Маориф - калиди рушди ҷомеа

Дар Кохи Истиқлол бо иштироки Раиси шаҳри Гулистон Сатториён Матлубахон Амонзода машварати августии омӯзгорон ва кормандони соҳаи маориф сурат гирифт.

Раиси шаҳр доир ба дастовардҳои кормандони соҳаи маориф суханронии муфассал намуда, таъкид дошт, ки дастпарварони макотиби шаҳри Гулистон ҳамасола дар миқёси вилоят ва ҷумҳурӣ бо гирифтани ҷойҳои ифтихорӣ сазовор мегарданд. Ҳамчунин тазаккур дод, ки дар баробари муваффақиятҳо баъзе камбудиву норасоиҳо ба назар мерасанд, ки бартараф намудани онҳо вазифаи ҷонии кормандон ва масъулини соҳаи маориф ба шумор меравад.

Неъмате хуштар аз Истиқлол нест

Рӯзи ягонаи ахбори сиёсӣ дар мавзӯи «Неъмате хуштар аз истиқлол нест» дар 40 корхонаву муассиса, идораву ташкилотҳои ҳудуди шаҳр ва ҷамоати шаҳракҳо бо намояндагони соҳаҳои гуногуни хоҷагии халқ ва иштироки васеи ҷомеаҳои меҳнатӣ хониши сиёсӣ ба роҳ монда шуд.

Дар хониши сиёсӣ тарғиботчиёни маҳаллӣ ва аъзои Шӯрои Ҳаракати ҷамъиятии ваҳдати миллӣ ва эҳёи Тоҷикистон иштирок намуда, роҷеъ ба аҳамияти Истиқлолияти давлатӣ, соҳибистиқлоливу соҳибватанӣ, бунёди давлатдории миллӣ ва дастовардҳову муваффақиятҳои Тоҷикистон дар даврони Истиқлолият, доир ба талошу муборизаҳои фарзандони халқи тоҷик дар ҷодаи ба даст овардани он, талошҳои давлату Ҳукумат дар беҳбудии шароити зиндагии сокинони кишвар, шинохти соҳибистиқлолии Тоҷикистон аз ҷониби ҷомеаи ҷаҳонӣ, омодагиҳо барои бошукӯҳ таҷлил намудани 26-солагии Истиқлолияти давлатӣ, доир ба ҳифзи истиқлолият, бедориву ҳушёрии сиёсӣ, ватандӯсту ватандор будан, содиқонаву софдилона барои ободии Ватан хизмат намудан суханрониҳо намуданд.

Мулоқот бо бонувон

Дар толори ҷамоати шаҳраки Сирдарё ба ифтихори 26-умин солагрди Истиқлолияти давлатӣ таҳти унвони «Дастовардҳои даврони Истиқлолияти давлатӣ» мулоқот бо бонувони фаъол ва ҷавонон доир гардид.

Дар мулоқот раиси кумиҷроияи ҲХДТ дар шаҳри Гулистон Муслимахон Ғайбуллозода, раиси ҷамоати Сирдарё Дилдора Содиқӣ ва мудири шуъбаи кор бо занон ва ҷавонони кумиҷроияи шаҳрии ҳизб суханронӣ намуда, доир ба дастовардҳо ва рушди бомайлони соҳаҳои хоҷагии халқи мамлакат ва шаҳр дар замони истиқлолият ҳарф заданд.

Тармими лӯлаҳои обгузар

Дар асоси дастуру супоришҳои Раиси шаҳри Гулистон Сатториён Матлубахон Амонзода ва бо дарназардошти аҳамияти Даҳсолаи амалиёти об барои рушди устувор ва соли дастрасии аҳолӣ ба оби тозаи нӯшокӣ аз ҷониби масъулини Корхонаи давлатии бисёрсоҳагии манзилию рифоҳии ҷамоати шаҳраки Сирдарё як қатор корҳои ободонию азнавсозӣ дар шаҳрак ба анҷом расонида мешаванд.

Аз ҷумла, дар кӯчаи Имомалиеви ҳудуди шаҳрак 280 метр лӯлаҳои обгузар иваз гардида, пас аз анҷоми ин корҳо сатҳу сифати обтаъминкунӣ ба аҳолӣ беҳтар мегардад. Чунонки аз гуфтаи масъулини корхонаи мазкур бармеояд, онҳо нақша доранд ба навбат лӯлаҳои обгузари ҳудуди шаҳракро тармиму азнавсозӣ намуда, сифати хизматрасонӣ дар масълаи таъмин намудан бо оби нӯшокӣ ба аҳолиро беҳтар намоянд.