Сарвари давлат Эмомалӣ Раҳмон дар ноҳияи Айнӣ варзишгоҳи марказиро ифтитоҳ карда, бо сокинон мулоқот намуданд

Дар идомаи сафари корӣ дар вилояти Суғд Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Варзишгоҳи марказии ноҳияи Айниро ифтитоҳ карда, бо фаъолон, варзишгарон ва намояндагони касбу кори гуногуни ин ноҳияи дурдасти кӯҳистони мамлакат мулоқот анҷом доданд.

Маҷмааи калони варзишӣ бо майдони футбол ва дигар иншооти зарурии соҳа ба истиқболи ҷашни бузурги миллӣ – 30-солагии Истиқлоли давлатии Ҷумҳурии Тоҷикистон бо харҷи 20 миллион сомонӣ дар майдони 16 гектар бунёд гардидааст.

Варзишгоҳи мазкур дорои 6 ҳазор ҷойи нишаст буда, дар маҷмӯъ аз 7 минбари нишастгоҳ иборат мебошад.

Баландии минбари асосӣ ё худ ҷойи нишасти меҳмонони олиқадр қариб 12 метр буда, дар вақти бунёди варзишгоҳ таваҷҷуҳи асосии фармоишгар ва пудратчии иншоот — Идораи сохтмони асосии вилояти Суғд ва Ҷамъияти дорои масъулияти маҳдуди “ПМК-278” ба сифати корҳои сохтмонӣ равона гардидааст.

Пешвои миллат Эмомалӣ Раҳмон дар ноҳияи Айнӣ фермаи чорвопарвариро ба истифода доданд

Дар идомаи сафари корӣ дар ноҳияи Айнӣ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон фермаи чорвопарвариро мавриди баҳрабардорӣ қарор доданд.

Тавре маълум гардид, фермаи мазкур ба хотири истеҳсоли гӯшти хушсифат ва таъмини фаровонии ин навъи маҳсулот дар бозорҳо ташкил шуда, асосан ба парвариши чорвои калон машғул мебошад.

Фермаи нав барои парвариши 200 сар чорвои калони шохдор дар як вақт пешбинӣ шуда, пас аз парвариши яксола аллакай чорво барои забҳ омода мегардад.

Ба Сарвари давлат муҳтарам Эмомалӣ Раҳмон иттилоъ доданд, ки дар фермаи мазкур говҳои зоти “Сементал”, ки аз Федератсияи Русия ворид гардидаанд, нигоҳубин карда мешаванд. Ин зоти гов барои истеҳсоли гӯшт мувофиқ буда, тибқи баҳогузории пешакӣ, он метавонад то 1300 килограмм вазн гирад. Барои парвариш ва нигоҳубини дурусти чорво дар ин ҷо мутобиқ ба талаботи муосир имконият фароҳам оварда шудааст. Аз ҷумла, дохили ферма ва атрофи он, ки барои нигоҳубини чорвои калони шохдор пешбинӣ гардидааст, бо шароити зарурӣ таъмин мебошад.

Президенти мамлакат Эмомалӣ Раҳмон дар маркази ноҳияи Айнӣ коргоҳи дӯзандагӣ ва ҳунармандии «Кӯҳсор»-ро мавриди баҳрабардорӣ қарор доданд

Дар маркази ноҳияи Айнӣ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчунин коргоҳи дӯзандагӣ ва ҳунармандии “Кӯҳсор”-ро мавриди баҳрабардорӣ қарор доданд.

Коргоҳи мазкур аз ҷониби соҳибкори маҳаллӣ Гулчеҳра Ҳасанова дар заминаи бинои кӯҳнаву фарсуда ва солҳои зиёд бекорхобида ба хотири истиқбол аз ҷашни муқаддаси миллӣ — 30-солагии Истиқлоли давлатии Ҷумҳурии Тоҷикистон таъсис дода шудааст.

Иншооти дуошёна, ки дар масоҳати 750 метри мураббаъ ҷойгир мебошад, аз таъмири пурра бароварда шуда, дар он коргоҳҳои дӯзандагию атласу адрасбофӣ, кошонаи ҳусн, толори арӯсӣ ва марказҳои касбу ҳунаромӯзӣ ташкил намудаанд. Коргоҳи дӯзандагӣ ва маркази ҳунармандии “Кӯҳсор” бо дархости сокинони маҳаллӣ ва бо назардошти ба шуғл фаро гирифтани занону духтарони хонашин бунёд ёфтааст.

Сарвари давлат Эмомалӣ Раҳмон дар маркази ноҳияи Айнӣ майдони Парчам ва Нишони давлатиро ба истифода доданд

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маркази ноҳияи Айнӣ майдони Парчам ва Нишони давлатии Ҷумҳурии Тоҷикистонро, ки дар доираи нақша-чорабиниҳо ба хотири истиқболи сазовори ҷашни 30-солагии Истиқлоли давлатӣ бунёд шудааст, ба истифода доданд.

Нахуст Пешвои миллат муҳтарам Эмомалӣ Раҳмон дар вазъияти тантанавӣ ва дар ҳузури шумораи зиёди сокинон яке аз рамзҳои давлатдорӣ-Парчами миллиро барафрохтанд.

Баландии сутунпояи Парчами давлатӣ 50 метр буда, дарозии матои рамз ва муқаддасоти миллӣ ба 14 ва паҳноии он ба 7 метр баробар аст.

Масоҳати умумии майдони Парчами давлатӣ 1600 метри мураббаъро ташкил дода, барои сайру гашт ва истироҳати сокинону меҳмонон, инчунин гузаронидани чорабиниҳои оммавии фарҳангӣ-фароғатӣ ва варзишӣ, аз ҷумла машқҳои пагоҳирӯзӣ мусоид мебошад.