ГУЛИСТОН – БОҒШАҲРИ ДАВРОНИ ИСТИҚЛОЛИЯТ

Дар майдони Парчами давлатии Ҷумҳурии Тоҷикистон бахшида ба Рӯзи шаҳри Гулистон тантанаҳои идона ва барномаи калони консертӣ доир гардид.

Дар оғоз муовини Раиси вилояти Суғд Анвар Яъқубӣ ба сокинон ва меҳмонони зиёди шаҳри Гулистон табрикоти Раиси вилояти Суғд Раҷаббой Аҳмадзодаро ба ифтихори Рӯзи шаҳри Гулистон манзур кард. Раиси шаҳри Гулистон Фирдавс Шарифзода ҳамагонро бо Рӯзи шаҳр муборакбод намуд. Зикр гардид, ки дар партави сиёсати ояндасозу хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон халқи шарифи кишвар қадамҳои устувори хешро дар эъмори давлати соҳибихтиёру соҳибмақом дар арсаи ҷаҳон мегузорад, мардуми шарифи шаҳри Гулистон бо рӯҳияи баланди ватандорӣ, хештаншиносӣ ва ифтихори миллӣ аз сафари навбатии Пешвои муаззами миллат ба шаҳри Гулистон ва ба кор даровардани агрегати дуюми Неругоҳи барқи обии “Роғун” ба корҳои бунёдкорӣ ва созандагӣ камари ҳиммат маҳкам бастаанд.

ПЕШГИРИИ ВНМО

Дар толори Маркази саломатӣ шаҳри Гулистон семинар-машварат бо иштироки мутахассиси Маркази ҷумҳуриявӣ оид ба ВНМО Моҳҷон Бобиева ва мутахассиси БПНМ-и вилояти Суғд Азиза Ниёзметова баргузор гардид. Дар семинар-машварат мутассадиёни соҳаи тиб аз шаҳракҳо, кормандони маориф, мутахассисони САҲШ, табибони сироятшинос, кормандони маркази назорати санинатарию эпидемиологии шаҳри Гулистон иштирок намуданд.

Семинар-машваратро бо сухани ифтитоҳӣ сартабиби беморхонаи марказии шаҳр Гулсанам Пӯлодиён оғоз намуда, оид ба ташаккули тарзи ҳаёти солим, оид ба пешгирии бемории вируси норасоии масъунияти одам ва бемории гепатити В, С ва роҷеъ ба Барномаи миллӣ оид ба ВНМО дар байни аҳолӣ суханронӣ намуд.

СЕМИНАР-МАШВАРАТИ МУФИД

Дар толори бахши ҳифзи муҳити зист бо кормандони соҳаи маориф, муҳоҷират, шуғли аҳолӣ ва меҳнат, молия,раисони ҷамоатҳо, вакилони шаҳрӣ мизи мудаввар дар мавзўи «Маблағгузории таҳсилоти ғайрирасмӣ ва калонсолон дар сатҳи мақомоти маҳаллии ҳокимияти давлатӣ» баргузор гардид. Дар семинар вакили Маҷлиси намояндагони Маҷлиси Олии Ҷумҳурии Тоҷикистон Нурулло Оқилзода, намояндаи ташкилоти байналмилалї Зарина Холиқова доир ба мавзӯи семинар-машварат баромад намуданд.

Зикр гардид, ки дар шароити бозори меҳнати муосир дастрас будани таҳсилоти сифатнок ба инсон дар ҳама марҳилаҳои ҳаёташ масъалаи муҳим ба шумор меравад. Бо дарки муҳимияти масъалаи мазкур давлат барои дар асосҳои илмӣ амалӣ намудани ин намуди таҳсилот тадбирҳои мушаххас рўйи кор овардааст. Ин тадбирҳо дар Стратегияи давлатии рушди бозори меҳнати Ҷумҳурии Тоҷикистон то соли 2020, ки Ҳукумати Ҷумҳурии Тоҷикистон онро 2-юми июни соли 2011, таҳти № 277 тасдиқ кардааст, хеле равшан инъикос ёфтаанд.