«Ваҳдати миллӣ такмилбахши саодати халқ»

Аз 14 то 16-уми июн дар зиёда аз 40  корхонаву ташкилот ва Ҷамоати шаҳракҳо бо иштироки намояндагони ҷомеаҳои меҳнатӣ хониши сиёсӣ дар мавзӯи «Ваҳдати миллӣ такмилбахши саодати халқ» баргузор гардид.

Устодони Донишгоҳи давлатии ҳуқуқ, бизнес ва сиёсати Тоҷикистон Саидумрон Саидов ва Ҷўрабек Исомиддинов якҷоя бо тарғиботчиёни маҳаллӣ оид ба моҳияти суботи ҷомеа, оромию ҳамдигарфаҳмӣ, ваҳдати миллӣ ва заҳматҳои беназиру пайгиронаи Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон созишномаи умумии истиқрори сулҳ ва ризоияти миллӣ, дар ҷаҳони муосир шинохта шудани Тоҷикистон ҳамчун давлати сулҳпарвар, мавриди омўзиш қарор гирифтани сулҳи бебозгашти тоҷикон, дастовардҳои даврони соҳибистиқлолӣ дар назди ҳузурдоштагони чорабинӣ ҳарф заданд.

Коҳиши хароҷот ба нафъи мардум

8-уми июн ба қабули Қонуни ҶТ “Дар бораи танзими анъана ва ҷашну маросимҳо дар Ҷумҳурии Тоҷикистон” 9 сол пур шуд.

Ба ин муносибат дар шаҳраки Сирдарё бо иштироки мудири бахш оид ба корҳои дин, танзими анъана ва ҷашну маросимҳои миллии МИҲД Манучеҳр Шарипов, ваколатдори оперативии ШВКД ҶТ дар шаҳри Гулистон Ў.Фатҳуллоев вохўрӣ бо фаъолон доир гардид. Раиси Ҷамоати шаҳрак Ойнисо Раҳматова оид ба ҳадафи чорабинӣ ҳарф зад.

“Баёзи Гулистон”

Бо ибтикори Раиси шаҳри Гулистон Матлубахон Амонзода ашъори дастаҷамъонаи сухангустарони шаҳри соҳили “Баҳри Тоҷик” ба ифтихори ҳумоюнҷашни 25-солагии Истиқлолияти давлатии Ҷумҳурии Тоҷикистон таҳти чунин унвон аз чоп баромад.

Дар маҷмўа нигоштаҳои соҳибқаламони гулистонӣ, ки фарогири мавзўҳои даврони истиқлоланд, гирдоварӣ шудааст. Китоб аз фаслҳои “Назм”, “Азизони равоншоди сухан”, “Наср”, “Андешаҳо”, “Модарнома”, “Гултаронаҳо”, “Адибони русзабон” ва “Чакидаи хомаи ўзбекзабонон” иборат мебошад.

“Баёзи Гулистон” армуғони маънавие аз дастагули муаттари гулҳои рангин – шеъру тарона, қиссаву андешаҳои боғи тахайюлоти суханварон ба кулли ҳаводорони чаманистони назму наср аст.

Пирўзии варзишгарони гулистонӣ

3 - 4-уми июни соли равон дар толори варзишии “Истиқлол” мусобиқаи кушоди гўштини тарзи юнонӣ – румӣ доир гардид.

Мусобиқа дар доираи чорабиниҳои ҷашнӣ ба истиқболи 25- солагии Истиқлолияти давлатии Ҷумҳурии Тоҷикистон ба вуқўъ пайваста, он ба гиромидошти нахустин Прокурори генералии Ҷумҳурии Тоҷикистон Нурулло Ҳувайдуллоев бахшида шуд.

Дар маросими ифтитоҳи мусобиқа мудири бахши ҷавонон, варзиш ва сайёҳии шаҳр Саида Ғоибова ва намояндаи оилаи сарпараст Таваккал Файзуллоев ба иштирокдорон комёбӣ орзу карда, таъкид доштанд, ки ҳадафи мусобиқа рушди тарбияи ҷисмонӣ, тарғиби тарзи ҳаёти солим, ҷалби ҳарчи бештари аҳолӣ бахусус ҷавонон ба варзиш мебошад.