ПАРЧАМ – САРИ БАЛАНДИ МИЛЛАТ

Ба ифтихори Рӯзи Парчами давлатии Ҷумҳурии Тоҷикистон дар кӯчаи марказии шаҳри Гулистон роҳпаймоӣ баргузор гардид.

Дар ин чорабинии бошукӯҳ қариб 3 ҳазор нафар сокинони маркази шаҳр, намояндагони ҷамоати шаҳракҳо, кормандони идораву муассисаҳо ва муҳассилини коллеҷи тиббиву муассисаҳои таълимии шаҳр иштирок намуда, бо парчамҳои хурду бузург, аз назди майдони шуъбаи маориф то гардиди маркази тиҷоратии «Дурахшон» бо нидоҳои шодонаи «Парчамат бодо парафшон Тоҷикистони азиз!» «Пайравони Пешвои миллатем!, «Шараф ба Тоҷикистони соҳибистиқлол!», «Шараф ба Пешвои миллати сарбаланд!», «Шараф ба бунёдкорони диловари Роғун!»  аз кӯчаи марказии шаҳри соҳили «Баҳри тоҷик» мутантан роҳпаймоӣ намуданд.

РАМЗИ МУҚАДДАСИ ДАВЛАТДОРӢ

Бахшида ба Рӯзи Парчами давлатии Ҷумҳурии Тоҷикистон дар толори КВД «Экспедитсияи комплекси геологии Қайроққум» вохӯрӣ дар ташкилоти ибтидоии ҲХДТ бо фаъолони ҳизб, бонувон ва ҷавонон доир гардид.

Дар мулоқот раиси кумиҷроияи шаҳриии ҲХДТ Муслимахон Ҷамолиён зимни баромади худ оид ба дастовардҳои Истиқлолияти давлатӣ, иҷлосияи 16-уми Шӯрои Олӣ, Рӯзи Парчами давлатӣ ва ифтитоҳи чархаи якуми НБО «Роғун» сухан ронд. Зикр гардид, ки ҳамасола санаи 24-уми ноябр дар саросари Ҷумҳурии Тоҷикистон иди Парчами давлатии Ҷумҳурии Тоҷикистон дар сатҳи баланд ҷашн гирифта мешавад. Парчами миллӣ нахустин нишони муқаддаси ҳар кишвару ҳар халқ аст. Рамзи ҳувият, рамзи давлатдорӣ, рамзи ягонагии халқҳои як сарзамин мебошад.

БАРРАСИИ ҲОЛАТИ ҚОИДАҲОИ ШАҲРСОЗӢ

Таҳти раёсати Прокурори шаҳри Гулистон, мушовири адлияи дараҷаи 1-ум Сафаралӣ Самизода ҷаласаи Шӯрои ҳамоҳангсозии мақомоти ҳуқуқи шаҳр бо иштироки аъзо, роҳбарони мақомоти қудратӣ, раисон ва заминсозони ҷамоати шаҳракҳо баргузор гардид.

Дар Шӯро масъалаи ҳолати иҷрои талаботи Кодекси шаҳрсозии Ҷумҳурии Тоҷикистон, оид ба меъёру қоидаҳои шаҳрсозӣ ва дигар санадҳои меъёрии ҳуқуқии вобаста ба ин самт, фаъолияти бахши меъморӣ ва шаҳрсозии МИҲД-и шаҳр дар давраи соли 2017 ва нуҳ моҳи соли равон мавриди баррасӣ қарор гирифт.