ҚАБУЛИ ШАҲРВАНДОН

Дар толори хурди Мақомоти иҷроияи ҳокимияти давлатии шаҳри Гулистон қабули шаҳрвандон тибқи нақша аз тарафи Раиси шаҳри Гулистон Бахтиёр Саидаҳмадзода бо иштироки сардори Раёсати экспертизаи зиддикоррупсионии санадҳои меъёрӣ-ҳуқуқӣ ва лоиҳаҳои Сарраёсати муқовимат бо коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон подполковники адлия Дилшод Зарифӣ ба вуқӯъ пайваст.

Дар ҷараёни қабул даҳ нафар шаҳрвандон, аз маркази шаҳр, ҷамоати шаҳракҳои Адрасмон ва Консой ба мақомоти иҷроияи ҳокимияти давлатии шаҳр доир ба масоили мухталиф муроҷиат намуданд. Масъалаҳои  баррасишуда асосан марбут ба гирифтани кумаки моддӣ ва молиявӣ, обу ташноб, ҷудо кардани қитъаи замин, тағйир додани ному насаби кӯдак, сохтмон ва монанди ин буд. Ҳамаи муроҷиатҳо  мавриди баррасӣ, таҳлил ва омӯзиш қарор гирифта, ба масъулин дар раванди назорати иҷрои саривақтии муроҷиати шаҳрвандон супоришҳои мушаххас дода шуданд.

ЭЪЛОН

Мақомоти иҷроияи ҳокимияти давлатии шаҳри Гулистон ба маълумоти сокинони шаҳри Гулистон мерасонад, ки тибқи Нақшаи чорабиниҳои Агентии назорати давлатии молиявӣ ва мубориза бо коррупсияи Ҷумҳурии Тоҷикистон, санаи 19.06.2021 соати 10:00 дар бинои хурди мақомоти иҷроияи ҳокимияти давлатии шаҳри Гулистон аз ҷониби сардори Раёсати экспертизаи зиддикоррупсионии санадҳои меъёрии ҳуқуқӣ ва лоиҳаи онҳои Сарраёсати муқовимат ба коррупсияи Агентӣ, подполковники адлия Зарифӣ Д.Н. қабули шахсии сайёри шаҳрвандони шаҳри Гулистон ва ҷамоати шаҳракҳои он гузаронида мешавад.

Аз ин лиҳоз, ҳамаи хоҳишмандон метавонанд доир ба масъалаҳои шахсӣ ва масъалаҳои муқоивмат ба коррупсия муроҷиат намоянд.

Пешвои миллат Эмомалӣ Раҳмон дар хоҷагии деҳқонии «Абдулло»-и ноҳияи Данғара ба маъракаи ҷамъоварии ҳосили ғалла оғоз бахшиданд

17 июн Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар хоҷагии деҳқонии “Абдулло”-и ноҳияи Данғара ба маъракаи ҷамъоварии ҳосили ғалла оғоз бахшиданд.

Хоҷагии деҳқонии “Абдулло” дар деҳоти Сафобахш ҷойгир буда, соли 2005 таъсис ёфтааст ва дар ихтиёри худ 88 гектар замини обӣ ва 46 саҳмдор дорад. Саҳмдорони хоҷагӣ ҳар қитъа заминро бо самар истифода бурда, ҳамасола ҳосили хуби маҳсулоти гуногуни кишоварзӣ, аз ҷумла ғалла ба даст меоранд.

Ба Пешвои миллат муҳтарам Эмомалӣ Раҳмон иттилоъ доданд, ки дар мавсими кишти тирамоҳӣ кишоварзони хоҷагӣ дар масоҳати 40 гектар гандуми навъи “Алекс” ва “Краснодар-99” кишт гузаронданд ва акнун, умед доранд, ки аз ҳар гектар замин ба ҳисоби миёна 35-40 сентнерӣ гандум рӯёнанд. Ба гуфти хоҷагидорон боду ҳавои мусоиди имсола ба ҳосилнокии ғалла ва дигар навъи маҳсулот таъсири мусбат расондааст. Дар хоҷагии деҳқонии “Абдулло” дар баробари ғаллакорӣ, дар 5 гектар ҷав, 30 гектар пахта, 2 гектар полезӣ, 1 гектар картошка, 2 гектар зироати равғандеҳи маъсар ва дар 2 гектар юнучқа барои хӯроки чорво кишт карда шудааст.

Президенти мамлакат Эмомалӣ Раҳмон аз агротехникаи парвариши зироат ва рафти ҷамъоварии ҳосил дар Кооперативи истеҳсолии «Сомонҷон»-и ноҳияи Данғара боздид намуданд

17 июн Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо агротехникаи парвариши зироат ва рафти ҷамъоварии ҳосил дар Кооперативи истеҳсолии «Сомонҷон» шинос шуданд.

Боғдорӣ яке аз самтҳои асосии фаъолияти кишоварзони хоҷагии мазкурро ташкил намуда, меҳнаткашон баъди омӯзишу мукаммалсозии таҷрибаи илмию амалӣ асосан майдони навъҳои ниҳоли дарахтони меваҳояш содиротиро васеъ мекунанд.

Майдони ниҳоли дарахтони гелос, бодом, олу, себ ва нок ба афзоиш ёфтани нишондодҳои истеҳсолӣ ва зиёдшавии ҳаҷми содироти меваҳои дорои сифати баланду тамъи лазиз мусоидат намудааст. Ҳосили фаровони себ, олу ва бодом ҳавасмандии хоҷагидоронро барои таъмини рушди дучанди ин самти сердаромади соҳаи кишоварзӣ бештар кардааст.