БА ДИҚҚАТИ ШАҲРВАНДОН, ХАТМКУНАНДАГОНИ МУАССИҲОИ ТАЪЛИМӢ ВА ДОНИШГОҲҲОИ ОЛӢ

Санаи 19-уми феврали соли равон, соати 9:00 дар Боғи 24-солагии Истиқлолияти Тоҷикистон дар шаҳри Гулистон ярмаркаи ҷойҳои холии корӣ гузаронида мешавад. Дар ярмарка ҷойҳои холии кории дар шаҳрҳои Гулистон, Бӯстон ва ноҳияи Бобоҷон Ғафуров мавҷуд буда, барои шахсони корҷӯянда пешниҳод мегардад.

Ҳамчунин шахсоне, ки соҳибкасб шуданро мехоҳанд, метавонанд ба курсҳои кӯтоҳмуддат аз рӯйи касбҳои гуногун номнавис гарданд.

Шумо метавонед оид ба ҳуқуқҳои меҳнатии худ дар шуъбаи Агентии меҳнат ва шуғли аҳолӣ дар шаҳри Гулистон маълумоти пурра гиред. Телефон барои тамос (83443) 2-36-67, (92) 612-24-75

Марҳамат ба ярмарка!

ТАҶЛИЛИ ҶАШНВОРАИ ГЕОЛОГИ НОМӢ

Дар толори мактаби санъати шаҳри Гулистон ба ифтихори 70-солагии Шаҳрванди фахрии шаҳри Гулистон, собиқадори хизмати геологияи ҷумҳурӣ Анвар Отаев ҷамъомади ботантана баргузор гардид.

Муовини раиси Шӯрои собиқадорони ҷангу меҳнати вилояти Суғд Шавкат Алиев номаи шодбошии Раиси вилояти Суғд Раҷаббой Аҳмадзодаро манзури соҳибҷашн намуд. Сипас, табрикоти Раиси шаҳри Гулистон Бахтиёр Саидаҳмадзода ба Анвар Отаев манзур карда шуд. Сардори Экспедитсияи комплекси геологии Қайроққум Худойназар Амонзода соҳибҷашнро аз номи ҷомеаи меҳнатии корхона табрик намуд.

ҶАЛАСАИ ШӮРОИ СОБИҚАДОРОН

Дар толори мактаби санъат ҷаласаи ҳисоботии Шӯрои собиқадорони меҳнати шаҳри Гулистон баргузор гардид. Дар он аъзои кумиҷроияи Шӯро ва раисони ташкилотҳои ибтидоӣ ширкат варзиданд.

Раиси Шӯрои собиқадорони ҷангу меҳнати шаҳр Каромат Қосимова доир ба фаъолияти Шӯро дар давоми соли 2020 муфассал маърӯза намуд. Дар музокираи масъалаи асосӣ Орифҷон Мулллоҷонов раиси ташкилоти ибтидоии Шӯрои собиқадорони меҳнати шаҳраки Адрасмон, Шарофат Гулмуродова муовини раиси ташкилоти ибтидоии Шӯрои собиқадорони меҳнати шаҳраки Чоруқдаррон, Зулхумор Холиқова раиси ташкилоти ибтидоии Шӯрои собиқадорони меҳнати шаҳраки Консой иштирок намуданд.

ОМОДАГӢ БА ДАЪВАТИ БАҲОРОНА

Дар толори хурди мақомоти иҷроияи ҳокимияти давлатии шаҳри Гулистон бо иштироки Нуринисо Комилзода муовини якуми Раиси шаҳри Гулистон, комиссари комисариати ҳарбии шаҳр, раисони ҷамоати шаҳракҳо, раисони кумитаи маҳаллаҳо ва дигар аъзои комиссияи даъвати ҳарбӣ доир ба омодагӣ ба даъвати баҳории ҷавонон ба хизмати ҳарбӣ ҷаласаи корӣ баргузор гардид.

Ҷаласаро муовини якуми Раиси шаҳр Нуринисо Комилзода оғоз бахшида, нақшаи тасдиқгардидаро ба самъи иштирокчиён расонид. Қайд гардид, ки то оғози мавсими даъват моро зарур аст, аз ҳозир корҳои тарғиботию ташвиқотиро дар байни ҷавонони синни то даъватӣ ва волидайни онҳо вусъат бахшем. Ҳамчунин ба раисони маҳаллаҳо супориш дода шуд, ки вобаста ба даъвати баҳорӣ корҳои фаҳмондадиҳиро дар маҳалҳо тавсеа диҳанд.