Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Қазоқистон Қосим-Жомарт Токаев суҳбати телефонӣ анҷом доданд

Дирӯз суҳбати телефонии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Қазоқистон муҳтарам Қосим-Жомарт Токаев баргузор гардид.

Дар оғози суҳбат Роҳбарони ду давлат оид ба натиҷаҳои сафари расмии ба наздикӣ анҷомдодаи Президенти Ҷумҳурии Қазоқистон дар Тоҷикистон, мубодилаи афкор намуданд ва ба тавофуқоте, ки дар ҷараёни гуфтушунидҳои Душанбе дар сатҳи олӣ ба даст омаданд, баҳои баланд доданд. Дар ин қарина Пешвои миллат изҳори боварӣ намуданд, ки татбиқи пайгиронаи тавофуқоти мазкур ба рушди бемайлони шарикии стратегии ду кишвар мусоидат хоҳад кард.

Президентҳо инчунин вазъи имрӯзаи сиёсиву низомии Афғонистони ҳамсояро мавриди муҳокима қарор доданд. Муҳиммияти мусоидати ҳамаҷониба ба оғози амалии раванди музокироти байниафғонӣ қайд карда шуд.

ГУСТАРИШИ КОРҲОИ ФАҲМОНДАДИҲӢ

Таҳти раёсати Раиси шаҳри Гулистон Бахтиёр Саидаҳмадзода дар толори Мақомоти иҷроияи ҳокимияти давлатии шаҳр ҷаласаи васеи Ситоди шаҳрӣ оид ба пешгирии бемории коронавирус (COVID-19) баргузор гардид. Дар ҷаласа зикр гардид, ки тибқи иттилои Ситоди ҷумҳуриявӣ оид ба пурзӯр намудани чораҳои зиддиэпидемиявӣ барои пешгирӣ аз интиқолу паҳншавии бемории сироятии коронавирус — COVID-19 дар Ҷумҳурии Тоҷикистон дар муассисаҳои тандурустии мамлакат ҳолатҳои гирифтор шудани шаҳрвандон ба бемории сироятии коронавирус ба қайд гирифта шудааст.

Вобаста ба ин таъкид карда шуд, ки  ҳамоҳангии  фаъолияти сохторњои дахлдорро дар самти назорати риояи қоидаҳои гигиени шахсӣ ва ҷамъиятӣ аз ҷониби сокинон, назорати марказҳои хизматрасонию фарҳангӣ,  андешидани чораҳои қатъии пешгирикунанда ва зиддиэпидемикӣ,  риояи қоидаҳои санитарию гигиенӣ, пешгирикунанда ва зиддиэпидемикӣ, ҳамчунин бо мақсади пешгирии паҳншавии  бемории сироятии коронавирус андешидани  чораҳои зарурӣ ва пурзӯр намудани корҳои тарғиботӣ-ташвиқотӣ дастуру супоришҳои мушаххас дода шуд.

ҶИЛВАИ РАНГҲО

Дар Кохи фарҳангии “Истиқлол”-и шаҳри Гулистон фестивал-озмуни шаҳрии “Ҷилваи рангҳо” бо мақсади муаррифии сарулибоси миллӣ, тарбияи зебоипарастӣ, рушди саноати сабук, арҷ гузоштан ба фарҳанги либос ва ҳунари волои халқи тоҷик дар дўхти либосҳои миллӣ, тақвияту густариш бахшидан ба истеҳсолу истифодаи анвои гуногуни  либосу матоъҳои миллӣ ва муосири кўдакону наврасон, духтарону ҷавонон, бахшида ба  солҳои 2019-2021 “Солҳои рушди деҳот, сайёҳӣ ва ҳунарҳои мардумӣ” бо иштироки бонувон ва духтарон, кормандони ташкилоту корхонаҳо ва ҷамоати шаҳракҳо дар сатҳи баланд ташкил ва баргузор гардид.

Фестивал-озмуни шаҳрии “Ҷилваи рангҳо” аз рўи бахшҳои муайянгардида  гузаронида шуда дар бахши намоиши либосҳои кўдакона Меҳрнӯш Бойматова, Амина Боқиева дар бахши либосҳо барои персонажҳои афсонавӣ ва хоси корвони шодбошӣ Солеҳа Маҷидова, Мафтуна Ғаниева, Фарангис Абдувоҳидова дар бахши либосҳои маросимӣ ва идона Алямира Музаффарова, Камила Раҳмонова, ва Мафтуна Тошматова, дар бахши либосҳои расмӣ ва рўзмарра Гулноза Мирсалинова, Соҳиба Каримова ва Ирода Қодирова дар бахши намоиши либоси арўсии миллӣ ва муосир Алямира Музаффарова, Ганҷина Қодирова ва Шаҳноза Шарипова соҳиби ҷойҳои якум, дуюм ва сеюм гардиданд.

ТАҚВИЯТИ КОРҲОИ ОБОДОНӢ

Дар партави дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  ҷиҳати тақвият бахшидан ба корҳои ободониву созандагӣ бахшида ба 30-солагии Истиқлолияти давлатии Ҷумҳурии Тоҷикистон инчунин бо мақсади зебою хуррам гардонидани муҳити зисти шаҳри Гулистон кӯчаҳои ба номи Истиқлол ва Ҷавонии маркази шаҳр роҳи автомобилгард мумфарш карда шуд.

Инчунин дар соҳили “Баҳри тоҷик” корҳои соҳилмустаҳкамкунӣ бо маром идома дошта он аз тарафи пудратчӣ ҶДММ “Наврӯз-2000” гузаронида шуда истодааст. Бояд қайд намуд, ки дар шафати кӯчаи Айнии маркази шаҳр корҳои мураттабсозии заҳбур ҷараён дорад.