Шиносоӣ бо сохтмони иншооти гуногун дар шаҳри Гулистон

Дар шаҳри Гулистон бо ташаббуси ҶДММ «Мурғи бебаҳо» ва ҶДММ «Ганҷи сомон» бунёди​ фабрикаҳои парандапарварӣ идома дошта, бо фаъол шудани онҳо даҳҳо нафар соҳиби ҷойи корӣ мегарданд.​ 8 декабр​ Раиси вилояти Суғд Раҷаббой Аҳмадзода бо ҷараёни бунёди фабрикаҳои нав шинос гардид.

Боиси зикр аст, ки дар шаҳри Гулистон бо мақсади расидан ба ҳадафи чоруми милливу стратегӣ — саноатикунонии босуръати кишвар тадбирҳои зарурӣ амалӣ гардида, соҳибкорон бо истифода аз имкониятҳои фароҳамовардаи давлат корхонаҳои гуногун сохта, саҳми назарраси худро дар саноатикунонии кишвар​ гузошта истодаанд.

Зимни шиносоӣ иттилоъ дода шуд, ки фабрикаи парандапарварии​ ҶДММ «Мурғи бебаҳо» дар масоҳати наздик 2 га сохта шуда, дар он 10 нафар бо ҷои корӣ таъмин хоҳанд шуд. Ҳоло таҷҳизоти зарурӣ барои фабрика ворид гардида, 20 ҳазор сар чӯҷа парвариш карда мешавад.​

16-РӮЗИ АЛАЙҲИ ХУШУНАТ!

Тибқи нақшаи чорабиниҳои бахши кор бо занон ва оилаи МИҲД-и шаҳр бахшида 16-Рӯзи алайҳи хушунат нисбати занон дар толори КИ ҲХДТ дар шаҳр семинари машваратӣ баргузор гардид.

Дар семинари мазкур Шуҷоат Ҳасановна намояндаи Шӯрои машваратии ташкилотҳои ҷамъиятии вилояти Суғд, Моҳира Раҳимзода - намояндаи Кумитаи иҷроияи Ҳизби Халқии Демократии Тоҷикистон дар вилояти Суғд,  Мадина Каримова – намояндаи Мақомоти иҷроияи ҳокимияти давлатии шаҳр ва Ҷамолиён Муслимахон раиси КИ ҲХДТ дар шаҳр иштирок доштанд.

Таъкид карда шуд, ки бо қарори СММ ҳамасола аз санаи 25-уми ноябр то санаи 10-уми декабр 16-рӯзи алайҳи хушунат нисбат ба занону духтарон таҷлил карда мешавад. 16 рӯзи мубориза алайҳи зӯроварии асоси гендерӣ маъракаи солонаи байналмилалӣ мебошад, ки 25-уми ноябр Рӯзи байналмилалии барҳам додани хушунат нисбат ба занон оғоз ёфта, то 10 декабр Рӯзи ҳуқуқи инсон идома меёбад.

Ҷамъомади тантанавӣ ба муносибати Рӯзи кормандони мақомоти молия

Имрӯз, 07.12.2022 дар толори хурди мақомоти иҷроияи ҳокимияти давлатии шаҳр ба муносибати Рӯзи кормандони мақомоти молия ҷамъомади тантанавӣ баргузор шуд.

Раиси шаҳри Гулистон Раъно ҳошимзода кормандони Раёсати молияи шаҳрро ба муносибати таҷлили Рӯзи кормандони мақомоти молия муборакбод гуфт.

Зикр карда шуд, ки ҳамасола санаи 7-уми декабр Рӯзи кормандони мақомоти молия дар кишварамон таҷлил мегардад.

Бо ибтикори Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мамлакат низоми идоракунии устувори молиявӣ ҷавобгӯ ба талаботи иқтисоди бозорӣ ташкил ва ташаккул ёфтааст.

Табрикоти Раиси шаҳри Гулистон Раъно Ҳошимзода ба муносибати Рӯзи кормандони мақомоти молия

Муҳтарам кормандони мақомоти молияи шаҳр!

Ҳамасола санаи 7-уми декабр Рӯзи кормандони мақомоти молия дар кишварамон таҷлил мегардад. Шумо кормандони Раёсати молияи шаҳрро бо иди касбиатон табрику таҳният намуда, бароятон солимӣ, саодати рӯзгор ва дар фаъолияти пурмасъулатон комёбиҳои тоза ба тоза таманно дорам.

Ҳанӯз дар даврони Сомониён низоми молиявӣ ташкил ва рушд ёфта, дар даврони сулолаи ориёӣ низоми ташаккули идоракунии захираҳои молиявӣ ва усулҳои пешқадами муомилоти пулӣ амал мекарданд, ки вобаста ба замон аз нигоҳи ҳуқуқӣ ва иқтисодӣ такмил ёфтанд. Дар даврони шӯравӣ дар Ҷумҳурии Тоҷикистон низоми молиявӣ ба сохти дигар ташкил ёфта, тӯли беш аз 70 сол рушд карда, мавриди истифода қарор гирифт.

Баъди таъсиси Ҷумҳурии Мухтори Шӯравии Сотсиалистии Тоҷикистон сохтори муташаккилу бонизоми молия ба фаъолият шурӯъ намуд. 7 декабри соли 1924 Комиссариати халқии молияи Ҷумҳурии Мухтори Шӯравии Сотсиалистии Тоҷикистон бо қарори Кумитаи инқилобии Ҷумҳурии Мухтори Шӯравии Сотсиалистии Тоҷикистон таъсис ёфт. 23 июни 1993 бо қарори Девони Вазирони Ҷумҳурии Тоҷикистон Вазорати молия ҳамчун сохтори алоҳида ба фаъолият пардохт.