Мусобиқаи волейбол

Дар толори варзишии МТМУ  №3 бахшида ба Рӯзи Модар мусобиқаи волейбол таҳти шиори «Оилаи солим, ҷомеаи солим» байни духтарон ва писарон байни 6 даста гузаронида шуд. Дар фарҷоми мусобиқа дастаҳои ғолиб бо дипломҳои дараҷавӣ ва туҳфаҳои хотиравии бахши ҷавонон, варзиш ва сайёҳии шаҳр сарфароз гардонида шуданд.

Мулоқот бо ҷавонон

Дар партави Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба Маҷлиси Олии кишвар, беҳдошти тарзи ҳаёти солим, баланд гардидани сатҳи маърифатнокӣ ва маънавиёти ҷавонон баҳри эмин будани онҳо аз хатарҳои аввалиндараҷаи ҷаҳони муосир, худкушӣ, пешгирии шомилшавии ноболиғону ҷавонон ба гурӯҳҳои ҷиноятпеша, тамоилҳои бегонапарастӣ ва бо ин васила тарбия намудани насли наврас дар рӯҳияи баланди ватандорӣ, муқаддасоту арзишҳои миллӣ вохӯрии намояндагони  мақомоти иҷроияи ҳокимияти давлатии шаҳр дар толори муассисаи таълимии №3-и Ҷамоати Консой бо ҷавонон баргузор гардида, дар он зиёда аз 200 нафар ҷавонони фаъол, омӯзгорони ҷавон, пирони рӯзгордида, падару модарон, варзишгарон ва раисони маҳаллаҳо ширкат варзиданд. 

Паём раҳнамои ҷавонон

Бо ташаббуси бахши ҷавонон, варзиш ва сайёҳӣ дар МТМУ-и №3, шаҳраки Консой бо ҳадафи баланд бардоштани маърифати сиёсии ҷавонон, пешгирии онҳо аз шомилшавӣ ба ҳар гуна ҳизбу ҳаракатҳо ва иштироки фаъолона дар пешрафти ҷомеа вохӯрӣ доир гардид.

Роҷеъ ба нуктаҳои асосии Паёми Пешвои миллат ва тағйиру иловаҳо ба Конститутсияи (Сарқонуни) мамлакат мудири бахши ҷавонон варзиш ва сайёҳӣ Саида Ғоибова, сармутахассиси шуъбаи рушди иҷтимоӣ ва робита бо ҷомеа Фахриддин Бегов ва директори МД “Мактаби варзишии бачагон ва наврасони шаҳри Қайроққум” Темурхон Қаюмов дар назди мактабиён баромад намуданд.

Баракати кори дастҷамъона

Ба ифтихори пешвози арзандаи ҷашни чорякасраи Истиқлолият дар вилояти Суғд «500 рӯзи меҳнати зарбдор ба истиқболи 25-солагии Истиқлолияти давлатии Ҷумҳурии Тоҷикистон» эълон шудааст.

Мардуми шаҳри Қайроққум ин иқдомро пайгирӣ намуда, баробари вусъати корҳои ободкориву созндагӣ ҳамзамон ба ҳашарҳои дастаҷамъона мебароянд. Рӯзҳои истироҳат сокинони кӯчаи ба номи С.Айнӣ ба ҳашари навбатӣ баромада ҷӯю рӯдхонаҳоро тоза, бехи дарахтону навниҳолонро нарм карда қариб 50 бех ниҳолони шафтолую зардолу ва сафедор шинониданд. Бошандагони маҳалла аз ташаббуси Раиси шаҳри Қайроққум Матлубахон Амонзода бобати ҳар ҳафта гузаронидани шанбегӣ бо ҳадафи таъмини тозагӣ, чун огаҳӣ ёфтанд ҳама ин иқдомро пайравӣ намуда бо ҳисси баланди масъулиятшиносӣ ва маърифати баланди шаҳрдорӣ ба ҳашар баромаданд, - ҳини сӯҳбат иброз дошт, яке аз сокинони маҳал, ҷанговари байналмилал Қурбонбой Бозоров.