ТОҶИКИСТОН – САРЗАМИНИ ОРЗУҲО

Бо мақсади иҷрои дастур ва супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати  тарғибу ташвиқи дастовардҳои кишвари соҳибистиқлоламон тавассути матбуот, радио, телевизион ва агентиҳои иттилоотӣ Иттифоқи журналистони Тоҷикистон якҷоя бо Кумитаи рушди сайёҳии назди Ҳукумати Ҷумҳурии Тоҷикистон ва Мақомоти иҷроияи ҳокимияти давлатии ВМКБ, вилоятҳои  Хатлону Суғд, шаҳри Душанбе ва шаҳру ноҳияҳои тобеи Марказ корвони иттилооти журналистон таҳти унвони “Тоҷикистон – сарзамини орзуҳо”-ро дар ҳайати беш аз 30 нафар аз телевизион, радио, рӯзномаву маҷаллаҳо ва оҷонсиҳои иттилоотӣ ҷалб намуда, тибқи нақша рӯзҳои 27-29 августи соли ҷорӣ аз шаҳру навоҳии вилояти Суғд боздид намуданд.

Тибқи нақша субҳи 29-уми августи соли ҷорӣ боздиди корвони иттилооти журналистон таҳти унвони “Тоҷикистон – сарзамини орзуҳо дар шаҳри Гулистон оғоз гардид. Корвони иттилооти журналистонро муовини раиси шаҳр Ғайрат Оқилзода ва сармуҳаррири рӯзномаи шаҳрии “Соҳил” Лоҳур Назришозода бо ҳайати кормандон қабул намуданд. Сараввал корвони иттилооти журналистон аз ҶСК “Қолинҳои Қайроққум” дидан намуданд. Абдулмуталлиб Абдуллоев директори ҶСК “Қолинҳои Қайроққум” доир ба пайдоиш, фаъолияти меҳнатӣ, иқтидор, таъсири пандемия ва фаъолияти имрӯзаи коргоҳ ба рӯзноманигорон маълумот дод. Сипас корвони иттилоотии журналистон аз наздик бо фаъолияти ҶСК “Қолинҳои Қайроққум”, ки яке аз корхонаҳои азими қолинбофии ҷумҳурӣ ба ҳисоб меравад боздид намуданд. Зимни боздид рӯзноманигорон аз сехи истеҳсолӣ ва намоиши қолинҳо дидан карданд. Ба рӯзноманигорон иттилоъ дода шуд, ки тариқи сомонаи “Kolin.tj”  мизоҷон метавонанд бо маҳсулоти истеҳсолии корхона шинос шаванд ва онҳоро барои худ фармоиш диҳанд.

Оғози мумфаршкунии роҳи Бӯстон-Зарнисор

Бо дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон корҳои ободонию созандагӣ бунёди роҳу купрукҳо ва дигар иншоотҳои ҳаётан зарурӣ аз ҷониби корхонаҳои саноатию истеҳсолӣ, соҳибкорону саховатмандон дар сартосари кишвари азизамон авҷи тоза доранд.

Дар ҳамин радиф 28 августи соли 2021 бо маблағгузории Ширкати кӯҳӣ-саноатии Тоҷикистону Хитой аз тарафи ҶДММ МКМ “Сомонӣ” таъмири роҳи Бӯстон-Зарнисор оғоз шуд. Дар ифтитоҳи таъмири роҳи мазкур Раиси вилояти Суғд Раҷаббой Аҳмадзода иштирок ва суханронӣ намуд. Қайд карда шуд, ки чунин амалҳои хайр аз қабили бунёди роҳу купрукҳо, кофтани каналу ҷуйҳои об ва дигар корҳое, ки манфиати умумӣ доранд хайру савоби зиёд аст ва пешравии кор низ аз баракати он дучанд мегардад. Мавсуф оғози таъмири роҳи мазкурро аз иқдомҳои наҷиби Сарвари Давлат маънидод намуда, таъкид кард, ки Ширкати кӯҳӣ-саноатии Тоҷикистону Хитой аз рузҳои аввали таъсисёбиаш то имрӯз бисёр корҳои хайрро ба иҷро расонида дар рушди соҳаҳои гуногуни хоҷагии халқ ҳиссаи назаррас дорад.

Президенти Ҷумҳурии Тоҷикистон Эмомалӣ Раҳмон бо Президенти Шӯрои Аврупо Шарл Мишел суҳбати телефонӣ доир намуданд

Дирӯз бо ташаббуси Президенти Шӯрои Аврупо Шарл Мишел суҳбати телефонии он ҷониб бо Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон доир гардид.

Дар оғози суҳбат Пешвои миллат ба ҷаноби Шарл Мишел барои ташаббуси баррасии мушкилоти Афғонистон изҳори сипос намуданд.

Ҷонибҳо бо нигаронӣ рушди кунунии вазъи буҳронӣ дар ин кишварро зикр карданд.

Сарвари давлати мо иброз доштанд, ки бинобар хуруҷи босуръати неруҳои эътилофи байналмилалӣ, Афғонистони азияткашида дар остонаи фалокати гуманитарӣ ва оғози мавҷи нави муқовимати тӯлонии шаҳрвандӣ, ки бо мушкилот ва таҳдидҳои нав барои тамоми минтақаи Осиёи Марказӣ оқибатҳои ногувор меорад, қарор дорад.

Пешвои миллат Эмомалӣ Раҳмон аз хоҷагии деҳқонии ангурпарварии «Ҳоҷӣ Неъмат» дар шаҳри Турсунзода боздид ба амал оварданд

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ дар шаҳри Турсунзода аз хоҷагии деҳқонии ангурпарварии «Ҳоҷӣ Неъмат» боздид намуданд. Хоҷагии деҳқонии ангурпарварии «Ҳоҷӣ Неъмат» соли 2011 таъсис ёфта, дар ихтиёри худ 105 гектар замин дорад ва аз ин ҳисоб 100 гектараш токзор мебошад. Дар хоҷагии мазкур 165 нафар саҳмдор фаъолият карда, асосан ангури навъҳои «шоҳона», «ҳусайнӣ», «ғалаба», «кардинал»-ро, ки хуштаъму болаззат ва аз лиҳози экологӣ тозаи табиӣ мебошанд, истеҳсол мекунанд.

Соли дуюм аст дар хоҷагии деҳқонии ангурпарварии “Ҳоҷӣ Неъмат” парвариши ангури навъи «Президент» ба роҳ монда шудааст, ки ҳосилнокии баланд дорад. Бояд тазаккур дод, ки муассиси хоҷагии деҳқонии ангурпарварии “Ҳоҷӣ Неъмат” деҳқони ботаҷриба ва токпарвари шинохтаи ҷумҳурӣ Неъмат Усмонов мебошад ва ҳоло роҳбарии хоҷагиро писари ӯ Расул Неъматов ба уҳда дорад. Аҳли заҳмати хоҷагӣ бо истифода аз обу ҳавои мусоид ва усулҳои санҷидашудаи парвариши боғи ангур ҳамасола ҳосили фаровон ба даст меоранд. Президенти мамлакат муҳтарам Эмомалӣ Раҳмон дар ҳудуди хоҷагии деҳқонии “Ҳоҷӣ Неъмат” бо боғи ангур, ки бо санъати баланди касбӣ кишту парвариш меёбад, шинос шуда, таъкид намуданд, ки аз хӯшаҳои сербори токҳои ангур аён аст, ки ҳосилнокӣ имсол фаровон аст.