Муносибати салоҳиятнокӣ дар зинаи таҳсилоти ибтидоӣ

Тибқи нақшаи нимсолаи кабинети методии шуъбаи маорифи шаҳр таҳти ин унвон семинари омӯзишӣ дар муассисаи таълимии №14-и маркази шаҳр баргузор гардид.

Омӯзгорони пуртаҷрибаи муассисаи таълимии номбурда дар шаш синфи ибтидоӣ дарсҳои кушоди намунавӣ, соати тарбиявӣ ва маърӯзаҳоро ба самъи иштирокчиёни семинар расониданд. Тазаккур бояд дод, ки 41 нафар омӯзгорони синҳои ибтидоии муассисаҳои таълимии шаҳр дар семинар ширкат варзида, дар интиҳо таклифу пешниҳ¬од ва андешаҳои худро нисбати раванди дарсҳо, маърӯзаҳо иброз доштанд.

Солимии ҷомеа – кафили рушди Тоҷикистон

Ҳафтаи гузашта дар зиёда аз 43 корхонаву муассиса, ташкилоту идораҳои маркази шаҳр ва ҷамоати шаҳракҳо Рӯзи ягонаи ахбори сиёсӣ дар мавзӯи «Солимии ҷомеа – кафили рушди Тоҷикистон» ба вуқӯъ пайваст.

Тарғиботчиён аз мақомоти иҷроияи ҳокимияти давлатии вилояти Суғд Бароат Маҳкамова-дотсенти ДДХ ба номи академик Бобоҷон Ғафуров, Ҷумъабой Ёқубов-дотсенти ДДҲБСТ, Равшан Усанов-дотсенти ДДХ ба номи академик Бобоҷон Ғафуров ва тарғиботчиёни маҳаллӣ дар назди ҷомеаҳои меҳнатӣ баромад намуда, зирк карданд, ки Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон зимни ироаи Паёмашон ба Маҷлиси Олии Ҷумҳурии Тоҷикистон 22-юми декабри соли 2016 рушди соҳаи тандурустиро самти афзалиятнок муайян намуда, бори дигар таъкид доштанд, ки ҳукумати ҷумҳурӣ дар раванди идомаи ислоҳоти соҳаи нигаҳдории тандурустӣ ва масъалаҳои беҳтар намудани дастрасӣ, сифат ва самаранокии хизматрасонии тиббӣ ба аҳолӣ, инчунин, рушди шаклҳои нави кӯмаки аввалияи тиббию санитарӣ аҳамияти хоса медиҳад, зеро миллати солим таҳкурсии ҷомеаи солим мебошад.

Ярмаркаи ҷойҳои холии кор

Дар толори бахши фарҳанги шаҳр тибқи қарори Раиси шаҳри Гулистон аз тарафи шуъбаи Агентии меҳнат ва шуғли аҳолии шаҳр ярмаркаи ҷойҳои нави корӣ ташкил ва гузаронида шуд.

Барои корҷӯёни гулистонӣ дар ярмарка 246 ҷойи нави корӣ аз тарафи 12 корхонаву муассисаҳо пешниҳод гардид.

Комёбии Носир ва Шоҳрух

Даври ниҳоии Олимпиадаи фаннии хонандагон санаи 15-16-уми апрели соли 2017 дар мактаби байналмиллалии президентӣ аз фанҳои таълимӣ дар шаҳри Душанбе баргузор гардид. Дар даври ниҳоӣ ғолибони даври вилоятӣ аз фанҳои таълимӣ иштирок намуданд.

Аз муассисаҳои таълимии шаҳри Гулистон 2 нафар: Толибоев Носир хонандаи синфи 11-и МТМУ №1-и маркази шаҳр аз фанни забон ва адабиёти рус ва Юлдошев Шоҳрух хонандаи синфи 11-и МТМУ №8-и ҷамоати шаҳраки Сирдарё аз фанни география иштирок карда, ба натиҷаҳои назаррас ноил гардиданд. Шоҳрух Юлдошев барои иштироки фаъолона бо Ифтихорномаи Вазорати маориф ва илми ҷумҳурӣ қадрдонӣ карда шуд.