Президенти мамлакат Эмомалӣ Раҳмон дар ноҳияи Дарвоз ба ятимону бепарасторон туҳфаҳо тақдим намуданд

Дар идомаи сафари корӣ дар ноҳияи Дарвоз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо 55 нафар ятими кулл ва маъюб, ки тарбиятгирандагони муассисаҳои таълимии ноҳияҳои Дарвоз, Ванҷ ва Рӯшони Вилояти Мухтори Кӯҳистони Бадахшон мебошанд, мулоқот намуда, ба онҳо туҳфаҳои арзишманд тақдим карданд.

Нахуст Пешвои миллат муҳтарам Эмомалӣ Раҳмон ин кӯдакону наврасони бо амри тақдир аз меҳри гарми волидайн маҳруммондаро ба муносибати оғози соли нави таҳсил табрику таҳният гуфта, ба онҳо хониши хубу аъло орзу карданд.

Сарвари давлат муҳтарам Эмомалӣ Раҳмон шахсан туҳфаҳоро, ки аз кумакпулӣ ва сару либос иборат буд, ба ҳар яки онҳо тақдим намуданд. Ҳамчунин дар ин рӯз ба хотири шодию нишоти ятимону маъюбон дастархони идона ороста шуд.

Сарвари давлат Эмомалӣ Раҳмон аз қисми низомии Қӯшунҳои хушкигард дар ноҳияи Дарвоз боздид намуданд

Дар доираи сафари корӣ дар ноҳияи Дарвоз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Қисми низомии Қӯшунҳои хушкигард ташриф оварда, бо шароити хизмат дар қисми низомӣ шинос шуданд.

Аснои шиносоӣ Сарвари давлат муҳтарам Эмомалӣ Раҳмон бо сарбозони қисми низомии мазкур суҳбати самимӣ анҷом дода, аз ҳолу аҳвол ва имкониятҳои хизматии аскарӣ пурсон шуданд.

Таъкид гардид, ки адои хизмати Модар-Ватан қарзи имониву виҷдонии ҳар як ҷавонмард буда, бо истифода аз имконоти мусоиди фароҳамовардашуда ин масъулиятро бояд иҷро кард.

Сарбозон дар навбати худ ба Президенти мамлакат барои ғамхории доимиашон нисбат ба шароиту имконот дар қисмҳои низомӣ, навсозиву муҷаҳҳаз намудани воҳидҳои низомӣ изҳори миннатдорӣ намуданд.

Президенти мамлакат Эмомалӣ Раҳмон барои сохтмони канали обрасон дар мавзеи Дашти Лучи ноҳияи Дарвоз санги асос гузоштанд

Дар мавзеи дашти Лучи ноҳияи Дарвоз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои сохтмони канали обрасон санги асос гузоштанд.

Иттилоъ дода шуд, ки масоҳати Дашти Луч бештар аз 500 гектарро дар бар гирифта, қариб 330 гектари он қобили обёрӣ мебошад. Ин мавзеъ дар баландии 2000 метр аз сатҳи баҳр қарор дошта, канали мазкур ба шакли худҷореъ фаъолият хоҳад кард.

Зимни муаррифӣ ба Сарвари давлат иттилоъ доданд, ки ин минтақа аз дарёчаи Хост-роғ обёрӣ гардида, дарозии канали сохташаванда 17,5 километрро дар бар мегирад. Тибқи лоиҳа канали худҷореъ асосан аз минтақаҳои душворгузар, талу теппаҳо мегузарад ва бунёди он имконият медиҳад, ки 315 гектар замини дигар дар ноҳияи Дарвоз обёрӣ карда шавад. Аз рӯи маълумоти мутахассисон, дар ин замина 247 гектар заминҳои корам, 68 гектар замини боғот бо оби полезӣ таъмин гашта, ҳамчунин 17 гектар замини наздиҳавлигӣ обёрӣ карда мешавад. Дар ин баробар бо амалӣ гаштани тарҳи мазкур 105 гектар замини бекорхобида низ ба гардиши кишоварзӣ дароварда мешавад.

РӮЗИ УМУМИҶАҲОНИИ КӮМАКИ БАШАРДӮСТОНА

Дар асри XXI ки ҳамагон онро асри илму техника ном мебаранд, дунёи муосир бо тарзи густурда пеш меравад. Дар ин миён давлатҳои мутараққӣ аз воситаҳои гуногун истифода намуда бо суръати бештар ба муваффақият ва комёбӣ ноил мегарданд.

Давлатҳои рӯ ба тараққӣ низ мекӯшанд, ки дар ин корзор пирӯзӣ ба даст оранд ва сатҳи некуаҳволии зиндагии мардуми худро таъмин намоянд. Давлатҳои ақибмонда ва давлатҳое, ки сатҳи зиндагонии аҳолиашон дар сатҳи паст қарор доранд боз дастнигари давлатҳои бузург мешаванд. Дар ин миён якчанд созмонҳи бонуфузи ҷаҳоние ҳаст, ки бо иқдомҳои ғамхорона ба кишварҳои аҳолиашон дар сатҳи пасти зиндагӣ қарор дошта дасти кӯмак дароз мекунанд.