АХБОР оид ба иҷлосияи панҷуми Маҷлиси вакилони халқи шаҳр (даъвати шашум)

Бо садо додани Суруди миллии Ҷумҳурии Тоҷикистон дар толори калони мақомоти иҷроияи ҳокимияти давлатии шаҳри Гулистон иҷлосияи панҷуми Маҷлиси вакилони халқи шаҳри Гулистон, даъвати шашум оғоз гардид.

Раиси иҷлосия, Раиси шаҳри Гулистон Бахтиёр Саидаҳмадзода баъди гузаронидани муқаррароти пешбинишуда, иттилоъ дод, ки дар кори иҷлосияи панҷуми Маҷлиси вакилони халқи шаҳри Гулистон, даъвати шашум аз 35 нафар вакилони интихобшуда 32 вакил иштирок дорад ва 3 нафар бо сабабҳои узрнок ҳузур надорад. Ҳамчунин дар кори иҷлосия роҳбарони воҳидҳои сохтории мақомоти иҷроияи ҳокимияти давлатии шаҳр, мақомоти ҳифзи ҳуқуқ, ташкилоту муассисаҳои шаҳрӣ, намояндагони воситаҳои ахбори умум даъват шудаанд. Дар иҷлосияи панҷуми Маҷлиси шаҳрӣ намояндаи мақомоти иҷроияи ҳокимияти давлатии вилоят, директори маркази стандартизатся, метрология, сертификатсия ва нозироти савдои вилояти Суғд Муҳаммадӣ Давлатов низ ширкат дошт.

ПАЁМИ ШОДБОШИИ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати Рӯзи модар

8 марти соли 2021

Модарону бонувони арҷманд ва хоҳарони азиз!

Ба ифтихори Рӯзи модар, ки дар оғози фасли зебои баҳор фаро мерасад, тамоми модарону бонувони муҳтарам ва хоҳарону духтарони азизро самимона табрик мегӯям ва ба ҳар яки онҳо, пеш аз ҳама, саломатӣ, хушбахтӣ ва рӯзгори осуда орзу менамоям.

Модар ягона мавҷуди мушфиқу ғамхор ва мӯнису меҳрубонест, ки ба фарзанд ҳаёт мебахшад, ба ӯ сухан гуфтану роҳ рафтанро ёд медиҳад, ӯро тарбия мекунад ва дар раванди тарбия дар қалби фарзанди худ эҳсоси муҳаббату самимият, некиву накӯкорӣ ва инсондӯстиро ба вуҷуд меоварад, барои босаводу соҳибмаърифат ва соҳиби касбу ҳунар шудани нури чашмонаш саъю талош менамояд.

Яъне модар барои ташаккули маънавии фарзанд шабонарӯз заҳмат мекашад, тамоми умри худро бо ғаму шодии ӯ сипарӣ менамояд ва ҳамеша дар орзуи хушбахтии фарзандаш аст.

ТАҶДИДИ ТАРҲИ ДАРОМАДГОҲИ ШАҲР

Дар шаҳри Гулистон ҷиҳати дар сатҳи баланди ташкилӣ ҷашн гирифтани 30-солагии Истиқлолияти  давлатии Ҷумҳурии Тоҷикистон тибқи дастур ва раҳнамоиҳои Асогузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва вазифагузориҳои Раиси вилояти Суғд Раҷаббой Аҳмадзода бо азми роҳбарияти шаҳр дар даромадгоҳи ғарбии шаҳр иқдоми бунёдкорӣ – ҳашари умумишаҳрӣ сурат гирифт.

Дар ин иқдоми наҷиб Баҳодур Шерализода вазири Кумитаи ҳифзи муҳити зисти Ҷумҳурии Тоҷикистон ва сардори Раёсати ҳифзи муҳити зисти вилояти Суғд Абдуаҳад Ҳакимзода низ иштирок доштанд. Дар раванди корҳои ободонию созандагӣ беш аз 28 адад дарахти сӯзанбарги қримӣ ва 200 адад дарахти элдорӣ шинонида шуд.

АЁДАТИ СОБИҚАДОРЗАНОНИ ШАҲР

Тибқи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва нишондодҳои Раиси вилояти Суғд Раҷаббой Аҳмадзода ба муносибати Рӯзи Модар Раиси шаҳри Гулистон Бахтиёр Саидаҳмадзода ва директори маркази стандартизатсия, метрология, сертификатсия ва нозироти савдои вилояти Суғд Маҳмадӣ Давлатов ба бонувони собиқадори шаҳр Санавбар Нуриллоева собиқадори соҳаи хизмати давлатӣ, Дилбар Рустамова собиқадори соҳаи маориф, Малоҳат Пулотова собиқадори хизмати давлатӣ, Ризқия Каримова  ва Рима Беляева туҳфаҳои Раиси вилояти Cуғд ва Раиси шаҳрро тақдим намуданд.

Собиқадорон аз ин тадбир рӯҳи болида гирифта, ғамхориҳои Ҳукумати кишварро нисбати бонувон ва арҷгузории собиқадорон ёдоварӣ намуда, изҳор  доштанд, ки имрӯзҳо бонувони шаҳр баробари мардон номуси ватандориро ба дӯши худ гирифта, дар соҳаҳои мухталифи ҳаёти ҷомеа ва давлат ғайратмандона фаъолият доранд ва бо ташаббусҳои созандаи худ шаҳри азизамон, як гӯшаи Тоҷикистони маҳбубамонро боз ҳам ободу зебо гардонида истодаанд. Ҳамчунин онҳо бо меҳри модаронаашон баланд бардоштани мақому манзалати хонадонро шараф ва номуси хеш мешуморанд ва бо самимият, лутфу муҳаббат ва садоқату шарофати худ номи зан – модарро муқаддас ва гиромӣ медоранд, бо дастони пурмеҳри худ навниҳолони соҳибмаърифат ва фарҳангдӯсту адабпарвари боғи маърифати миллат, яъне созандагони ояндаи неки давлат ва ҷомеаро ба камол мерасонанд. Дар интиҳо собиқадорон барои ин тадбири наку изҳори сипосмандӣ намуданд.