Сарвари давлат Эмомалӣ Раҳмон дар шаҳри Душанбе Корхонаи истеҳсоли маҳсулоти гӯштӣ ва ҳасибҳои ҶДММ «Акома»-ро ифтитоҳ намуданд

13 сентябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар ноҳияи Синои пойтахт Корхонаи истеҳсоли маҳсулоти гӯштӣ ва ҳасибҳои Ҷамъияти дорои масъулияти маҳдуди “Акома”-ро мавриди истифода қарор доданд.

Корхонаи муосири истеҳсоли маҳсулоти гӯштӣ ва ҳасибҳо аз ҷониби соҳибкорони ватандӯст дар доираи иҷрои ҳадафи стратегии саноатикунонии босуръати кишвар ва Солҳои рушди саноат ба хотири таъсиси ҷойҳои нави корӣ ва истеҳсоли маҳсулоти хушсифати ивазкунандаи воридот сохта шудааст.

Иқтидори истеҳсоли маҳсулоти гӯштӣ ва ҳасиб дар як баст то 5 тонна маҳсулот мебошад. Дар як сол корхона имкон дорад ба маблағи қариб 50 миллион сомонӣ маҳсулот истеҳсол намояд.

Пешвои миллат Эмомалӣ Раҳмон дар шаҳри Душанбе бузургтарин Маҷмааи варзишию фароғатии сатҳи байналмилалиро мавриди баҳрабардорӣ қарор доданд

13 сентябр бо иштироки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар ноҳияи Синои пойтахт Маҷмааи муосири варзишию фароғатӣ, ки аз толори муҳташами варзишии «ЮФСИ ҶИМ» (UFC Gym) ва Академияи футболи «Ювентус» иборат аст, мавриди баҳрабардорӣ қарор дода шуд.

Маҷмааи варзишию фароғатӣ аз ҷониби соҳибкори ватанӣ – Раиси Шӯрои гурӯҳи ширкатҳои “55 Групп” Даврон Ҷӯраев ҷиҳати дар амал татбиқ намудани сиёсати Ҳукумати Ҷумҳурии Тоҷикистон оид ба оммавигардонии варзиш ва тарғиби тарзи ҳаёти солим дар ҷомеа бо харҷи зиёда аз 30 миллион сомонӣ бунёд гардида, аз лиҳози имконият ва шароити мусоиди машқу тамрин дар дигар кишварҳои Осиёи Марказӣ назир надорад.

Боздиди Раиси шаҳри Гулистон Раъно Ҳошимзода аз ҷараёни таъмири маркази саломатии Ҷамоати шаҳраки Чоруқдаррон

Имрӯз, 12.09.2022 Раиси шаҳри Гулистон Раъно Ҳошимзода аз раванди таъмири маркази саломатии Ҷамоати шаҳраки Чоруқдаррони шаҳр дидан намуд.

Лозим ба зикр аст, ки бинои мазкур тибқи нақшаи иншооти ҷашнӣ ба истиқболи Ҷашни 35-солагии Истиқлоли давлатии Ҷумҳурии Тоҷикистон бо дастгирии мақомоти иҷроияи ҳокимияти давлатии шаҳр аз таъмири куллӣ бароварда мешавад.

Ба Раиси шаҳр иттилоъ дода шуд, ки корҳои таъмиру азнавсозии маркази саломатӣ тибқи нақша ҷараён дошта, дар вақти муайяншуда ба охир расонида мешавад.

Президенти Ҷумҳурии Тоҷикистон Эмомалӣ Раҳмон ба Подшоҳи Подшоҳии Муттаҳидаи Британияи Кабир ва Ирландияи Шимолӣ Карли III барқияи табрикӣ ирсол намуданд

Имрӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Подшоҳи Подшоҳии Муттаҳидаи Британияи Кабир ва Ирландияи Шимолӣ муҳтарам Карли III барқияи табрикӣ ирсол намуданд, ки дар он, аз ҷумла, омадааст:

«Аълоҳазрат,

Бо камоли сарфарозӣ ба Шумо табрикоти самимона ва таманниёти неки ин ҷонибро ба муносибати ба даст гирифтани зимоми умури Подшоҳи Подшоҳии Муттаҳидаи Британияи Кабир ва Ирландияи Шимолӣ иброз менамоям.

Ба Шумо сиҳатмандии комилу дар иҷрои ваколатҳои сермасъулатон комёбиҳои рӯзафзун, ба Подшоҳии Муттаҳида ва мардуми он сулҳу субот ва пешрафту шукуфоии пойдор хоҳонам.