Набзи шаҳр дар васоити ахбори умум

«Дар ҳама корҳо сабр мебояд…»

«Бонувони Тоҷикистон», аз июли соли 2015.

Маводи Тилав Расулзода, хабарнигори махсуси маҷалла дар вилояти Суғд бо сарлавҳаи болоӣ оид ба фаъолияту ташаббусҳои соҳибкори қайроққумӣ Турсуной Зокирова чоп шудааст.

Об омад

Консой. Раиси шаҳри Қайроққум Матлубахон Амонзода ҳини сафари корӣ аз набудани оби нӯшокӣ дар беморхонаи шаҳрак изҳори нигаронӣ карда, ба масъулини Ҷамоат дастур дода муваззаф карда буд, ки дар муҳлати кӯтоҳтарин ин муаммо ҳалли худро ёбад. Дар арафаи ҷашни Истиқлолият бошандагони ин ҷо бо дарёфти 6 ҳазор сомонӣ маблағ аз масофаи 1150 метр ба беморхона бо тариқи ҳашар хатти об кашиданд.

Омодагӣ ба ҳифзи Ватан

Ҳисси меҳанпарастӣ ва тарбия дар ин рӯҳия нахуст аз оила маншаъ гирифта, баъдан дар кӯдакистону донишгоҳ сайқал меёбад. Гуфтори «Ман Ватанро дӯст медорам!» бояд тамоми вуҷуди ҳар як фарди солимақлро фаро бигирад. Ва ин гуфтаро амалан собит мебояд, чунки хизмат ба Ватан мактаби бузурги обутоби ҷисмонию сиёсӣ ва тарбиявӣ ба ҳисоб меравад.

Бо ҳадафи омодасозии мутахассисон барои Қувваҳои Мусаллаҳи мамлакат дар муассисаи таълимии Кумитаи шаҳрии Ташкилоти ҷамъиятии мададгори мудофиа қарори Раиси шаҳр аз 18 августи соли 2015, таҳти № 198 ба тасвиб расид. Ташкилотҳои масъул вобаста ва нақша-чорабинӣ марбут ба иҷрои қарор таҳия гардидааст.

Китоб оинаи зиндагӣ

Дар толори хониши китобхонаи марказии шаҳр бахшида ба Рӯзи китоб ҳамоиши китобдӯстони шаҳр таҳти унвони «Китоб оинаи зиндагӣ» баргузор гардид.

Дар ибтидо директори китобхонаи низоми марказии шаҳр Омина Мирзоева баромад намуда, роҷеъ ба аҳамияти китоб ва китобхонӣ ҳарф зад. Сипас адиби қайроққумӣ Илҳом Раҳим доир ба манфиати китоб сухан ронда, китобҳои нави шогирдон ва қаламкашони қайроққумиро муаррифӣ карда, аз ашъори худ шеърҳо қироат намуд. Баъдан нозири маҳаллаи «Дӯстии халқҳо» Наталя Мирзораҳимова, сардори шуъбаи бачагонаи китобхона Лариса Седунова, намояндаи мақомоти иҷроияи ҳокимияти давлатии шаҳр Гулрабо Ҷабборӣ доир ба китоб ва мавқеи он дар ҳаёти инсон мубодилаи афкор намуданд.