Раиси шаҳри Гулистон Матлубахон Амонзода ҳафтаи сипаришуда дар толори хурди мақомоти иҷроияи ҳокимияти давлатии шаҳр бо бонувони фаъоли Ҳизби халқии демократии Тоҷикистон аз тамоми шаҳру навоҳии вилояти Суғд мулоқот доир намуд.
Раиси шаҳр зимни суханронии хеш роҷеъ ба ғамхориҳои рўзафзуни Пешвои миллат ва Ҳукумати ҷумҳурӣ бобати баланд бардоштани мақоми зан дар ҷомеа, саҳм ва иштироки занон дар рушд ва инкишофи соҳаҳои хоҷагии халқ, мавқеи калидӣ доштани зан-модар дар тарбияи насли наврас ҳарф зад. Мудири шуъбаи кор ба занони кумиҷроияи ҲХДТ дар вилояти Суғд Фирўза Раҳимӣ нисбати пазироии гарму ҷўшон ва баргузории чорабинии «Бонуи беҳтарини ҳизб» изҳори миннатдорӣ намуд. Бонувон-намояндагони кумиҷроияҳои ҳизбии шавҳру ноҳияҳо ҳамчунин, аз осорхонаи корхонаи овозадори «Қолинҳои Қайроққум» дидан намуданд.
Дар толори бахши фарҳанги шаҳр мулоқот-суҳбати кормандони масъули мақомоти ҳокимияти давлатӣ, мақомоти ҳарбӣ, аъзои ташкилоти ҷамъиятии «Сипарони Ватан» бо даъватшавандагон, волидайн ва хонандагони муассисисаҳои таълимии шаҳр дар мавзўи «Хизмат дар сафи Қувваҳои Мусаллаҳ шараф аст» доир гардид. 
Тибқи нақшаи чорабинии мақомоти иҷроияи ҳокимияти давлатии шаҳр дар маҳаллаи №1-и кўчаи Истиқлол - хонаҳои 3,5,8, кўчаи Исмоили Сомонӣ хонаҳои 4,5,6,7,8 вохўри бо сокинон бо котиби масъули комиссияи ҳифзи ҳуқуқи кўдаки шаҳр Д. Шокирова, мудири бахши кор бо занон ва оила О. Раҳматова, сармутахассиси бахши ҷавонон, варзиш ва сайёҳӣ Н. Шарифов, нозири шуъбачаи гурўҳи пешгирии ҳуқуқвайронкунӣ байни ҷавонону ноболиғони ШВКД-и Гулистон Ф. Юлдошев, нозири минтақавӣ Қ. Аҳмадов баргузор гардид.
Дар муассисаи таҳсилоти миёнаи умумии №1 озмуни шаҳрии «Лоиқхонӣ» баргузор гардид. Дар ин чорабинӣ хонандагони аз 15 муассисаи таҳсилоти миёнаи умумии шаҳр ва шаҳракҳои тобеи он иштирок намуданд.
