“Соли 2016 – Соли маҳалла, деҳа ва шаҳраки обод”

Қарори навбатии Раиси шаҳри Қайроққум №2, аз 15-уми январи соли 2016 ба тасвиб расида буд. Тибқи он бо мусоидат ба қарори Раиси вилояти Суғд аз 16-уми декабри соли 2015, таҳти №546 “Дар бораи тасдиқ намудани Барномаи вилоятии “Соли 2016 - Соли маҳалла, деҳа ва шаҳраки обод” нақша-чорабиниҳои Мақомоти иҷроияи ҳокимияти давлатии шаҳр оид ба иҷрои Барнома тасдиқ гардидааст.

Шуъбаю бахш ва Ҷамоати шаҳракҳо дар ҳамкорӣ бо корхонаву ташкилотҳо, муассисаҳо ва кумитаи маҳаллаҳои қаламрави шаҳр дар арафаи омодагӣ ба таҷлили Наврӯзи байналмилал ва сазовор истиқбол гирифтани бузургтарин ҷашни миллӣ биступанҷумин солгарди Истиқлолияти давлатии Тоҷикистон баҳри татбиқи амалии нақша-чорабинӣ тадбирҳои зиёдеро аз қабили гулу ниҳолшинонӣ, тоза намудани маҳалли зист аз партовҳо, вусъати корҳои рангу бори биноҳо ва амсоли инҳоро ба тариқи ҳашари дастаҷамъона роҳандозӣ менамоянд.

Дуои неки ниёзмандон

Хайру садоқат ва таваҷҷӯҳ ба табақаҳои нодор амали неку кори савоб аст. Мақомоти иҷроияи ҳокимияти давлатии шаҳр дар рӯзҳои ид то қадри имкон ба ниёзмандон дасти мадад дароз менамояд.

Ба ин иқдоми анъанавии Раиси шаҳри Гулистон Матлубахон Амонзода шахсони хайрхоҳ ва сарпарастон низ пайравӣ мекунанд.

Дар арафаи иди Наврӯз бо ҳидояти Раиси шаҳр 15 нафар ашхоси ниёзманд аз ҷониби кормандони масъули шуъбаи хизматрасонӣ дар хона бо маводҳои озуқа аёдат карда шуданд. Бо сипосмандӣ дасти дуо бардоштани нафарони осебпазири ҷомеа дар ҳаққи инсонҳои қадршинос ва хайрхоҳ ифодагари хушбахтию хурсандии эшон буд.

Пирӯзии “Суғдиён”

16-уми март дар кӯдакистони “Офтобак”-и маркази шаҳр дар доираи чорабиниҳои идона ба ҷашни Наврӯзи байналмилал ва 25-умин солгарди Истиқлолияти давлатии Ҷумҳурии Тоҷикистон озмуни “Калидчаи заррин” доир гардид. Мавзӯи озмун “Риояи қоидаҳои бехатарӣ аз сӯхтор” буд.

Тарбиятгирандагони муассисаҳои томактабӣ тибқи шартҳои озмунӣ шеърхонӣ, гуфтори адабӣ, намоиши саҳнача ва эҷодкорӣ маҳорати хешро намоиш доданд. Дастаи “Суғдиён” нисбати дигар ҳарифони кӯдакистонҳои “Офтобак”, “Ситора” ва “Бобуна” хубу ҷолиб шартҳоро иҷро намуда, мақоми ифтихориро ноил гардид.

Муборакбодии Раиси шаҳри Гулистон ба ифтихори Наврӯзи байналмилал

Ба муносибати ин рӯзи саид ва ҷашни барои ҳар яки мо бузургу муқаддас, ки чанд сол боз мақоми байналмилалӣ гирифтааст, тамоми мардуми саодатманди шаҳрро сидқан табрик гуфта, ба хонадони ҳар яки шумо хуррамиву хушҳолии наврӯзӣ, файзу нусрати баҳорӣ ва тандурустиву баракати рӯзгор орзу менамоям.

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон таъкид намудаанд, ки “Наврӯз чун рамзи пайванди азалии инсон бо табиат дар шабу рӯзҳои эътидоли баҳориву иваз шудани сол фаро мерасад ва бо расидани он рӯзгори куҳан зиндагиро аз сар мегирад, табиату ҳастӣ рахти нав ба тан мекунанд ва дар рӯҳу ҷони одамон гардише падид меояд”.

Наврӯз ҳамчун қадимтарин ва зеботарин ҷашни мардумӣ дар домони табиати зебои кӯҳандиёри мо зуҳур кардааст. Наврӯз бо обу хок, марзу бум ва руҳи зиндагисозу тамаддунофари аҷдоди мо пайванди ногусастанӣ дошта, расму ойинҳои он дорои рамзҳое мебошанд, ки аз қадим то имрӯз бо рӯзгори мардуми созандаву ободгар ва фарҳангиву таҳаммулгарои мо созгоранд. Дар ин рӯз табиат ва инсон нерӯи тоза пайдо карда, дилу андешаҳо ба ҳам меоянд, одамон некиву накӯкорӣ ва амалҳои хайру савобро тарғиб месозанд, ки ҳамаи онҳо аз рисолати фарҳанги оламшумули сулҳофар ва ваҳдатгарои халқи мо шаҳодат медиҳанд.