ганҷи сомон» шинос гардида, ба масъулин барои дар сатҳи зарурӣ ба итмом расонидани корҳои сохтмонӣ ва ворид намудани таҷҳизоти лозимӣ супоришҳо дод.

Боиси зикр аст, ки дар ҶДММ “Тиглан”  истеҳсоли рангҳои гуногун барои сохтмон ва дар се корхонаи дигар истеҳсоли гӯшти паранда ба роҳ монда хоҳад шуд.

Дар шаҳри Гулистон ба бунёди мактаб барои хонандагони болаёқат ва бинои Нозироти андоз санги асос гузошта шуд

Рӯзи сешанбеи 3 май дар шаҳри Гулистон бо иштироки Раиси вилояти Суғд Раҷаббой Аҳмадзода ба корҳои сохтмонии мактаб барои хонандагони болаёқат оғоз бахшида шуд.

Раиси вилоят Раҷаббой Аҳмадзода дар ҳузури сокинон бо гузоштани нома ба наслҳо ба сохтмони бинои таълимӣ санги асос гузошта, зимни суҳбат иброз дошт, ки аз ҷониби Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди соҳаи маориф таваҷҷуҳи хоса зоҳир мегардад. Бо дастгирии Ҳукумати мамлакат ҳамасола даҳҳо иншооти нави соҳа сохта шуда, масъалаи баланд бардоштани сатҳу сифати дониш дар муассисаҳои таҳсилоти ибтидоӣ ва миёнаву олии касбӣ ва тарбияи мутахассисони баландихтисос мавриди эътибори аввалиндараҷа қарор дорад.

Чуноне иттилоъ дода шуд, бинои хуштарҳу замонавии мактаб барои хонандагони болаёқат барои 400 нафар хонанда дар як баст бунёд гардида, барои таълиму тарбияи насли наврас шароитҳои мусоид фароҳам оварда хоҳад шуд. Бинои нав аз 3 ошёна ва 27 синфхона, маҷлисгоҳ, майдончаи варзишӣ, толори варзишӣ, ошхона, дегхона (барои системаи гармидиҳӣ) иборат буда, дар кӯчаи Истиқлоли маркази шаҳр бунёд хоҳад шуд. Фармоишгари иншоот мақомоти иҷроияи ҳокимияти давлатии вилоят ва шаҳри Гулистон буда, пудратчии он ҶДММ “Авитсена” мебошад.

ҲЕҶ КАС ВА ҲЕҶ ЧИЗ ФАРОМӮШ НАМЕШАВАД

Имрӯз, 4 майи соли 2022 тибқи нақшаи тасдиқгардидаи Шӯрои вилоятии Ҳаракати ҷамъиятии ваҳдати миллӣ ва эҳёи Тоҷикистон ба истиқболи 77-умин солгарди Рӯзи Ғалаба дар Ҷанги Бузурги Ватании солҳои 1941-1945 дар толори мактаби санъати шаҳр маҳфилҳои илмӣ-адабӣ таҳти унвони “Ҳеҷ кас ва ҳеҷ чиз фаромӯш намешавад” бо иштироки собиқадорони ҷангу меҳнат, барқароркунандагони сохти конститутсионӣ, бартарафкунандагони садамаи чернобел, соҳаҳои маорифу тандурустӣ, фарҳанг ва дигар соҳаҳои хоҷагии халқи шаҳр баргузор гардид.

Дар маҳфили илмӣ-адабӣ намояндагони Мақомоти иҷроияи ҳокимияти давлатии вилояти Суғд, Раиси шӯрои куҳансолони Ҳаракати ҷамъиятии ваҳдати миллӣ ва эҳёи Тоҷикистон Қобилҷон Усмонов, устоди Муассисаи давлатии таълимии “Донишгоҳи давлатии Хуҷанд ба номи академик Бобоҷон Ғафуров” Сафар Эркаев, устоди Муассисаи давлатии таълимии “Донишгоҳи давлатии Хуҷанд ба номи академик Бобоҷон Ғафуров” Ҷамолиддин Абдукаримов,  раиси Шӯрои собиқадорони ҷанг ва меҳнати шаҳри Гулистон Қосимова Каромат Маҳмудовна, мудири бахши кор бо ҷавонон ва варзиши шаҳр Абдураҳмонов Аҳлиддин Абдукаримович ва мутахассиси шуъбаи рушди иҷтимоӣ ва робита бо ҷомеаи дастгоҳи Раиси шаҳр Фаридуншоҳ Абдуллоев иштирок ва суханронӣ намуданд.

КОРМАНДОНИ НОЗИРОТИ АНДОЗИ ШАҲР ҚАДРДОНӢ ГАРДИДАНД

Имрӯз, 4 майи соли 2022 дар толори хурди Мақомоти иҷроияи ҳокимияти давлатии шаҳр иҷрокунандаи вазифаи Раиси шаҳр Раъно Ҳошимзода ба муносибати Рӯзи кормандони мақомоти андоз кормандони нозироти андози шаҳрро таҳният намуд.

Таъкид карда шуд, ки мутобиқи Қонуни Ҷумҳурии Тоҷикистон дар бораи рӯзҳои ид ҳамасолаи 4 - уми май дар қаламрави кишвар ҳамчун Рӯзи кормандони мақомоти андоз таҷлил карда мешавад.

Кумитаи андози назди Ҳукумати Ҷумҳурии Тоҷикистон мақомоти марказии ҳокимияти давлатӣ дар соҳаи таъмини назорати давлатӣ аз болои пардохти саривақтӣ ва андозҳо мебошад, ки дар таъмини рушди иҷтимоиву иқтисодии кишвар саҳми босазо дорад.