Ҳомии Ватан бошем

Рӯзи 18 феврал дар қаламрави шаҳр Рӯзи ягонаи ахбор дар мавзӯи «Ҳифзи Ватан – вазифаи муқаддаси ҳар як шаҳрванд» дар ҷомеаҳои меҳнатии беш аз 40 корхонаву муассисаҳо ва Ҷамоати шаҳракҳо муташакилона ба вуқӯъ пайваст.

Дар баргузории он тарғиботчиён аз мақомоти иҷроияи ҳокимияти давлатии вилоят ва шаҳр ширкат варзида, роҷеъ ба мавзӯи мазкур, ҳамзамон доир ба лоиҳаи тағйироту иловаҳо ба Конститутсияи (Сарқонуни) Ҷумҳурии Тоҷикистон мубодилаи афкор намуданд.

Иншоотҳои ҷашнӣ

Дар арафаи ҷашни байналмилалии Наврӯз ҷиҳати истиқболи шойистаи иди аҷдодӣ чор иншооти аҳамияти иқтисодиву иҷтимоӣ дошта мавриди баҳрабардорӣ қарор хоҳад гирифт.

Хонаи истиқоматии панҷошёна, дорои 66 ҳуҷра,  бинои истиқоматӣ бо нуқтаи савдо ва хизматрасонӣ, Маркази савдо ва хизматрасонӣ, корхонаи истеҳсоли лӯлаҳои чоркунҷа ва доирашакл аз ҷумлаи  армугонҳои идона мебошанд.  Баъдан ошхонаи миллӣ дорои 110 ҷойи нишаст дар кӯчаи ба номи Исмоили Сомонӣ, сехи коркарди мева, коргоҳи истеҳсоли мебел, комплекси парвариши чорвои калони шохдор, сехи ордбарорӣ ва Маркази хизматрасонӣ ва савдо дар кӯчаи Истиқлол бошанд аз он иншоотҳои ҷашнӣ махсуб меёбанд, ки дар рӯзҳои тантанаи  25-умин солгарди Истиқлолияти давлатии Ҷумҳурии Тоҷикистон ифтито меёбанд.

Ёрӣ ба соҳаи тандурустӣ

Дар доираи Барномаи “Соли фарди солим”, ки дар вилояти Суғд эълон шудааст, бо ибтикори Матлубахон Амонзода, Раиси шаҳри Қайроққум барои тармиму таҷдиди иншоотҳои соҳаи тандурустӣ аз маблағҳои иловагии буҷаи шаҳр 35 ҳазор сомонӣ ҷудо гардид.

Вакили Маҷлиси вакилони халқи шаҳр, сарвари “Бунёди шафқати ба номи Т.Зокирова” соҳибкор Турсуной Зокирова бо пайрави ба ин иқдом таҷҳизотҳои муосири тиббиро, ки арзиши умумии онҳо зиёда аз 100 ҳазор сомонӣ аст, барои беморхонаю Марказҳои саломатӣ ройгон тақдим намуд.

Мамнунии ниёзмандон

Раиси шаҳри Қайроқум Матлубахон Амонзода боз ба як амали хайру  шоиста ибтидо гузошт. Барои ашхоси ниёзманд дар ошхонаю чойхонаҳои воқеъ дар ҳудуди шаҳр, аз қабили “Соҳил”, “Олимҷон”, “Алишер” ва “Шиноварак” ҳафтае се маротиба ба таври ройгон дар нимаи рӯз хӯроки гарм ташкил карда шуд. Аз ин ташаббус ва саховати соҳибкорони нуқтаҳои хӯрока аҳли ҷомеа изҳори сипос мекунанд.