02 Май 2026
Санаи 29.04.2026 дар тарабхонаи “Манижа”-и шаҳри Гулистон даври шаҳрии озмуни "Ҳамшираи беҳтарин", ки бо ташаббуси Кумитаи кор бо занон ва оилаи назди Ҳукумати Ҷумҳурии Тоҷикистон роҳандозӣ гардидааст, бо иштироки ҳамшираҳои шафқат аз маркази шаҳр ва ҷамоати шаҳракҳо баргузор гардид. Дар озмун, мудири бахши кор бо занон ва оилаи Мақомоти иҷроияи ҳокимияти давлатии шаҳри Гулистон Сатторова Матлуба, намоянда аз МНДСЭ-и шаҳри Гулистон Эшонова Тутиниссо, инчунин намояндагони соҳаи тандурустӣ сардухтури Беморхонаи Ҷамоати шаҳраки Адрасмон Мирзовалиев Ораз, муовини роҳбари муассисаҳои КАТС-и шаҳри Гулистон Майнусов Абдулло иштирок намуданд.
Қайд карда шуд, ки дар зиндагӣ ҳастанд инсонҳое, ки бо меҳрубониашон дили дигаронро ором мекунанд. Онҳо ниёз ба саҳна ва шуҳрат надоранд. Онҳо қаҳрамонанд, вале ором ва хоксор. Онҳо – ҳамшираҳои шафқатанд.
Ҳар рӯз, ҳар соат, ҳар лаҳза онҳо бо чеҳраи пурнур, бо лабони пуртабассум, бо дилу ҷон хизмати инсонро мекунанд. Онҳо аввалин касонеанд, ки ба бемор тасаллӣ медиҳанд ва бо дастони пурмуҳаббат дору медиҳанд. Вақте бемор ашк мерезад, ин ҳамшираи шафқат аст, ки дар паҳлӯяш менишинад ва бо суханони нармаш оромӣ мебахшад.
Ҳамшираи шафқат будан танҳо пӯшидани либоси сафед нест — ин маънои садоқат, меҳрубонӣ, сабру таҳаммул ва муҳаббат ба инсонро дорад. Онҳо шабҳо бедор мемонанд, то як бемор ором бихобад. Онҳо хаста мешаванд, вале лаб ба шикоят намекушоянд. Онҳо дардро мебинанд, вале худашон сабабгори шифо мегарданд.
Ҳар лаҳзаи хизмати онҳо пур аз масъулият ва рисолат аст. Онҳо дар як рӯз шояд садҳо маротиба калимаҳои «тавба», «шоиста», «шукр» ва «зинда бошед»-ро мешунаванд, ки ин баёнгари қадр ва эътирофи онҳо аз ҷониби беморон ва наздикон аст.
Ҳамшираҳои шафқат – шумо намунаи ҳақиқии инсоният, меҳрубонӣ ва садоқатед. Шумо сазовори эҳтиром, дуо ва арҷгузорӣ ҳастед. Ташаккур барои он ҳама заҳматҳое, ки бо дили соф барои инсонҳо мекунед.
Сипас, кори озмун ҷараён гирифта ҳайати ҳакамон аз руи маҳорати иштирокчиён баҳогузорӣ карда, ба дастаҳои беҳтарин диплом ва туҳфаҳои хотиравӣ тақдим карда шуд.
